Taasi maaha wax iska dhaca, maxaa yeelay, caqli-wadareedka bulshada kama baxsan karo qofku, haddii ay dhacdo oo uu si uun uga lug-furtana, sahalo maaha in weedhiisu halqabsi ummadeed noqoto, sidaas daraadeed, maahmaahyada liita ee caanbaxay sida liidata ee aynu wax-u-arragno ayay tilmaamaysaa. Halkan, waxaan idin kula waddaagayaa shan maahmaahood oo beenoobay.

Dadi waa dadkii hore hadalna waa intii yidhi.

Dadku maaha dadkii hore, hadalna maaha intii yidhi; dadku waa dad, hadalna waa ku habboonidii. Sida waayaha dadku isu baddelay ayuu dadkuna isu beddelay. Khibrada aaddanaha ayaa xikmada dhalisa, mana aha murtidu wax wakhti gaar ah iyo dad gaar ah u xidhan. Maahmaahdan busaylka tagidda ku dhisan, ee marar badan afjabinta ku ah jiilkan nooli, waxay ka indhoxidhan tahay, runta ah; dadka ma qeexo waxay dhaxlaan, ee waxa qeexa waxa ay curiyeen. Tusaale ahaan, in waalid faashil ah ku dhalay way ku saamayn kartaa, laakiin, kuguma waajibinayso in aad waalid faashil ah noqoto. In aad ka timi qoys aan wax-barin way ku saamayn kartaa, laakiin, kuma qasbanid in aad la cayn noqoto. In Soomaaliddii hore gabadha u-aragtay walax guri iyo god loogu talo galay, way ku saamayn kartaa, laakiin, waa gaabis wacyi haddii wali sidii wax u aragto. Tagtadu inama qeexdo, way ina saamaysaa!

Aqaantaada oo gaaban aamus baa lagu kabaa.

Maya, sida qoraa Cabdicasiis-Guudcadde u baddelay, aqoontaada oo gaaban akhris baa lagu kabaa. Maxaa dhacay, ujeedku maaha wax dadka kale kaa odhan doonnaan ama kaa ogaanayaan, muhiimadu waa waxa aad la noolaanayso. Aqoontuna waa agab nolosha fuddudeeya, maaha iska-dhiska dadka! Sidaas daraadeed, cidda koobaad ee ku dhiban aqoon gaabnidaaddu waa ADIGA.

Kal caano-galeen kas ma galo.

Maya, kal caano-galeen waa kas-qabeen. Waxa waaqicu ina baray, hooyo aan hanti lahayn, oo dawlad lahayn, oo joogta dhul jireenkeedda lagu quudhsado oo aan loo ogayn, loo na agabarin in ay hesho shaqo anfac leh, oo haddana---garashadeedda awgeed, gartay in ay wehel waayaha ugu noqoto toban carruur ah iyo ka badan. Dabadeed, meel aan nololi sina suuragal uga ahayn, ka soo saartay wax lagu noolaado. Halka kii boqol neef in ay gooyaan ku faani jiray, ee in uu naagta garsho dhaamo is biday, uu is dhiibay ee uu naftiisii ku filnaan waayay, sidaas daraadeed, waa maahmaah dhacday. Wakhtigaa na baray cidda garashada leh iyo cidda sheegata!

Haddii magaalo laga il la'yahay aad tagto, il baa layska ridaa!

Maahmaahdani, waxay ku baraysaa in aad hadba ciddii aad la joogta la mid noqoto. Haddii aad qof aqoonyahan ah maalin la fadhiisato, in aad erayada afkiisa kala baxdo oo isu eekaysiiso. Haddii aad tuug la fadhiisatana, adigu kaga horayso, haddii aad ummad wacyixun la nooshahayna sidoodda aad is nasakhso! Waa maahmaah faashil ah, oo bartii yaqaanka u adeegta. Waa dhab in dad kaa badan iyo biyo kaa badanba ku qaadaan, oo haddii aad la nooshahay dad aad ka fikir iyo dhaqan duwan tahay aad is-aruurinayso. Laakiin, kama dhigna in aad is-aasto oo qiyamkaaga uga tanaashuso. Xaq baad u leedahay in aad la noolaato, wixii adiga kula quman!

Waxa ugu xun ee qof halabuur ah ku dhici karaa, waa in uu cid gaar ah wax-u-qoro; maaha ka qoro. Masiibadda farshaxanku waa in filashada dadweynuhu hagto, abshirtuna, waa in Najaax Haaruun, khatartaas ka badbaaddey, in tii aan akhrinayay qormadeedda "why I misplaced the camel" ee ay shaqadeedda kaga warramayso, waxa aan guntaday labo qodob, 1) shaqada halabuurku maaha raadinta aqbalaadda bulshada, shaqaddiisu, waa gudbinta farriinta dhabta ah. 2) ka faalloonta nolol aadan waligaa ku noolaan, waxa ka mudan falaqaynta waayahaaga, dareenadaada iyo wakhtiga aad nooshahay, maaha iska-tirotirka taariikhda, runtu se, waa in aynaan tagtada waxba ka baddeli karin. Waa maxay farshaxanka Soomaaliga ahi? Su'aashan ay Najaax is-waydiinayso, waa tu maan-ku-hadh ah. Waa tu qasbaysa in qof kaste oo halabuur ahi is-waydiiyo, tusaale ahaan, waa maxay suugaanta Soomaaliga ahi? Ma ta geela, miyiga, gumaysiga, colaadda iyo qabyaalladda ka hadashaa? Muxuu halabuurka wakhtigan nooli u hayaa jidkii halabuurkii horre ee waayahiisa uga dheggo-xidhan yahay? Si walba, waxay ila tahay, waxa ugu weyn ee ka dhaxeeya shaqo kaste oo macno leh, waa runta, daacadnimo iyo dhab-abaaridda halabuurka.

Dabadeed, haddii maansadu xanbaarto qiso, fikir, dareen iyo dood. Farshaxankuna, docdiisa, waa agab intaas iyo ka badan ba xanbaara. Haddii qallinku yahay qori lagu dagaal galo, sawirkuna waa rasaasta qori kaste u baahan yahay, waxa aan sidaas u leeyahay, sawiradani, waxa ay ilbidhiqsiyo kooban igu tuseen, wax boqolaal eray iga qaadan lahaa! Marka lagu horkeenno xaqiiqo aad og tahay, sow gar maaha in aad tidhaahdo; mararka qaar, runtu, waa wax la taaban karo. Mar kaste oo aan eego farshaxanka Najaax, waxa aan dareemaa xanuunka qiso kaste oo aan illaaway, ama si uun maankayga ugu baxday; igama aha ammaan ee sida dhabta ah: murug baan la maddoobaadaa. Maxaa yeelay, ma jiro sawir aan ku xasuusinaynin qiso aad u-soo-taagnayd, maqashay ama aad akhriday, ama eray ku dhaawacay, damaq aad qarsatay, ama yaxyax lagu dareensiiyay. Sidaas daraadeed, waa sawiro kula nool oo kolka aad jaleecdaba iskaa xasuusinaya, ama ugu yaraan, sidaas bay aniga ii yihiin. Maxaa dhacay, kolkii aan yaraa waxa aad ii gubi jirtay in hooyaday oo shan ubad ah korinaysa kaligeed ay ku maahmaado "naagi waa cad bisil" ama nagu tidhaahdo "naaguhu waxtar ma leh" waxa ay iga hanjabin jirtay riyooyinkayga, wax ay weedhani iga dili jireen sawirka aan hooyaday ka hayso. Markii se aan garaadsaday, waxa ii muuqday sida haweenka looga indhoxidhay kartidooda, garashadooda iyo wax-qabadkooda nololeed. Inkaste oo fahankaasi si uun nafis iigu ahaa, haddana, waxa nasiibxumo ah in dumar badanina sidaas aaminsanayihiin.

Hagaag, waxa dhawaan soo baxay urruris cusub oo ciwaankiisu yahay "gabadhi qabiil ma leh" waxa lagu soo bandhigay dalka Isweesarlan. Farshaxanka Najaax Haaruun, aragtiyaheeda fanka, waxa ay kaga duwan tahay farshaxamistayaasha kale, iyo si guud, shaqooyinkeeda kale, kaga bogo qoraaladeeda;

https://open.substack.com/pub/najaxharun/p/why-i-misplaced-the-camel?utm_source=share&utm_medium=android&r=6h5xsj

Marka aad sidii dabaysha lalayso, waxa uun ku celin kara wixii cagahaaga cusleeya, ee socodkaaga hakiya. Waa sababta aan markii labadeed ugu qallin qaatay shaqooyinka Najaax, maxaa yeelay, way i dabraan oo igu qasbaan in aan hakado. Waxa siddan oo kale ii hakiya wax-soo-saarka Bell Hooks oo waxa aan xasuus nahay in buuggeeda "Will To The Change; Men, Muscularity And Love" aan aad ula ooyay, qof kaste oo akhriyayna wuu fahmi karaa weynida buuggaas.

Fanku marka uu nool yahay wuu ku gilgilaa, wuxuu xoqaa boogahaaga, waxa uu ku tusaa wixii aad ku riday haluul aan cid arki karin; godkii aad aastay buu fadhaa! Waxa uu sawirkani i xasuusiyaa, maalinkii koobaad ee aan jidhkayga yaxyax ku dareemo. Waxay ahayd duhur, qiyaastii waxa aan jiray saddex iyo sanno, markaas bay ii soo baxeen ibo yaryar oo aan aniga iiga duwanayan farahayga yaryar. Maalintaa, ma xasuusto wixii aan u soo baxay, ha se ahaatee, dabayl xagaa dhacaysay ayaa dalad cad oo aan xidhnaa shafkayga sidii xanjo ku malaastay, indhaha igu soo maqan maan dhaadin illaa nin khamiis cad xidhan ii yeedhay oo kolkii aan u tagay igu yidhi, "daladda iska qabo" waan naxay, oo inta aan labada gacmood daladda isaga qabtay dhaqaaqay, waxay ahayd maalinkii koobaad ee aan u fiirfado ibaha naasahayga, iyo maalinkii koobaad ee aan barto in ay cawro yihiin.

