Discovery is uiteindelik ’n actual bank

Discovery (JSE:DSY ▲ 2.8%) se bank-afdeling het ’n groot mylpaal bereik: dit is nou winsgewend! Die maatskappy se “Superbank”-strategie, wat fokus op innoverende aanbiedinge (soos ’n gratis koppie koffie as jy genoeg geld aan koffie spandeer) het aangekondig dat deposito’s met ’n stewige 17% gegroei het, lenings het opgeskiet na R2 miljard, en daar is nou 1.57 miljoen mense met ’n Discovery bankrekening.

🏦 Ek is een van daai mense en ek moet bieg: Die beste benefit is die fast-lane op OR Tambo en Kaapstad se lughawe wat meer as enigiets my lewe gered het vir vlugte wat ek altyd amper mis. Ek dink wel Discovery se airport lounges is ’n scam (sien video hieronder).

💣 Hoekom moet ek omgee oor ’n bank waarvan ek nie deel is nie: Die Discovery Bank-storie is ’n aanduiding van die buitengewone mededinging wat in ons plaaslike banksektor bestaan. In Amerika en in Engeland bestaan daar nie dieselfde tipe veranderlikes wat van ons bankwese ’n interessante plek maak nie. Kyk hoe Pep en Old Mutual nou albei in dieselfde swembad begin speel, en Revolut wat uit Europa nou belangstel om Suid-Afrika beter te verstaan. Dis ’n veel meer interessante sektor van ons ekonomie wat tot onlangs toe beheer was deur net ’n handjievol bankie.

As jy nogsteeds by Volkskas Absa is, is daar regtig groot fout.

@appelduplessisThe airport lounge scam taking over South Africa #airportlounges

Tiktok failed to load.

Enable 3rd party cookies or use another browser

Seepunt verloor nog ’n geveg

Toe ons oorsee gebly het, het ek een keer ’n jaar in Seepunt kom kuier en ’n draai gaan maak by Balletique, ’n winkeltjie op Regent Road wat (ondermeer) swemklere verkoop het. My man het ’n ding vir Speedos en het oor die laaste dekade waarskynlik ’n dosyn by Roy, die eienaar, gekoop.

Roy was die tipe mens wat nie omgegee het wie jy is nie. Hy sou lekker stories vertel, altyd glimlag, altyd afslag gee en jou altyd met ’n ekstra bounce in your step daar laat wegloop. Hy het fantastiese stories gehad, en het elke keer vir ons die mal storie vertel oor hoe sy winkelpoppe in ’n vangwa opgesluit is (gaan lees Herman Lategan se storie daaroor hier).

Balletique, en die res van die straat, is ’n paar jaar terug aan ontwikkelaars verkoop. Die straatblok se historiese karakter word nou vervang met beton-luuksheid.

Roy se ma het die winkel 60 jaar terug begin en oor die laaste 46 het Roy dit aan die gang gehou. Nadat die ontwikkelaars hom uit Seepunt uit geskop is, het hy probeer om die winkel in Houtbaai aan die gang te kry. Dit het nie gewerk nie. Na ’n lang gesukkel om weer terug in Seepunt te wees, het hy aan die gatkant van Seepunt ’n plekkie tussen ’n sleutelwinkel en die KFC gekry. Roy se gearresteerde winkelpoppe was uiteindelik terug op ons sypaadjies, maar dit was duidelik Roy het gesukkel het om kop bo water te hou.

Verlede Desember het ek aan Roy voorgestel ons doen ’n pop-up: ek sou helfde van sy winkel se huur betaal en manga merch verkoop. (Een van my ongesonde obsessies). Hy’t gesê ek moet hom kans gee tot Maart, ná al die toeriste eers weg is. Hy het waarskynlik gedink my idee is kak, en natuurlik wou hy nie Speedos met One Piece en Moomin meng nie.

Roy se huur was R25k ’n maand. Reeds in Desember kon hy dit nie bekostig nie. Hy’t gehoop dat, soos tydens sy goeie jare in Regent Road, genoeg toeriste Speedos sou koop om hom deur die somer te dra. Maar daar is nog ’n kak deel aan Seepunt. Daar ís plekke wat toeriste vermy.