Indhahan nagu maqani, waa warmaha na jarjara iyo ishaarada naagnimadayda hagta. Waxay na baraan wax kaste oo aannaan ahayn oo ay tahay in aanu noqono. Waxay nooga digaan wax kaste oo aanu nahay oo ay tahay in aanu ogaano. Ma ka fakartay sababta dumarka loo dhaho, "waa cad bisil'? Ma in dumarku yahay dad liita oo waayaha u jilicsan baa? Xaasha! Waa in la banaystay si walba oo gabadha loo cuni karo, waa in la caadiyeeyay dulmiga iyo damqa gabadha. Waa in la yareeyay diidmadeedda iyo cod kaste oo ay xanuunkeeda ku sheegato, waa in la shaki galiyay waxa ay og tahay iyo damaqa ay martay.

Indhahan kugu maqalini waxay u shirayaan sidii ay cad bisil kaaga dhigi lahaayeen. Wax ay ku maahmaahayaan, "gabadhi waa carruur cag weyn" waxay se moogan yihiin haddii gabadhu carruur cag weyn tahay, ninkuna, waa carruur cirro leh.

Waa laga xaalay, maya! Waa la bixiyay, maya! Cadkii ay bisleeyeen ayay baaqigii kala iibsadeen, maxaa dhacay, raqibi waa raggeed!

BAL ADBA!!

Fanaankaygu waa kii fankiisu i gilgilo, waa kii aan fankiisa ku fakaro, maxaa yeelay, wuxuu i siiyay quudka aan ugu baahida badanahay. Mahadsanid Najaax, halkaas ka wad geeddiga.

Shaqadan fahanxumo aad u weyn oo arxandarro ah baa ku lammaan. Jaarriyadu waa gabadh kula mid ah oo dani baday nadiifinta uskagaaga, sida qof walba dantu ugu qasabtay in uu shaqaysto.

Maansadan Jaarriyad, inkaste oo aan ubucdeedu intaas ahayn, ha yeeshee, gabadh jaarriyad ahayd ayaa warramaysa, waayaheedda iyo wixii shaqan galiyay ayay ugu warramaysaa nin ay ka tagtay oo ay xidhiidh waddaag ahaayeen;

Hablahaa gayiga
Ku guhaad qaboo
Goor iyo ayaan
Waxa lagu ganaa
Warmo goynayoo
Inta godob qarsoon
Haddaan gaar u faqo
Cirkaa guuxi lahaa
Illin gaaxatoo
Gowdiyo sanqadha
Gu' la moodayee
Igadaa gujada
Gacal baan nahee,

Gefku wuu dhacaa
Lagu kala go'ee
Gardarrada adoon
Guudka saaranayn
Waan gudoomayaa
Khaladkaan galee
Hay goyn wadnaha,

Wacadkaad gashoo
Garab kaa helaa
Gobbanimadu tahay
Markay garsho tee
Guurkaan lahaa
Gogal baan u dhigi
Markan gees ka maray
Qalbi ii godladay
Godobtaan ka galay
Anba way gubtaa!

Hayeeshee guraca
Nolol guuna baa
Gadgadoonka lee
Waayaha gorfee
Nafta goonideed
Markan gaar u idhi;
Maan gaydhamoo
Godladdaa i yidhi;
Gurbood iyo carruur
Gurgurcoodka iman
Intuu gaajo arag
Ama ruux gunnoo
Gumaystoo hagrada
Wakhtiguba u gayn
Gayi nabada iyo
Gaban ladan u doon!

Aan gaabiyoo
Kuu guud maree
Wax aan Garaad
U gollaynayaa;

Gabadh baan ahaa
Gasiinkay cuntiyo
Guri loo hoydiyo
Garba-saarta iyo
Gashigiyo maryaha
Ciddi gacan ka siin,

Khayrkay guclaha
Aqoon loo guntado
Markay goobayeen
Gaban reer dhalaan
Gijada ugu jiray,

Feedhahayga godan
Iyaggaa guroo
Garbahaan ku sidday
Gabannaan i leeg,

Jaarriyad giriif
Gacan-saar ku xigo
Looggu goodiyoo
Gabataan ahaa,

Gigi-waaqsilaa
Qof ka goohayoo
Gacalkuu xigsaday
Gudmaha u sitoo
Labadiisa garab
Midi goynayoo
Geerida ku suga
Gurigaan ahaa,

Xaquu gaar u laa
Ruux laga gudboo
Gabadhnimo darteed
Loo gumaynayoo
Xigto maanku gudhay
U gashaan ahaa,

Waxa godobta iyo
Guhaadaan qabiyo
Gardarrada i baday,

Anigoo gu' jira
Ayay goor madow
Aabbahay gacale
Denbi aanu gelin
Godob loogu dilay,

Ganni hooyaday
Galab awr maqnaa
Gacan noo dhawaa
Jeeddaado guud
Yara gaadh lahayd,

Gaangaanbi uu
Sid u go'ay lahaa
Yay u gaabisoo
Iyaddoon Gahaydh
Gurgurshaagi helin
Gabal baa u dhacay,

Caddaa lagu gudaa
La gargaarsadaa
Gudcur soo galoo
Guban kugu helee
Daruuraha is galay
Ayaa gibil ku xidhay
Dayixii gayiga
Gaadhsiin lahaa
Ilays kala guroo
Geedkiyo dadkaba
Aad ku garan lahayd,

Mar ay goob maddow
Go'a dhigatayoo
Wakhtigoo is guray
Salaad gudubtay ay
Ka gaadhsii lahayd
Ayaa balo gudoo
Guuraynaysaa
Gab ku soo dhaheen,

Ragga qaar gunnoo
Gocoraa jiree
Labo geel jiroo
Gacantoodu abid
Haween gaadhinbaa
Sidii gaaf aroos
Midba goor u baxay,

Cadka hoos u go'ay
Lugta gooni taal
Dhiiga ciidda goday
Gumaarkiyo wadnaha
Aan garaaca dayn
Gariirka is qabsaday
Galiilyadda xubnaha

Taah geeriyaad
Ilmo gabax ka tidhi
Guux laga naxiyo
Gool soo ciddiyo
Gudcur baa ku helay
Gabaahiir cidlaa,

Galin iyo badh bay
Meel aan geed lahayn
Sida goray bakhtiyey
Gaadadda u taal,

Indhahoo gudhoo
Gal cas yeeshay iyo
Xubnahoo gubtoo
Go'bo dhiiga lahayn
Ehel goobayaa
Barqo gaaban helay,

Qoyskaa galbaday
Godka in aan la galo
Ayaan goosan laa
Haddii layga guro
Taladaan guntee;
Garanwaa ka hadhay
Reer guurayoo
La guhaaddiyoo
Cidna gacalo tabin
Nasiib ii gartaa
Igu giijay xadhig.

Dunidan, waxa jooga dumar aan waligood noolan doonin, waa dumar noloshooda qaxarka duniddu ka xaday. Waxay nolosheedu dhammaatay intii ayna bilaabmin ka hor. Waligeed may helin kansho ay wax ku doorato, ma jiro mustaqbal u hadhay oo ay naawisho, ma jirto daqiiqado ay farxad la muunsooto, ma jirto cid ay rabto in ay noqoto, iyo meel ay hiigsato.

Gabadhan, qisadeedu waxay dhammaatay iyadda oo aan dhab ahaan bilaabmin, waligeed ma hor istaagi doonta muraayada iyadda oo gacanta ku haysa labo toob oo kale duwan oo ku muransan midka ay u xidhan doonto cawayska ay saaxiibadeed u raacayso. Waligeed lama fadhiisan doonto dumar ay jeceshay miis ku yaala maqaaxi camiran oo kalama doodi doonto ragga, lacagta, shaqada iyo jacaylka. Waligeed ma safri doonto.

Waligeed wax uma jeclaan doonta sida gabadha xorta ahi wax u jeclaato. Waligeed inta ay ka fakarto, isma waydiin doonto in ninka ay la joogtaa mudan yahay dareenkeeda, jidhkeeda iyo mustaqbalkeeda. Waligeed kama gorgortami doonto mushaarka, ma baddeli doonto shaqada ay qabato. Waligeed, subax barqo ah inta ay cadceedda fadhiisto, oo labada gacmood isi saato, oo ay kursi raaxo leh dib ugu jiifsato, si qaneeco leh uguma odhan doonto nafteeda; hagaag, noloshan bilan anigaa dhistay!

Sababtoo ah; sannado badan ka hor, labadii kun iyo afar iyo tabankii, waxa ay ka mid ahayd 272 hablood oo da'doodu u dhaxayso 16 ilaa 18 sanno oo argagaxisada Bako Haram ee ka dagaalanta dalka Najeeriya afduubatay, kama mid ahayn midhadhkii nasiibka lahaa ee ciidanka dalku badbaadiyay, iyo kuwii ka baxsaday markii la rarayey. Dib uguma soo noqon qoyskeeda, mana helin noloshii ay heli lahayd.

Waxay ahayd inan yar oo dugsi dhigata, gabadh yar oo rejo leh. Gabadh yar oo han leh, maalin qudha ayay nolosheeda ku burburiyeen, sidii caqligoodu u madoobaa ayay u madoobeeyeen aayaheeda, mana dhalan gabadhii ay rajaynaysay in ay maalin uun noqoto. Nin ayna waligeed doorateen ayaa ku qasbay guur iyo hooyonnimo, jidhkeedi wuxuu la cayn noqday dawlad caddow qabsaday, maalmaheedii waxay isu baddeleen silic.

Waa baa ugu baryey nolol ayna dooran, waxay daryeeshaa ubad lagu qasbay in ay dhasho, si walba oo ay macno ugu samayn karto ayay ugu raadisaa noloshan sidii xukun lagu riday.

Sida muuqata waligeed ma safri doonto, ma dhisan doonto xirfad shaqo, kuma noolaan doonto magaalo ay dooratay. Waayaha iyo qulqulka nololeed waxba kama baran doonto oo nafteeda ma dhisi doonto sida dadka xorta ah sameeyaan, wax kaste oo nolosha aaddanaha qiimo iyo riyaaq u yeelayay, nolosheeda way daayeen.

Sannad walba, maalinta haweenka aduunka, waxaynu xusnaa guulaha haweenka xaqooda u dagaalamaya. Waxaynu miidhiyaha soo dhignaa xikmado aynu ku dhiirigellinayno nafaheenna iyo haweenka kaleba ee horumarka ka gaadhay duni-raggeedan. Laakiin, dhanka kale, waxa jooga hablo yar yar oo noloshooda la aasay iyagga oo aan sawirba ka helin sidii ay ugu noolaan lahaayeen. Dumar aan waligood helin jaanis ay wax ku doortaan, hablo noqon lahaa; injineero, macallimiin, qoraayo, farshaxanyahano ama gabadh caadi ah oo ku nool nolol ay ku qanacsantahay; nasiibxumo, waa la hayste!

Adiguna, cawadaada calanka leh e, waxa aad bixi kartaa marka aad rabto, waxa aad tagi kartaa halkii aad rabto, waxa aad dhisan kartaa xirfada aad rabto. Waxa aad go'aamin kartaa halka aad ku noolaanayso, cidda jidhkaaga taaban karta iyo qofka aan waligii u soo dhawaanaynin. Waxa aad go'aamin kartaa in aad guursanayo, iyo in aadan rabinba! Cidda aad guursanayso iyo qofka aadan u dhawaanaynin.

Waxaad haysataa awoodii ugu weyn ee aaddamuhu heli karo; awooda doorashada nolosha aad rabto. Sidaas oo ay tahay, dumar badan ayaa awooddaas si tabarucaad ah uga tanaasulay, waxay ku qanceen xidhiidho caarcaariya iyo riyooyin ka yar kuwii ay beri lahaan jireen. Waxay aqbaleen in ay si yar si yar xoriyadooda u dhiibaan illaa ay nolosheedi xabsi ku noqotay.

Waxa jirta gabadh wax walba siisan lahayd khiyaarka aad sida caadiga ah ula dhaqanto, si ay u gaadho halka aad joogto. Haddaad rabto in aad sharafto, gabadhaas, ha khasaarin xorriyada ay dayaceen, qaarkoodana ayna waligood helin. Ku dhiso nolol qiimo badan sannadaha aad nooshahay, ugu noolow noloshaada si qiimo leh.

WQ: Anita Damina

WT: Halgan Daahir

Waxa aan booqday saddex maktabadood oo ku yaala caasimada Soomaalilaan ee Hargaysa, kuwaas oo ah kuwa ugu waaweyn ee hadda furan (Iqra books, Hiil press iyo Sahan books) iyada oo ujeedkaygu ahaa indha-indhaynta waxsoosaarka qoraal ee haweenka af Soomaaliga wax ku qora. In kasta oo aan horre u ogaa fashilka qoraal ee haweenka haysta, haddana, galabtaas, waxa aan soo noqday, aniga oo aan hellin hal buug oo u qalma in aan iibsado! Akhrista ahaan, qoraa igu cusub buuggiisa waxaan u gataa, 1) in mawduuc aan xiiseeyo uu wax ka qoray. 2) In cinwaanka ama mawduuca buuggu i soo jiito oo ay igu qasabto in aan ka war keeno. 3) iyo in saaxiib aan xulashadiisa ku kalsoonahay ii tilmaamo.

Buugta haweenka ee aan ku arkay maktabadahaas waa kuwo kugu qasbaya in aanad dib u jaleecin. Judha aad maktabadahaas cagta saarto ee aad buugta xayeeshka ah ee meesha wadhan indhaha mariso, kuwa ugu liita, magaca gabdheed baa ku hoos qoran. Tusaale ahaan; Ha Quusan, oo aad moodo in qof niyad jabsani isku tukubinayo, Jacaylkaygii Waan Helay, oo kugu odhanaya; haasaawe xaaraan ah baa jira ee u wayso qaado shukaansiga. Waxaad Tahay Boqorad, oo aan is idhi; inan iska shakiday baa boodhka iskaga jafaysa, iyo kuwa aan dhaamin oo badan ayay hablo qoreen. Waxa aan la soo noqday hungo tii hore ka weyn, waxa aan yaqiinsaday in curintii haweenku curyaantay, in caqligii haweenku gudhay, in qalinkii haweenku dhintay isaga oo aan dhalan. Baaqani waa farriin lexjeclo oo aan u dirayo haweenka fekera.

Weli muu dhallan kacdoon qoraal oo haweenka Soomaalidu arrimahooda ku gorfeeyaan. Waanna arrin ay tahay in ay mar uun dhacdo- ha fogaato ama ha dhawaato e, maxaa yeelay, arrimaha dumarku maaha muran u dhaxeeya ragga iyo dumarka, ee waa arrin bulsho oo u baahan in si xeeldheer loo gorfeeyo. Waa arrin aan ka maarmaynin maan fakaray, iyo qalin xogogaal ah. Hase ahaatee, dhabadii qalinka haweenku ku bilowday, maalin kaste wax aad u weyn baa ka sii dhaca, qoraalladii ugu horreeyay ee haweenku af Soomaali ku qoro, waxay ahaayeen kuwo dhaadan dhibta dumarka oo cod u ah. Tusaale ahaan, xagaagii 1993 waxa wargayskii Hal-door ku daabacday qoraal soo koobaya oo tilmaamaya kaalinta haweenku suugaanta ku leeyahay ah, Saynab Maxamed Jaamac, wuxuu ciwaanka qoraalku ahaa, 'cod la dhegaysan la'yahay'. Dhawr sanno uun ka hor, 1990 ayay Hanna Cali daabacday buug ka mid buugta kooban ee gabadh Soomaali ahi ku qortay af Soomaali, 'Sheekada Noloshayda'. Waa sheekooyin ururis ah oo ay kaga warramayso waayaha gabdho Soomaali ah. Intaa wixii ka danbeeyay, buuggaagta haweenku af Soomaali ku qoro, waxay noqdeen tusbax furan oo bilaa tayo ah.

Lama qorin buuggag naqdi ah, oo wax iska waydiinaya sida fooshaxun ee naagnimada loo qeexay, lama qorin taariikhda haldoorkii haweenka. Marka laga reebo Dr. Xaawa Cabdi, iyo Dr. Adna Aadan, oo nasiibxumo labaduba luuqad qalaad ku qoran, walina aan la soo turjumin. Iyo sidoo kale, labada diiwaan maanso ee abwaanad Xaawa Jibriil (Saa waxay tidhi...) iyo abwaanad Nimco-gabaydo, (Maan rag aragtee, maskax dumar dhawr). Sannadkii tagay ee 2025 ayay Nimco Cabdi Cali soo saartay buuggii koobaad- inta aan ogahay, ee af Soomaali ku qoran ee dhiiga caaddada iyo isbeddelka jidheed ee gabadha ka warrama, (Laxanka gudaha.). Dumarku weli ma fakarin, weli hurdadda kama kicin, weli la isma waydiin su'aallo muhim ah. Tusaale ahaan, maxaynu u baranaa haldoorka ragga oo qudha ee aasay haldoorkii dumarka? Haddii aan dumarku haldoor ba yeelan, maxaa hor istaagay?

Maaha in hanbada wadaadada fuuqsataan oo haweenka ku wacdisaan sida ragga loo adeeco iyaga oo aan aqoon sida nafahoodda loogu hadlo. Maaha in aad afka uga tagtaan "rag baan noo hadlin". Wax aynu innaguba samayn karno maaha in aynu ka sugno raggu in ay inoo sameeyaan. Waa dhab in ay jiraan caqabado badan oo haweenka horyaala, waa se wax la iska leexin karo. Inta ii muuqata caqabadahaas waxa kow ka ah; maktabado macaash doon ah oo aan wacyixumada ummadu gubaynin. Laba; qoraalka oo xero ragga u oodan noqday. Ogowna, ragga wax qora wacyi ma wada laha, akhlaaqna ma wada laha. Marar badan waxba ma dhaamaan kuwa aan waxba akhrin, wax kasta oo aad ninka caadiga ah kala kullanto ayaad kala kulmi kartaa ninka qoraaga ah. Saddex; ka go'naan la'aan. Dumar badan oo wax qora muhim uma arkaan in ay wax qoraan, oo dedaalka uu mudan yahay ma galiyaan, waa wax ay jecel yihiin oo ay marmar qabtaan, ama xaalad markaas jirta ku kalifto. Afar; dhaqaale xumo, ragga qaarba la qaba! Sida aan hore u sheegay se, waa wax la iska hor leexin karo, oo aan inna joojin karin haddii aynu soconayno.

Baaqaygu wuxuu yahay; jidka qoraalka haweenku hayaa waa ku halis aayaheenna. Waxba kuma soo kordhinayo maankeenna, xal uma dhalin karo mushkiladaheenna, waa in aynaan runta is kala gaban. Sida aynnu wax u wadnaa wax ka baddel weyn bay u baahantahay, ha la fakaro!

Cutubyada diiwaanku waxay isa ga tallaabaan mawduucyada dumarka, carruurta, jacaylka, nafta iyo waddanka.