In Januarie het die hof op Roy se besittings beslag gelê. Hy was nie toegelaat om enigiets uit die winkel te neem nie. Vir maande het ek verby Balletique se lewelose winkelpoppe met kleurvolle baaibroeke geloop waaraan niemand mag vat nie. Oor WhatsApp het Roy gesê:

Ek het ’n gedeelte van sy storie in die aanvangsuitgawe van Promenader vertel. Hy wou nie eintlik hê ek moes nie. Ek het met Martelize Brink op RSG oor hom gesels (luister hieronder). Roy het geweet sy sakeplan werk nie meer nie. Hy kon sien hoe ander onafhanklike sake-ordernemings rondom hom sluit. Maar iewers, het ek gehoop, sou ’n weldoener ’n legende soos Roy kom red. ’n BackaBuddy is begin. Ten spyte daarvan het hy R4k in sy bankrekening oorgehad toe hy hierdie week oorlede is.

Dit het my twee dae gevat om hieroor te skryf omdat ek nie mooi weet wat ek oor Roy wil sê nie. Dis ’n fokken sad sakestorie. Ek skryf hierdie terwyl daar gekap en gebreek word in die woonstel bo my. Die vulstasie langs ons gebou word volgende week gesloop om plek te maak vir ’n hotel. Oorkant die straat het ’n nuwe Airbnb-blok verlede jaar opgeskiet. 6 maande voor dit: nóg ’n Blok-ontwikkeling langs ’n kerk. As die kerk en die twee Victoriaanse geboutjies oorkant ons nie histories was nie, was dit ook nou reeds gesloop.

Wat beteken dit om ’n inwoner in ’n buurt te wees. Wat beteken dit om klein besighede te ondersteun. Wat is ons veronderstel om te doen om ons eie gemeenskap te help.

Roy se broer skryf gister op Facebook:

The greedy developers of Sea Point ended my brother’s life.

Ek is nou meer as ’n maand met Buitelyn aan die gang. Die lekkerste deel is die eksperimentele aard daarvan, en om met ander kreatiewes te gesels oor hoe ‘n mens ‘n handelsmerk bou. Die meeste van my vriende in die joernalistiek is vas oortuig dat my besluit om Bloomberg te verlaat (die tweede grootste nuusorganisasie in die wêreld) waarskynlik die domste besluit van my loopbaan was. Hulle is seker nie verkeerd nie. ’n Handjievol het my egter van die begin af ondersteun en aangemoedig. Ek is gevolglik ingesuig in die kreatiewe energie wat hulle uitstraal. Vandag wil ek oor een van hulle gesels.

Ek het vir Joanita Cillié ontmoet in 2007. Die heel eerste foto van ons op Facebook was tydens ’n aandete van ons joernalistiekklas op Stellenbosch. Ons was onbewus van die kamera, en ons kon daardie aand nie ophou praat nie. (Mense het gedink ons date). Ons het nie oor mense gepraat nie, nie oor die nuus nie: ons kon nie ophou praat oor idees nie. Ek kan nie onthou watter idees presies nie, maar dis die onderwerp waaroor ons vandag nog gesels.

Ná ’n tydperk by Shoprite, het Joanita ons honneursklas se top sakejoernalis geword voordat sy ge-pivot het as leefstylredakteur. Sy’t ernstige joernalistiek gepleeg, die tipe wat ek begeer het.

In 2017 het Joanita besluit om haar eie ding te doen. Ek was bang namens haar. Ek het van haar logo gehou, ek het van die idee gehou, maar ek het nie gedink dit gaan werk nie. Nie omdat sy nie die uithouvermoeë gehad het nie, maar omdat ek bang was sy word verveeld. Sy het te veel idees gehad wat nie deur één diens of één handelsmerk verteenwoordig kon word nie.

Nege jaar later is Joanita die skerpste agter-die-skerms argitek wat ek ken. Sy is die persoon wat jy nodig het wanneer jy ’n handelsmerk se visuele identiteit van die grond af probeer kry. In ’n bedryf wat vol halfgebakte visuele idees is, is Joanita ’n seldsame skepper van visuele ontwerp, fotografiese produksie en stilering. Sy kon nog nooit in ’n boksie gedruk word nie. Dis die ding wat haar multi-dissiplinêre rol in die verpakking van inligting soveel meer waardevol maak.