Ka la deg: https://t.me/visonarypress

Sida oo kale waxa aad ka la degi kartaa Google Drive-kan:

https://drive.google.com/file/d/1RRcPIKD6bcgdeBe74qXhROV1zWIO5RAh/view?usp=sharing

Haddii lay geeyo duni aan tan ahayn, oo layga warraysto duniddii aan ka imi, waxaan u sheegi lahaa; in halkii aan ka imi noloshu xaaraan ahayd oo geeridu xalaal ahayd, in beentu ka awood badnayd runta, in laga dhici jiray hadalka dhabta ah, in dadku jeclaa in uu u muuqdo dad wanaagsan, oo uu necbaa in uu noqdo dad wanaagsan.

Haddii aan duni kale tago, waxa aan u sheegi lahaa; in nolosha dhalanteed loo yaqaanay, maaha in la dhimanayo oo ay dunnidu kooban tahay, ee waa in masuuliyadaheedda laga cararrayay, waxaan u sheegi lahaa; in qof kaste rabay in bogagga taariikhdu tusto xitaa haddii bogaasi u qori doonaan "kii duniddu ka nasatay".

Haddii aan tago, waxa aan kor u odhan lahaa, waxa kaste oo lay diiday in aan caadi u yidhaahdo. Haddii aan tago duni aan duniddan ahayn, haddii aan barto dad aan dadkan ahayn, haddii aan dhagaysto muusig aan muusigan ahayn, haddii aan jeclaado nin aan ninkii ahayn, cawadayda calanka leh e, waxaan odhan lahaa; hadday nololi jirtaa.

Haddii lay baro luuqad aan luuqadan ahayn, waxaan xasuusnaan lahaa "waan ku jeclahay' 'waan kaa helay' 'waan kuu bogay' 'waan kugu farxay' 'waan kula jiraa'. Haddii layga masaxo wax kaste oo aan xasuusnahay, waxa aan la hadhi lahaa; habsiinta ninkaan jeclaa. Haddii aan barto bashar kale, waxa aan xulan lahaa; dad waayaha samir u leh, wanaaga laab u leh, ballanta fullin u leh, noloshanna dhab u ah.

Haddii aan riyaado, waxa aan ku riyoon lahaa; dhul barwaaqo ah oo basharku is jecel yahay, dhul samaantu sarrayso oo kalgacalku awood leeyahay, dhul lays cafiyo, dhul laysu tudho, dhul lays dhawrto, dhul aan qofna qof caaro dheerayn, dhul la nool yahay ee aan la moodin in la nool yahay. Haddii aan noolaan lahaa, waxaan ku noolan lahaa; dhul webiyo leh, buuralay ah oo cagaaran. Waxaan la noolaan lahaa; dad jaasa, dad kaftama, dad doodda, dad heesa, dad gabaya, dad wax akhriya, dad wax qora, dad dhab hadla, dad laab xaadhan oo eraygoodu i beerlulo.

Haddii aan cabsado, waxa aan ka baqi lahaa; illinta qof i jecel, hungada ballan aan qaaday, dhaawaca eraygaygu gaysto, iyo, taabashada nabarrada dadka kale.

Haddii aan guursan lahaa, waxa aan guursan lahaa; nin samaanta u jecel sida uu ii jecel yahay, oo jacaylka u jecel sida uu naftiisa u jecel yahay, nin aan talin ee la la tashado. Haddii se aan dhinto, wax aan dhimayaa aniga oo aan gef u badheedhin, gardarro u hiilin, cidna goddob ka gellin.

Hayaanka xuquuqraadinta ee haweenku, wuxuu u-eegayahay maqaarsaar gabadha xildoonka ahi ku-awr-kacsato. Waxa uu ku aruuray ka warranka gudniinka firsooniga ah, iyo, matalaada haweenka ee maqan. Waa labo arrin oo mudan in laga hadlo, waa xaq ay tahay in ay hellaan, iyo xadgudub ay tahay in laga daayo haweenka. Waa in gabadhu talada dhulkeeda ka qayb noqotaa, oo abuurta jidhkeeda farraha looga daayaa, hase ahaatee, waxa is waydiin leh, waxa haweenka ka maqan ma labadaa arrin baa? Muxuu yahay ujeedka xuquuqraadinta ee haweenku? Ma in gabadhu ninka la sinnaato mise in gabadha iyo ninkuba, fursadaha nololeed u-sinnaadaan? Haddii la rabo in gabadhu ninka la sinnaato, gabadhu ninkee bay la sinnaanaysaa ilayn raggu ma wada sinna e?! Ma Gabooyaha la hayb-sooco, mise Jareerka haybtiisa lagu caayo, mise laandheeraha tuug ah? Ujaaddada hayaakani, ma in gabadha waxbaratay ee shaqaysaa hesho waxa iyadda ka maqan ee xilka ah baa? Mise in adeegtada gabadhaas guriga uga shaqaysaa hesho mushaar ku filan, meel ku habboon oo ay ku noolaato, iyo fursado ka caawiya sidii ay noloshaas uga bixi lahayd baa? Horta maxaa innaga maqan ee aynu raadinaynaa?!

Curiskan, waxa aynu kaga sheekaynaynaa caddaynta xaqa maqan ee haweenka Soomaalida. Waxa aynu u kala qaadnay saddex qaybood oo mid walba aynu fallaqayn doono. (1) Nadaam dafirsan; matalaada siyaasadda, shaqada, waxbarashada, iyo tacliinta sarre. (2) Dhaqan labeed; tusaalaynta xun, haldoorla'aan, hagrashada iyo quudhsiga gabadha. (3) jiraal la'aan shikhsiyeed; xukumida, go'aan la'aanta nololeed, caadiyaynta xadgudubka haweenka.

1: Nadaam dafirsan.

Xeerka jinsiyaddaha ee Soomaalilaan waxa uu dhigayaa in ay gabadhu waayayso muwaadinnimadeedda haddii ninkeedu fikir ku lid ah jiritaanka Soomaalilaan aamino. Waxa aan is waydiiyay, Soomaalilaannimadu ma u dhalashaa mise waa aaminaad? Gabadha xabashidda ah ee Itoobiya deggan, haddii ay aaminsan tahay dalnimada Soomaalilaan, ma muwaadinad baa? Ta kale, haddii waxa la diidan yahay tahay fikirka qofka, maxaa loo odhan waayay "gabadha aaminsan fikir ku lid ah jiritaanka dalka" ee muwaadinnimada gabadha loogu xidhay, waxa ninkeedu aaminsanyahay ama aanu aaminsanayn? Soomaalilaan, miyayna ahayn dal leh dhul cayim oo ay leeyihiin inta dhulkaas degta? Dabcan, waxa se mushkiladu tahay, waxa aan la kala gurin dhaqankii Soomaalida ee dhaxdinta ahaa iyo u-dhalashada dalka. Qofku waxa uu muwaadin ka yahay dalka uu ku dhashay ama uu ku nool yahay ee uu aqoonsi ka haysto, waa xaq qofka iyo dawladdiisa ka dhexeeya, in xaqaas go'aaminteeda cid kale la siiyo waa fashil dawladdeed iyo xadgudub cad. Soomaalilaan, waa dawlad dumarkeeda u aqoonsan dhaxdin ciddii ka guursata go'aamiso dhalashadeedda, oo adiga oo u agoomoobay dib-u-xorayntii dalka ayaan ubadkaagu qaadan karin dhalashada DALKAAGA!

Qodobkan, asalkiisu yahay dhaqanka gabadha u yaqaanna qof loo taliyo, ee aan dawladnimada khusaynin, waxa uu si toos ah uga muuqdaa sida ay xukumaddihii kala danbeeyay ula dhaqmeen dumarka. Lixdii xukumadood ee Soomaalilaan soo maray (Cabdiraxmaan Cali Tuur 1991-93. Maxamed Xaaji Cigaal, 1993- 2002. Daahir Riyaale Kaahin, 2002- 2010. Axmed Siilaanyo, 2010- 2017. Muuse Biixi, 2017-2024. iyo Cabdiraxmaan Cirro) tiro aad u yar baa wasiirro noqotay, xukumada hadda joogta oo ku ollaysay in ay 30% kor u qaadi doonto kaalmaha haweenka, saddex dumar ah baa wasiirro ah! Galaha guurtida oo ka kooban 82 mudane, hal gabadh oo dhaxashay baa ku jirta. Gobalada dalka oo dhan saddex dumar ah baa xildhibaan ah oo doorashadii golaha deegaanka ku soo baxay, wali ma dhicin in hal gabadhi noqoto garsoore maxkamadeed. Soomaalilaan, haweenka ugu badan ee u shaqeeya dawladda 84%, waxay qabtaan nadaafada. Dugsiyada sarre iyo jaamacaddaha tiro aad u yar baa ka shaqaysa,19%. Meelo badan haweenku wuxuu qaataa mushaar ka yar ka ragga ay isku shaqada qabtaan qaataan. Sidaas daraadeed, ka fiirsan mayso in la helo haween u xil doonta si ay wax uga qabtaan xaaladda qalafsan ee haweenka Soomaalilaan waajahayaan, oo aan ku xildoonan kaalmihii dumarka ayaa maqan.

2: Dhaqan labeed.