Joanita het opgewonde geraak oor elke idee wat ek nog ooit met haar gedeel het. Sy het my help groei in elke aspek van my besigheid. Daar is ’n tipe chirurgiese presiesheid wat sy bring na elke projek wat sy aanpak. Stil-stil het sy kliënte plaaslik en oorsee laat regop sit. Sy sal egter nooit daaroor brag nie. Jy sal produkte met haar werk in jou kombuis hê sonder dat jy dit eers weet. Sy staan uit in ’n see van visuele nonsens.

Ek dink jy weet wie die Joanita in jou lewe is. Ek hoop jy waardeer hom of haar en ek hoop jy forward hierdie vir hulle. En verstaan my nou mooi: dis nie dat ek secretly haar wil afrokkel van haar man af haar kreatiewe energie wil bottle nie. Dis bloot dat daar in enige tipe besigheid, of enige goeie sakeverhouding, iemand is wat met ’n stilis te brein na jou sakeplan kan kyk en die groter prentjie raaksien.

As jy dink jy het nie daai persoon in jou lewe nie, belowe ek jou jy het. Jy moet net tyd maak om te verstaan hoe die mense in jou lewe prentjies maak, want ons weet nooit hoe ander die wêreld sien nie. Hulle gaan nie ’n vennoot wees nie, beslis nie jou eggenoot nie, maar dis die moeite werd om jou idees met hulle te deel.

Lekker verjaar Joanita.

GoPro kry die meme treatment

GoPro () het die laaste paar jaar begin lyk soos niks anders as my single vriend se grootste hobbie nie. Ek wil regtig nie nog ’n random video gestuur word oor jou jongste vakansie nie, dankie Rhys. GoPro se aandele was ook ’n vervelige affêre. Verlede week het dit rondom 60c verhandel toe die internet skielik besluit het om dom dinge te doen.

🎮 Enter Markiplier. Die gewilde YouTube-ster Mark Fischbach (beter bekend as Markiplier) het sonder dat mense agterkom meer as 13 miljoen aandele (sowat 8,5% van GoPro) opgekoop. Die naweek skryf my voormalige Bloomberg-kollega (wat in die regte lewe verskriklik lui is) Lucas Shaw oor hierdie feit in ’n nuusbrief en die internet ontplof: die aandeel het Maandag met 46% opgeskiet (en weer Dinsdag geval).

📹 Gou voor die hype verdwyn. Gewoonlik loop die storie as volg: ’n sukkelende maatskappy kry aandag by die Reddit crowd, hulle hou die aandeelprys kunsmatig hoog, almal maak geld en dan gaan dinge terug na hoe dit voorheen was. GoPro se bestuur het Dinsdag egter almal verras en aangekondig dat hulle die maatskappy gaan uitverkoop aan Starman Optical. Aandeelhouers is uitbetaal ($1.14 per aandeel), GoPro se $92 miljoen skuld word afbetaal, en bestaande beleggers hou sowat 10% van die nuwe besigheid.

Hierdie transaksie was maande lank reeds in wording, maar die skielike meme-stormloop het dinge waarskynlik effens ongemaklik gemaak: as die aandeelprys na $10 toe opgeskiet het (as gevolg van die YouTube-waansin), sou die koper dalk koue voete gekry het. GoPro moes noodwendig binne 24 uur van ’n meme-loving aandeel na ’n privaatmaatskappy verander. Incredible. Lucas is steeds lui.

Shoprite eet Vida

Shoprite (JSE:SHP ▲1,59%) is duidelik nog nie tevrede met hoeveel van jou maandelikse begroting in hulle sak beland nie. Oom Pieter het nou amptelik ’n aanbod gemaak om my gunsteling Vida e Caffè uit te koop.

🥐 Obrigado vir die 400 winkels. Vida het oor die afgelope twee dekades gegroei van ’n enkele plek waar ek en Annika Larsen elke dag voor e.tv se kantore in Kloofstraat ’n koffie gaan koop het (dis ook waar die hotste vrou - wat nie Annika is nie - my uitgekak het en ek dit nooit sal vergeet nie) tot ’n netwerk van bykans 400 korporatiewe en franchise-takke. As jy nie weet wat Vida is nie: wat de hel.

🛒 Hoekom Shoprite? Supermarkbase soos Pieter Engelbrecht weet lankal dat kruideniersware se marges maar maer is. Waar sit die regte wins? Hoë-marge geriefswinkels, klaargemaakte kos en spesialis-koffie. Soos my vriend Herman wat gister ’n koffiewinkel in Rooi-Els oopgemaak het: “Appel,” het hy gesê toe ek al die pad deurgery het om my hoërskoolkamermaat (en die ou wat vir my dié bynaam gegee het) se eerste besigheid saam met hom gaan vier het, “jy sal nie glo hoe groot marges op koffie is nie.” Shame, gaan stop maar by Something Els en koop ’n koffie, asseblief? (Sien my video review hieronder).

☕ Deur Vida in te sluk, kry Shoprite dadelik ’n gevestigde kultus-brand waarmee hulle mededingers soos Pick n Pay en Woolworths se koffiehoeke kan aanvat – en moontlik Vida-kiosks in honderde Checkers FreshX-supermarkte kan inrol.

Belangriker vraag: Gaan Sixty60-drywers binnekort ’n meia de leite by my kan kom aflaai sonder om te mors?

@appelduplessisSomething Else is my hoërskoolkamermaat se nuwe deli op Rooi-Els. Gaan stop maar daar as die bobbejane jou toelaat om uit te klim

Tiktok failed to load.

Enable 3rd party cookies or use another browser

Ry asseblief Rooi-els / Rooiels? / Rooi-Els toe. Herman verkoop ook baie groot hoenders wat hy eintlik by Checkers koop maar dis baie lekker, belowe.

Tim Apple groet

Tim Cook het gister totsiens gesê aan Apple. Na 15 jaar as CEO, was hy nooit Steve Jobs nie. Niemand kon ooit daardie tipe rol herhaal nie. Maar hy het Apple se markwaarde vervierdubbel, so well done.

🍎 Die koebaaibrief wat Tim aan werknemers gister uitgestuur het was redelik generies en sentimenteel. Hy praat van ’n “extraordinary team” en “culture triumphs”. Hy was ’n prominente gay sakeman wat dit reggekry het om nie te veel in die publiek te wys hoe hy eintlik vas sit met Trump nie. Maar daar is een sin in Tim se brief wat vir my uitstaan:

So die goed waaroor Tim die trotste is, is presies die goed wat syfers nie kan wys nie. Die syfers is egter die interessantste deel van sy 15 jaar as Apple CEO.

• Toe hy in 2011 oorgeneem het was Apple ongeveer $350 miljard werd. Vandag is daardie syfer bykans $4 triljoen.

• ’n $1,000-belegging in Apple to Cook oorgeneem het sou vandag $20,000 werd wees.

• Daar is nou meer as 2,5 miljard aktiewe Apple-toestelle.

Die grootste uitdaging vir sy opvolger is waarskynlik hoe Apple sy AI-strategie gaan bestuur (wat op die oomblik nêrens is). John Ternus het ’n maatskappy geërf wat omtrent alles het - behalwe ’n duidelike antwoord op wat Apple se volgende big thing gaan wees.

Ek moet net weer, vir oulaas, hierdie classic oomblik vir jou wys:

Die Chinese squeeze WeBuyCars

Daar’s ’n goeie storie op Moneyweb vandag oor wat aan die gang is met WeBuyCars (JSE:WBC ▼2,74%). Dit het met fanfare gelys op die JSE in 2024, maar die aandeelprys het sowat 35% sedert die begin van die jaar verloor. Een van die grootste redes? Chinese motors wat die tweedehandse motormark op sy kop keer. Pryse van BYD en kie is geweldig mededingend en met nuwe-motorverkope wat aanhou styg (gaan lees my vorige nuusbrief daaroor) maak dit besighede soos WBC seer.

Dis nie asof WeBuyCars nie groei nie:

🚗 In Maart het verkope ’n rekord 17 209 motors bereik.

💰 Sy voorraad het met sowat R500 miljoen toegeneem.