Bulsho ninaysan oo naagnimadu ceeb la tahay baynu ku dhex noolnahay. Dabadeed, fikirka, hab dhaqanka, hadalka, socodka iyo adeegsiga erayaduba way laboobeen. Haddii aad si deggan u socoto "maxaad la hunuushin, ma naag baad tahay?" Ayaa lagu gu cannaanayn. Haddii aad si dabacsan u hadasho, "sidii naagaha ayaad u hadli" waana ceeb! Halbeega laysku eegayaa waa ninnimo, waxa ninka dhiba ayaa dhib ah. Waxa guul ninka u ah baa guul ah. Wuxuu ninku diido ayaa xumaan ah, wixii ninka u dan ah baa samaan ah. Arrintaas baa dhasha in damaqa gabadha la yarasto, oo waxa gabadha dhiba aan dhib aad ah loo arkin. Tusaale ahaan, gabadh yar oo toban jir ah baa la guursaday; waa caadi! Inan baa la kufsaday, waa caadi. Gabadh baa ninkeedi dilay, waa caadi. Hooyo ayaa ubad la silcaysa, waa caadi. Gabadh baa la shirqoolay, waa caadi. Gabadh baa wacadkeedi laga baxay oo la la guursaday, waa caadi. LAAKIIN, nin baa nin dilay; ha loo aaro! Nin baa la shirqoolay; xeer rag maaha. Nin baa naagi ka tagtay; naaguhu wacad ma leh. Nin baa gabadhi dishay; ha loo dilo! Sow uma jeedid, luuqada aynu ku qaabilo dhibta ninka ku dhacda, iyo ta gabadha ku dhacda way kala duwan tahay. Waayo, maxaa midna caadi ka dhigay, midna denbiga ka dhigay? Damaqa ay dareento gabadha la la guursaday, miyuu ka yar yahay ka uu dareemo ninka ay ka tagtay naagtuu jeclaa? Maxaa midna xanuunka aynu ugu naqaanaa, midna waxa ISKA caadiga ah? Sababtoo ah, wixii dhib ah ama aan ahayn waxa sheega ninka, ninkuna tiisa ayuu ka warramaa, taas ayaana noqotay halbeeg bulsheed. Waxa caadiyowday wax kaste oo gabadha dhiba, oo waxa xumaan noqotay wax kaste oo ninka cadho gelliya xitaa haddii ayna xumaan ahayn.

Waxyaabo badan waxa wax looga qabtaa in ay ragga ceeb ku yihiin, maaha in ay dumarka dhib ku yihiin. Mar walba ninka ayaa ah ubucda ay biyo gororay isugu yimaadaan, tusaale ahaan, kufsiga. Marka, inan la kufsado waxa loo guuriyaa ninkii kufsaday. Sabab? Sababtoo ah, waxa laga fakarayaa SHAFARTA nimanka la dhashay ee maaha dhibbanaha caawinta u baahan. Hab fikirkan baynu u baahanahay in wax laga baddelo, waa in dhibta gabadha loo arkaa sida ay dhib u tahay oo wax laga qabtaa, maaha in loo tartarmo u cudurdaarida denbiilayaasha.

Ninnimadu waxay noqotay muraayad naagnimada laga dhex daawado. Waxaad moodaa in gabadh kaste uu ku dhexjiro nin u sheega sida ay tahay in ay naag u ahaato. Dookhii ninka ee ay ahayd in uu wax iska caadi ah noqdo ayaa halbeeg naagnimo noqday, tusaale ahaan, waxay ahayd in ay wax iska caadi ah noqoto in ragga qaar ka helo, dumarka cunto karinta ku fiican, ama dumarka cadcad, may ahayn in aynu naagnimo ka dhex raadino waxa ninku ka helo ama aanu ka helin. Miyaynaan lahayn jiraal ka baxsan, waxa ninku ka helo? Maxaa isku sidkay naagnimada iyo doonida ninka? Naagnimadu ma wax ninka loo yahay baa, mise waa jiraal ka madax banaan rabida ninka? Maxaynu naagnimada uga raadinaa, waxa ninku naagnimada u malaynayo?

Haweenku malaha haldoor ka madax banaan si-u-araga ragga. Waddo kaste oo gabadha ka dhigi lahayd waxgarad umaddeedna, waa laga awdaa. Dabadeed, si quudhsi leh baa loo dhahaa "haweenku haldoor ma leh" yaa haldoor ah, horta? Raggii waxbarashada loo diray, inta hablahooda loo diiday in ay wax dhigtaan. Inankii yaraa ee walaashii lagu qasbay in ay cuntada u diyaariso ayaa meel walba mikirifoon la taagan oo leh "dumarku garasho ma leh, waayo dhe? Intii ay wax baran lahaayeen in ay cuntada noo diyaariyaan ayay ku qasbanaayeen!" Iyaga ayaa abuura in haweenku aanu si hagaagsan u fakarin.

Dhaqankani, waa ku ninka jaahilka ah u dan ah, oo naag kaste u dil ah. Waa dhaqan waxtarkeenna quudhsada, caqligeenna caaya, gobbannimadeena yasa, halabuurkeena xaqira, kartideena yareeya, fikirkeenna jaanjaama. Waa dhaqan, wax walba oo naag u gaar ah ceebsada! Xaydku waa ceeb, uurku waa wax laga khajilo, carmalnimadu waa ceeb. Waa dhaqan dhibteenna u arka wax ka yar dhib! Dhaqanku wuxuu abuuray rag inoo arka wax ka yar dad oo ay ka caqli iyo garasho badan yihiin. Waxaynu u baahanahay in ay dib u qeexno, sida ina matalaysa ee ay tahay in naagnimada loo arko, oo loo la dhaqmo.

3: Jiraal la'aan shikhsi ah.

Noloshu ma u baahantahay in wax la barto, la shaqaysto, la safro-- si aqoon, waaya-arragnimo, iyo xeelado nololeedba loo kordhisto? Haddaba, waxa noloshu u baahantahay, maxaa gabadha loogu diidaa? Maxaynu uga doodnaa; gabadhu ma shaqaysan kartaa? Wax ma baran kartaa? Ma safri kartaa? Innaga oo og intaasba in ayna noloshu ka maarmin! Maxaa basarxumada ninka gabadha loogu dabraa, iyada oo ninka akhlaaqda la bari karo? Maxaa iyadda oo wiilka shan iyo toban jirka ah la bari karo in ay ka nabad helleen hablaha wadadda maraya, oo aanu xaq u helayn in uu jidhkeeda taabto, inanta looga joojiyaa dhexgalka bulsheed ee ay xaqa u leedahay? Ka soo qaad in aad nin tahay, adiga oo wado maraya haddii gabadhi dabadda kaa dhirbaaxdo, ma in dabbo la dhirbaaxo kugu taalo ayaa khalad ah mise in qof basarxumi jidhkaaga taabtay? Siddee loo aqbalay, basarxumada inankayga ayay inantaadu ku aayaseegaysaa? Qofka inankiisa aan basrin karin, inantiisa miyuu ka adag yahay mise wuu basrin karaa? Waxaynu nahay bulsho gabadhaha ka adag oo basarxun!

Bulshadani waxay ku fashilantay basrinta wiilasheeda oo waxay ku guulaystay cabudhinta hablaheedda. Sidaas daraadeed, waa in loo halgamaa basrinta ragga iyo xorraynta haweenka. Maxaa yeelay, cudurka kaa gala fardaha dameeraha lagama gubo. Looma sheegi karo rag basarxun xaqa haweenka, waayo; basarla'aani waa garasho la'aan.

Haweenku ma laha jiraal ka madax bannaan rabitaanka ninka. Marada ay xidhanayso illaa heerka ay nolosha ka gaadhayso, waxa go'aaminaya ninka, iyo nadaamka nimaysan. Malaha doorasho ka madax bannaan waxa ninku ogal yahay ama aanu ogalayn. Haddii aad hal dirac leedahay, xor uma tihid in aad xidhato ama aad iska dayso ee waad ku qasbantahay in aad xidhato. Sida aynu u nool nahay waa hab aynu ku qasbanaanayn in aynu qaayibno ee maaha si aynu xor u nahay. Gabadha foolanaysa ee qaliinka noqota in ay badbaado ama isku dhimato, waxa go'aaminaysa in ninkeedu saxeexo ama aanu saxeexin. Inanta yari in ay waxbarato ama ayna baran waxa go'aaminaysa in aabbaheed ogalaado ama aanu ogalaan, sababtoo ah, gabadhu malaha jiritaan ka madax banaan doonida ninka.

Waxa laga yaabaa in aad doonayso, waxa aad diidayso oo Arraweelo waa tii idin tidhi "Dumaroow, waxa aad doonaysaan diiday dhaha" waxa kale oo suuragal ah sidii odaygii ku maahmaahay in aan dumarka la waydiin waxa ay doonayaan, sababtoo ah; waa carruur oo caqli ma leh. Sidaas buu had iyo jeer, ku caqlirogani ku murmaa. Waxa ay la tahay in dumarku yahay sida ay isaga la yihiin, waxa se uu xiganayaa hadalo uu yidhi nin sidiisa garashoxun. Waxa mudan markaa in kor loogu sheego: caqlixumada ragga looma daliishan karo jiraalka naagaha.

Qofka marka la yaso diidmadiisa, waxa la caadiyaynayaa dhibkiisa. Haweenka, waxa laga dhigaa dad dhimandhiman ah oo aan hagaag u noolaan karin ee ay tahay in wax kaste lagu sameeyo si loo tarbideeyo, tusaale ahaan, inanku walaashii wuu ku dilaa karaa, waxa uu u arkay "maryo aan habboonayn" oo ay xidhatay, ninku gabadhiisa wuu kufsan karaa, mar ay samaysay " amardiido" waxa uu ku sheegay, aabbuhu inantiisa wuu qudhgoyn karaa, mana jirto maxkamad u dilaysa; sabab? Waa caadi in gabadhu silicdo, ha la dhimato ama ha la noolaato e.

Haddaba, maxay caadi u tahay in gabadha la yaso, in caqligeeda la caayo, in loo diido waxa ay rabto, in la qasbo, in la kufsado, in aan la dhegaysan cabashadeedda? Gabadhu miyayna ka mid ahayn bila'aaddamka la sharfay? Miyaan nafta gabadhu ka mid ahayn, nafaha ay tahay in la ilaaliyo? Haddii gabadha loo diido waxa ay rabto, siddee loo odhan karaa, ma taqaan waxa ay rabto?

Ka warran, haddii dheg lagaa jaro, oo adiga oo dhiigbaxaya aad dhakhtar tago, dabadeed, dhakhtarkii aad dawada u doonatay kugu yidhaahdo "qofyohow, dhegta go'anle naga qarso ceebtaada!" Maxaad samayn lahayn? Si sidaas la cayn ah baa haweenka loo la dhaqmaa, inta la dilo ayaa la yidhaahdaa "naga qarso ceebta lagu gu dilay!" Maxay tahay ceebta lagu dilay? In ayna samayn waxa ninku ka rabay in ay samayso.

Marka jiraalka qayb ka mida dadku noqdo wax ku xidhan riyaga inta kale, waxa kaliya ee furan waa iska caabin. Haddii aadan rabin in aad dhegaysato dhibta haweenka, iska sii soco inta aanu kaaga hor imanayno jidka aad hayso. Maxaa yeelay, waxa aadan suuraysan karin ma fahmi kartid. Xanuunka gabadha, ninku ma suuraysan karo, mana fahmi karo, mana rabo in ay fahansiiso. Sababtaas ayay muhim u tahay in haweenku HADLO.

Siday tahay kolka laguu dooro cidda aad guursanayso, halka aad tagayso, marada aad xidhanayso iyo, cidda aad la hadli karto? Ka warran, marka aad galmo samaynayso adigoo dareemaya in waran jidhkaaga la gellinayo ee aadan diiddi karin?! Siday u eegtahay, kolka laguu dooro nin aan dookhaaga ahayn ee waxbarashada lagaa ga reebo, ee adiga oo afar dhalay uu ku furo ee lagu gu ceebsado? Marka laguu diido in aad nolol dhisto ee lagugu caayo burburka taladoodda. Bal sawir, waa siddee marka dawladaaddu ku diido, ee dadka aad dusha ku sidaa ku quudhsato? Waa siddee, marka wiilkaaga aad dayaca ku korisay kuu arko qof ka caqli liita? Waa siddee, marka adiga oo qoyskaaga la fadhiya aad dareemayso in aan ban cidlo ah joogto? Waa siddee, nolol la'aanta aynu ku noolnahay?!

Marka, war dhafoor buu ku yaalaa, wax lagu qaadan waayo, sow qof aan hadal habartiina wax ma siiso maaha. Bal haddaba, kor u dhe wixii aad hoos u dhigi jirtay.

Wax walba ayaa ragga lagu raaca, haddii uu ku yaahdho, "caqligaagu waa haaf" "subxaan allaah, waaba rubuc" ayaad odhan. Haddii uu ku dhaho "ma talin kartid" "subxaan allaah, ilaahay ayaaba ii diiday" ayaad odhan. Haddii uu ku yaadhdo, "in aan kugu raaxaysto ayaa laguu abuuray" "subxaan allaah, xurrulcayna way kuu danbaysaa" ayaad odhan. Haddii uu ku yaahdo "hooyadaa ha u tagin" "subxaan allaah, adigaa ka xaq badan" ayaad odhan.

Ma haddii kale? Waa in aad ragga u caddaysaa in aad naag xorra tahay, sidee? Haacoo kaste la seexo, khuraafaadkooda la waafaq. Mar kaste oo uu hataataco si aanu isu maqlin iska qosal, wax aadan fahmin ku raac, isdoqomaysii oo sida carruurta u hadal. Marka aad ragga la joogto, caqliga dabada gasho oo dabada wejiga saaro!  Iska garo, ninka aan ku damcin waxbaa ka si ah. Sabab? Dee miyaanu Waraabe ahayn? Muxuu kuu cuni waayay, haddii aan ragganimadiisa wax ka waxaysanayn?

Ma si kale? Haddaba, boorso weyn garabka saaro oo marba shirweyne ka qaybgal. Boodh afqalaad ku qoran ha kaa danbeeyo, afsoomaaliga xidhiidhiyayaal uun ka dhigo, "waa in protection system oo lagu keep-gareeyo clitoris-ka la dhiso." Si aad naag wax fahantay isaga dhigto, u arag Soomaaliga af liita oo aan waxba lagu qori karin, miyaad wax qortaa? Maya, waxa se muhimka ah; waa in aad dhaliil hayso.

Had iyo jeer, haweenka kale maag oo ku canaano in iyagu halkaas isdhigeen oo lax walba shililka ay is dhigto lagu qalo. Quudhso oo hablaha aan shaqayn hoos u eeg, ka faan oo u arag in aad ka karti badan tahay haweenka aad ka fursad badan tahay, ka wiswis danyarta dawarsata oo kolka aad doonto cay. Sidaas buu haweenku shisheeyaha u jilaa, waa canjiladdo, midba cod gaar ah baa ku jira, ka dhegayso mawjadaha gaagaaban ee isyeelyeel.com.

Dumarku waa hub loo adeegsado dagaalka.

Dagaalka kaste, haweenku wuxuu ka dhaxlaa dhaawac nafeed, jidheed iyo mid maskaxeed oo aan buugta taariikhdu waligeed si buuxda u xusin. Sababtoo ah, taariikhdu waxay xustaa halyeyada "ragga" guushooda, ma xusto haweenka darraadood u dhaawacmay.

Dumarku, waa dhibbanaha koobaad ee dagaal kaste oo dunidda ka dhaca, waxa laga dhigtaa hub ay qalo kaste kula dagaalanto caddowgeeda. Waa la kufsadaa (iyadda oo loo arko hab laga ga aargudanayo caddowga. Marka, tusaale ahaan, gabadh la kufsado ee reerka uu ka soo jeedo ninka kufsaday ay diidaan in ay ninka soo qabtaan ama xaal bixiyaan, waxa loogu goodiyaa in hablahooda la kufsan doono! Marka, reeruhu isdilayaanna, qolo kaste waxay u aragtaa dumarka, hab ay reerka kale ku dhaawici karto.) Dumarka wax laga dhigtaa, wakhtiyada dagaalka, addoomo galmo.

Kufsiga, dumarka iyo carruurtu wuxuu ka mid yahay siyaasaddaha dagaalka ee ku aadan aayoxumaynta ummadaha. Waxa se la yaab leh, in carruurta iyo dumarkuba ayna ahayn kuwa dagaalka bilaaba, taasi se muhim maaha, marka ujeedku yahay farroxumaynta aayaha. Goobaha dagaalka, denbiga ay galleen haweenka iyo carruurtu; waa jiraalkooda!

Dunidda maanta, kufsiga wakhtiyada dagaalka waxa loo aqoonsanyahay denbi dagaal iyo xadgudub xuquuqda aaddanaha ka dhan ah, caddaalad se ma hellaan malyuumaadka la nool mahadhada dagaalka. Ma dhacdo, inta badan, in dhibbanayaasha dagaalku hellaan caddaalad, daryeel ama xitaa in loo ogaado dhibta ku dhacday oo la la damqado. Taa baddelkeeda, dagaal oogayaasha ayaa lagu tidcaa garraadooyin ammaan ah. Dhibbanayaasha kufsiga, waxa u dheer ceebayn, faquuq, iyo eedayn ay kala kulmaan bulshadoodda.

Warqad uu qoray askari Ilatariyaan ah; "Wiilashii Ilatariyow, waxaynu nahay geesiyaal, way innaga go'antahay in aynu tan "kufsiga" samayno, waynu na sii wadaynaa. Ma-dhalays baynu ka dhigaynaa haweenka Tigrayga, waxa inoo go'aan ah, in aynu kaga aargudano dagaalkii 1998". ( Waxay warqadani ku tusinaysaa sida kufsigu u yahay hub nimanka ku kala aargutaan, waxan iswaydiinayaa; imisa dumar ah baa loo kufsaday cadaawad reerkooda loo qabo, oo reerkoodu u guuriyay ninkii nacayb uu iyaga u qabo u kufsay?)

Tira-koobyada kufsigu afkala-qaad bay kugu ridiyaan, 250,000 ilaa 500,000 oo kun oo hablo yar yar iyo haween ah baa la kufsaday xasuuqii Ruwanda ee 1994. In ka badan 60,000 (lix boqol oo kun) ayaa la kufsaday dagaalkii Siiriya, dagaalkii Kongo ee 1996-diina, ku dhawaad 200,000 oo kun oo carruur iyo dumar u badan ayaa lagu kufsaday.

Dagaalkii koobaad ee dunidda, hortii iyo intii lagu jirayba, 1932 ilaa 1945, waxa jiray haween u xidhnaa ciidankii Jabaaniiska. Haweenkaas, si joogto ah bay u kufsan jireen, u dili jireen, in badan oo ka mid ahina ciqaabtooda ayay u dhinteen. Waxa jirta macnayn qariban oo taahda "isku-xasilinta naagta" oo la macno ah; in galmada shiidaal looga dhigo, nin xumaan u tafoxidhan.

Dagaalkii sukeeye ee Soomaalida- iyo kuwa hadda socdaba, dad badan baa loo dilay qabyaallad, dad badan baa qaxay. Haweenku se qabiil ma leh, dhibaatanna, waxa ugu filnayd jiraalkooda naagnimo. Waa la adoonsay, walax galmo ayaa laga dhigtay, kooxkoox baa loo kufsaday, lama se sheego. Waa qayb aan taariikhdeenna la xusin, waadna qiyaasi kartaa sababta aan loo xusin. Hadda, Koongo, Suudaan, Itoobiya, Kamaruun, iyo qaybo ka mid ah Soomaaliya ba, haweenku waxay wali waajahayaan argagax isku mid ah.