Maar al daai motors kos geld om te finansier. Rentekoste vir die ses maande tot einde Maart het tot R70 miljoen gestyg, teenoor R50 miljoen ’n jaar tevore, terwyl rentedraende skuld met 56% tot R2 miljard toegeneem het.

So hier is die vreemde deel van die storie: WeBuyCars verkoop meer motors as ooit, maar maak nie noodwendig soveel meer geld op elkeen nie.

Daai nuwe Chinese motors gaan uiteindelik tweedehandse motors moet word.

Dis dit vir vandag. Laat weet wat julle dink!

SA betaal R56B meer aan petrol

Naas Australië en Brasilië, is Suid-Afrikaanse dieselkoppe die wat die meeste deur Trump se speletjies in Iran benadeel word. ’n Studie deur CREA, ’n energienavorser in Finland, wys hoe individuele lande benadeel word deur die grootste volgehoue olieprysskok sedert 1990. Hulle reken Suid-Afrika het sedert Maart R56 miljard se ekstra kostes aangegaan.

🛢️ Terwyl ryker lande die hoër kostes kon absorbeer, is Suid-Afrika tipies uitgelewer aan beide die styging van oliepryse en ons wisselkoers - wat deel van die rede is hoekom ons so hoog op die lys is. In terme van petrol is ons sesde-seerste. Vir al my sondes ry ek ook ’n Hilux: dit beteken ek en jy is onder die wêreld se top drie armstes (rykstes dalk?) wanneer dit kom by mense wat met dieselbakkies ry. My goeie genade.

Dis waarskynlik die moeite werd om te verduidelik dat deel van die rede hoekom Suid-Afrika op hierdie lys is, is omdat ons goed is met boekhou en data deel met die res van die wêreld. Daar is ’n reeks lande wat nie hierdie tipe data versamel of beskikbaar maak nie.

ONTHOU: Dinsdagaand gaan diesel- en petrolpryse skerp styg. Vermy môre se rye motors en maak maar vandag vol.

Jackson Hole-rimpelings

Verlede week het ek jou vertel van die finbro SuperBowl. Vandag sien ons hoe die mark die Fed Chair Kevin Warsh se Vrydag-toespraak in Jackson Hole interpreteer. Hy het dit duidelik gemaak dat Amerikaanse inflasie (tans 3,7%) te ver bo die Fed se 2%-teiken is. Beleggers het dit geïnterpreteer as sy manier om te sê dat rentekoersverhogings op pad is. (Trump het dit nie gelike nie). As rentekoerse styg in September (net voor die midterm-verkiesings in November), gaan dit Amerikaners meer kos om huislenings af te betaal. Dit gaan noodwendig die Republikeine seermaak.

🇿🇦 Wat van ons? Warsh se toespraak het die rand reeds getref: ons is terug bo R16 teenoor ’n dollar. Beleggers skuif nou geldjies uit plekke soos Suid-Afrika na die VSA in afwagting op ’n hoër opbrengs. Dit is ook ’n tricky een vir die Reserwebank. As die Fed rentekoerse in September gaan opstoot, kan die SARB moontlik besluit om rentekoerse hoër te hou vir langer.

Daar’s jou ekonomie les vir die dag. Nou is my kop seer.

NOTA: My nuwe AI-podcast saam met Gys Hough sal later vandag beskikbaar wees op ons YouTube-kanaal en op Spotify. Gaan teken solank in. Dit word geborg deur AITSA,’n spilpunt vir Afrikaanse AI-dienste wat begin is deur Pieter Bothma. Hy is ook die skepper van die Koedoe-toepassing wat honderde dinge vir jou doen met AI: van Bybelversies lees tot Bok-foto’s skep. Dis actually insane. Laai dit af. Soek ‘KOEDOE’ op jou app store. Gaan check ook sy YouTube-reeks wat spesifiek ontwerp is as ’n praktiese, stap-vir-stap gids vir mense wat AI in hul daaglikse lewe en besigheid wil implementeer. Dankie Piet!

Read more

Read more

Read more

Read more

Read more

Read more

Read more

Read more

Teken in op daaglikse ma…

Read more

Read more

Read more

Read more

Read more

Read more

Read more