Dhibbanayaal badan waligood kama hadal wixii ku dhacay, dhaqamo badan (oo keenu u horreeyo) waxa loo arkaa kufsiga ceeb gabadhu reerka u keentay. Waxa loo arkaa danbiilayaal, halkii ay ahayd in loo arko, sida ay yihiin oo ah dhibbanayaal ay tahay in caawintooda loo gurmado. Sida aad ogtahayna, waa la qariyaa, waa loo diidaa si walba oo ay xogtooda ku sheegi karaan. Ma jiro nadaam dawladdeed oo u adeegga, iyo cid caawisa toonna; cidna uma maqna, ceelna uma qodna. Sidaas daraadeed, waxay ku qasbanaadeen in ay aamusnaadaan, waayo; hadalku wuxu uga baahan yahay nafhur. Waa in ay ka tanaasulaan wax kaste oo haystaan qoyskooda, halka ay bulshada kaga jiraan, sharaftooda, iyo, rejadda in ay dib u guursadaanba.

“Goobaha dagaalka in aad gabadh ahaato, ayaa ka khatar badan in aad askari qori sita noqoto. “

Qoomiyadaha aduunku way kala duwan yihiin. Waxay ka yimaadaan dhaqamo kala duwan, diimo kala duwan, iyo dalal kala duwan. Haddana, waxay ka siman yihiin, caadiyaynta xadgudubka haweenka. Waxa ugu aragaxa badani, waa marka argagaxaaga wax caadi ah laga dhigo. Dumarka, waxa lagu ciqaabay jiraalkooda.

WQ; Maimun Ahmed.

WT; Halgan Daahir.

() bishan-xidhan qoraalka aan kaliyay, waa sharaxayga.

Inta aad kiro la helayso qolkaaga, waa in aad indhaha ninka soo duwataa; isqaawi ama isdad muhim maaha taasi. Dookh aa! Ah, yaakhii, naagina iskeed isuma qurxiso, quruxda naagtu waxay ku jirtaa dibnaha ninka! Ma cid aan nin ahayn baa u sheegta waxa ay quruxdu tahay? Miyaad naag quruxdeeda sheegi kartaa adiga oo aan sheegin waxa uu ninku ka helo? Waa maya. Haddaba, kabaha ka warran? Waan arkaa, aad bay u dhaadheer yihiin oo u cidhib dhuuban yihiin, magaaladuna waa buuraley; dhib se malaha, wax muhimka ahi, waa in labada sal marba mid u dhaqaaqo sidii lax shilis oo la duduucayo.

Naagnimadu waa hirdan joogto ah, ka hawl yaraso, sida lagaa rabo yeel. Sidee lagaa rabaa? Waxa lagaa rabaa in wax walba laguu yeedhiyo, kaliya dhegayso. Sida loo socdo, sida loo hadlo, waxa lagu hadlo, waxa la xidho. Maxaa kaa dhiman? Garash..maya, taa ma lihid, innaga daa. Ma og tahay saabuun cusub baa soo baxday, waxa la yaahdaa "fakar" maskaxdaa lagu dhaqaa, laakiin, waa ta dhammayska ah; qabyada waxba looma hayo!

Socodku wuxu iiga dhigan yahay nolol.

Lugta waan jeclahay, haddii meel kaste oo aan rabo aan lug ku tagi karanna, waligay, gaadhi ma raaceen. Aduunka dhex mar oo sida oo u weyn yahay u fiirfiirso ama kor ka-soo-eeg oo sida uu u yar yahay la ammakaag, wax iigama dhaxeeyeen. Waayo, labaaddaasi, dhadhansi bay leeyihiin, ama ugu yaraan, way iga fakarsiiyaan, kolka aad daruurraha dhexgasho ee dabbaqyadii aadka u dhaadheeraa qurrurux yar yar noqdaan, marka daruurruhu ku hoos maraan ee u eekaadaan kurro aad kaaga fog, marka aad ku fakarto, tusaale ahaan, haddii Ilaahay loo tagi lahaa, ma halkan baa diyaaradda la ga ga dagi? Imisa lacag ah baa tigidhka lagu goosan lahaa? Dad caynkee ah baa ka shaqayn lahaa? Ma shirkad qudha baa tagi lahayd? Dhar noocee ah baa loo xidhan lahaa? Ama, tolow, ruuxdu kolka ay kaa baxdo, ma wadaddan bay qaadaa?!

Marka aad cagtamaasho ee laydhu dhabanadda kaa garaacdo, kolka aad dareemayso in aad soconayso, ee cagta halka aad dhigayso aad isha ku hayso, marka, guuxa baabuurka, ci'da eyga, hugunka dadka, iyo, ruxanka geeddaha aad si isku mid ah u maqasho. Marka ay naftu si yar wax kuu tusto, eeg geedkaas, sida uu u xididdo badan ayay u badan yihiin waxa qofka qaabeeya, sannado kooban nafta kuma baranaysid; isdeji!

Marka aad la yaabo, sida dhagxaantu isu saarsaarran tahay, cidda dhagxaantan habaysay, maxay dadkan kala quban u habayn wayday? Ay naftu ku waydiiso, marka aad ka fakarto sababta ayna waxsan ba u odhan; ma anniga ayaan waxsan odhan mise wax aan waxsan ka dhaho ayaannan arag? Ay kaaga naxsato, ee aad iska aamusto.

Marka qof kaa soo horbaxay labiskaaga la yaabo, ee aad layaabto sababta qof abuurta la yaaban maryihiisa loo la yaabi karo. Dabadeed, yaabka is kala socoto. Marka ilmo yar oo wax ku waydiistay aad shillimaad u tuurto, ee sida ay suuragal u tahay in dadka qaar loo qoro in ay dabaqyo yeeshaan, kuwa kalenna, ay ku hoos dawarsadaan, aad ka fakarto.

Marka Indhaha kugu maqan aad ku baraarrugto, hareeraha daydo, gabadh baa agtaada fadhida, kartoon bay siddataa, lanbar baa ku qoran, way baahan tahay, iyadda may eegaan aad is taahdo, In naagaha xukunkooda la jecel yahay ee aan waxtarkooda xiiso loo qabin aad xasuusato ee iska socoto.

Socodka waan jeclahay, waayo; waan ku qoslaa, waan ku ooyaa, waan ku naxaa, waan ku jaasaa, waan ku fakaraa, waan ku dooddaa, waan ku murmaa. Socodka, waan is ku la yaabaa, waan isku caashaqaa, waan isku helaa, waan isku hiifaa. Socodku, wuxu i dareensiiyaa in aan noolahay, wuxu i xasuusiyaa in aan dunni joogo.

Haddii aan qof labo jeer la luggeeyo, waan caashaqaa ama waan nacaa, sababtoo ah, lugtu waa farshaxan, farshaxankanna fanaanka ayuun baa yaqaan. Aad bay iigu kala duwan yihiin marka aan hawl u baxo, iyo marka aan socod u baxo. Marka aan socod u baxo, kama helo dadka dheereeya, waayo, meelba uma socdo. Kama helo dadka hadalka badan, waayo kama fakari karo. Haddii aan nin jeclaan lahaa, fanka socodka ayaan ku caashaqi lahaa; aamus badan, u fiirfiirsi badan, iyo, kaftan goos goos ah.

Waan ka helaa ragga kolka ay soconayaan kuutiya, sidii in ay miisankooda dhulka ka dhawrayaan ama cagta ku qabanayaan wax ka baxsanaya; sanqadh li'i talaabada qaada. Wali se ma arag nin Soomaali ah oo caynkaa u socoda, waxbaa eryada, malahay nolosha baas! Socodka xasilloon wuxuu iiga dhigan yahay nolol xasilloon, qofka aan la socodkiisa ku xasillo, waa qof aan la jirkiisa ku xasillay.

Socoda!

Ragga qaar indhahooda ayaa macallin ah. Wax aan dibnuhu kuu sheegi karin ayay kuu sheegayaan, jaleecadooddu way kaa nixinaysaa. Waa sidii qof akhrinaya buug xasuuq dadweyne ku saabsan, waad ka jidhidhicoonaysaa. Marka ay dhalaannimadooddii kaaga warramaan, afkala-qaad bay kugu noqonaysaa, arxandarrada ay ku koreen. Raggu, aad bay u dhaawacan yihiin- badidoonna ima oga, waa qof dhiigbaxaya oo aan ogayn in uu dhiigbaxayo, hal mar buu sidii qaloof abbaaday u dhacayaa. Masuuliyaddo ka waaweyn baa garbaha u saraan, culayska ay ku hayso indhahooda tabcaanka ah baa kuu sheego. Waa wiilal yar yar, haddanna, aad bay u daalan yihiin, si bay luggaha u jiidaan, si quus ah. Noloshay ka qanceen, maya, waligood ma noolaan

Nimanka waan necbahay, waan jeclahay, waan ka baqaa, waan weheshadaa, waan dhibsadaa, waan ka helaa, waan maagaa, haddana, waan ammaanaa. Waa noole aan hal midab agtayda ka lahayn. Ma khusayso khuraafaadka naagaha laga sheego ee ah "naaguhu waxay doonayaan ma yaqaannaan" aad baan u aqaan wax aan rabo. Marka se aan waco nin aanu saaxibo nahay ee aan waydiisto in uu caawa ila lugayn karo, waxan la yaabaa, sida aan ninka nin uga weheshado! Cabsida aan ka qabo nin aannan waligay arag, iyo aamminaada aan ku qabo nin aan erayadiisa aqaano! Marka aan xasuusto se, in xero-nimeedka, raggu iska baqdaan oo is ixtiraamaan, waan isu cudurdaarraa.

Marka aan tago meheraddaha u gaarka ah, waa daqiiqadaha iigu ammakaaga iyo farxada badan. Waxan si isku mid ah u arkaa deeqsinnimadoodda, gacan-adkaantooda, aftahannimadooda, agnaannimadooda, aqoontooda, jahligoodda, isla qumannidoodda, isfahankoodda, basarkoodda, basarxumadoodda, quruxdoodda iyo foolxumadoodda. Wakhtiga badan ee ay dilayaan, balwadaha ay ku walfeen, iyo macnali'ida wadda sheekaysigoodu waa ifafaalaha aayoxumida soo maqiiqan.

Aad bay wax u xifdiyaan, canjiladda lagu duubayo, waxa go'aaminaya xerta uu la fadhiisto. Qaar baa buugta aad u xifdiya, qaar baa qabiilada aad u xifdiya, qaar baa aad u qayba wax naagaha laga yidhi ama lagu yidhi. Malaha fikir gaar ah, malaha qeexid gaar ah. La jirkooduna dhadhansi ruuxeed ma leh. Waa arrin aad iiga bajisa, mararka qaarna, waan ka hinaasaa, waayo xasuustaydu ma fiicna.

Berigii aad yarad ee lagu baray in noloshu baqdin tahay, berigii qof kaste oo kaa weyn, xaqa u lahaa in uu ku dilo. Berigii aad miyiga joogtay ee aad adhiga la waraabka ahayd. Berigii aad geela la daaqa ahayd, berigii dadku reerkiina ahaa, ee reerkiinu dadka ahaa. Berigii odayga lagu siiyay; kii aad ka baxsatay, berigii noloshu ma joogto! Dadkii ku baray in naagtu walax tahay, in geelu gooyo, in loo taliyo, in laga sareeyo, dadkii ma joogo!

Hareeraha day, waa dad kula mid ah. Ma joogo qof ku quudhsanaya, wadaad ku caayaya, nin isla weyn, iyo naag hooshaarshaar leh. Dad baa la wadda yahay, dan baa la wadda leeyahay, nolol baa ka dhexaysa, waa sidaas duniddu. Qof baad tahay, qof, qof!

Afka gacanta ka qaad, ha qarin dibnaha, waa awood; waa awoodda qudha ee aad haysato! Ha durkin, nolol baa jirta. Waa suuragal, waxa san baa suuragal ah. Waa hirdan, waa halgan, waa haladayg. Ha quusan, quusta lafteeda qudhgo'ay inta ayna innagu tamaraysan. Ha baqan, hayga diddin; soo dhawoow, ila hadal. Sidaas, maya, siddan. Ha sheegin, mar walba waa sida aad rabto. Maxaa inna dhibay? Qayayaab!

Is ka tun boodhka lugahaaga qariyay, kor u soo kac, ii dhiib gamcahaaga yar yar ee dhaska weyn leh. Innaga mari giggidan siigada miidhan ah. Innaga mari gidaarkan cidlada ah, waxaan ku gaynayaa dunidda, ma cidloon doontid; annaa kula jira! Ha ii qaban, waan ogahay in aan shan iyo toban sanno ka hor gabaariirtan kaaga tagay. I waydii sababtaan u soo noqday; la'aantaa nololi ma jirto!

I soo eeg, farrahan yar yar ee aad dhooqada ku kala miisto, waxaad ku kala guri kartaa duniddan uskaga miidhan ah, indhahan miiqmiiqan ee aad gigidda ku eegayso, waxaad ku ifin kartaa qudhunka dunidda. Ina socod sii, waxaan ku gaynayaa meel wax lagu akhriyo oo wax lagu qoro, waxaan ku barayaa, saaxiibo kula mid ah, dad dhaawacmay, dabadeed, isdhayey oo ka durduriyey. Waxaan ku barayaa, dadkii quusta dilay ee ii sheegay halkaan kaaga imi, dadkii i xasuusiyey badhkaan ka tagay.

Isii dhegaha; wixii dhacay ma go'aaminayaan waxa dhici doonna! U fiirso, jidhkaagu waxba ma illaawo, baraadkunna, waa maqalhaye, wixii lagu riday buu kuu kaydiyaa, haddaba, ma waxa aynu la noolaanaa jugaha jidhkeenna ku kaydsan, iyo, bulaacadda baraadkeenna lagu furay? Mise……Haa, waa in aynu ka fakarnaa MISE...

Nin baa tagay, LAAKIIN, nolol baa hadhay! Badh buu kaala la tagay, LAAKIIN, badh baa kaaga hadhay, boog baa kugu taal, LAAKIIN, baxnaannaa jirta! Aqbalkeen bay kaa rabaan, LAAKIIN, amardiid baa kuu eeg, oday bay kaa rabaan, LAAKIIN, arrinkeen baa kuu yaal. Run ahaantii, waa in aynu ka fakarnaa, LAAKIIN...

At the age of twelve, I knew here ( Burao) was not home, and I had to find where it was. I always wanted to go abroad; I thought maybe I would find home. I've never known what it was like to belong. I've always felt unfitting.

In 2024, I went to Cameron, the rich and multicultural heartland of Africa. My first footsteps in Youngde International Airport were accompanied by a sense of relief; finally, I had come home, I would never go back to Somaliland. I thought, I was thrilled that I could wear whatever I wanted, go wherever I wanted, whenever I wanted. At the time, I had no clue that freedom was not only about what you wear, the intimate relationships you have, the liquor you drank and the cigarettes you smoke; I didn't know that to be really free was much more than these physical liberations.

Now, I know that true freedom is the ability to fully be yourself without having any frames binding your life. It is the liberty to view things from your own corner, with your own sight.

But also, freedom is the guts to redefine and criticise both social norms and the political system. It is also about dancing to your own rhythm, even when no one else can hear it.

But when a country doesn't allow me such kind of freedom, that, literally, makes me sick.

In Yaounde, when I saw a sad person, the first question I asked myself was, "Did his mother get raped?" Has her father been jailed? Has her husband been killed? I never asked; had he or she been hungry? Because, to me, there were things more dangerous than being hungry; like being raped or getting killed by the police!

Although I lived French-Speaking regions, far away where crisis happened, but the grief has no limitations. And when part of country is on the fire everything feels scary. So, what happened in the past seven years in South-west regions was a message to myself: don't dare to write, even to think. I tried not to see things as they are, but reality always revealed itself to me, and I was compelled to write.

Life is unfair, and even more so when you are African. But being a Somali woman? Oh, that's beyond both. When, unfortunately, born as a Somali female, you should know as early as possible that, no matter how much you carry of the features of this unlucky species, you will not be considered human. Yes, instead, you will remain in the category reserved for tools (like hangool, spears, shields, and even brushing sticks), only in your case, you will be assigned to what all of these tools are spared, you will be a sexual object.

And even this is not a given. There are prerequisites to it, based on the cannibalistic taste of your owner. One of these is to have a certain body shape. ( Well, this differs according to the taste again, but hips, yes, hips... big ones, are the point of agreement. Also, you have to wear certain clothes(to either show or hide the hips, depending on the mood and leniency of your master). If you don't, then something is wrong with your slavehoo... ehhm, I mean womanhood, something that has many solutions, including breaking you like your fellow horses.

When I woke up every morning, I told myself to fit, to be the woman that people can accept. I wore a dirac and a shalmad. Sometimes, I had to cover my head. But in their eyes, I'm naked, I always remain naked, given that the concept of nudity, for them, is more about me and less about what I wear. They even consider my voice, my own medium to put out my words, as nudity. Because the only dressing, and also the voicing, they could accept is that of the Arabian desert. Why? Well, to my own emotional well-being, as well as survival, I will refrain from stating the obvious. Hence, the more I fit into their frames, the more I lose myself. Because I'm not Arab (and not born a slave, as far as I'm concerned).

I have lived in Burao, Berbera, Addis Ababa, Yaounde, and here I'm, finally, in Hargaisa. Different places, yet feeling the same; unwanted, unwelcome, oppressed, and alien. It is always about two things; political militarism and the patriarchal system. I can't live under these ideologies. It kills me slowly, softly, and silently. I wonder if I have a home in this world, at least one room! Where I belong? I asked myself, again and again.

I don't want to die before... I die. I don't want to hide parts of me, I don't want to give away what belongs to me, I don't want half of freedom and half of writing. I have got a pen and a mind, I want to write something true. I want to tell you stories untold. I want to make you hear voices unheard. So, please, take me.... home. 

In door ahba, daaqadda baabuurku way u dajisnayd oo waxay indho fiiqfiiqan ku eegaysay, dadkan sidii bundad huudhaydh ah oo la furay u wadhan masaajidka hortiisa ee diifta badani ka muuqato. Waxay si gaar ah u eegaysay, gabadha yar ee koonaha xigta. Waa ta dalada huraada ah ee dhinaca ka guban, kabaha dacaska ah ee indhasha suufka looga dhigay, iyo, diraca yar ee maddow ee wadda uskaga ah xidhan. Waa inanta yar ee lugteeda bidix ku foorarta sidii in wax kaga dhaceen. Waxay ka fakaraysay, berigii ay miyaga joogtay, maalintii jimcaha ahayd ee ayeeyadeed tuulada salaadda jimce u aaday, markii adeerkeed looga tagay, iyo, masiibadii jimcahaas dhacday. Waxa ay la yaabtay, markii ay layaabi jirtay, sida ay maalin jimce ah waxaas oo kale u dhici karaan!

Toddoba iyo toban sanno ka hor, sida gabadhaas yar ayay magan u ahayd dunidda dawarsiga. Duni bilaa tol ah, bilaa damiir ah, bilaa dal ah. Duni bilaa gargaar ah, bilaa garawshiiyo ah, bilaa garasho ah. Duniddaas, qofna isma waydiin karo; yaa ina baday, dhibkan? Sababtoo ah; waa bilaa garasho! Mawjado fikir ah baa maankeeda isku labo-rogaya, shanta farrood ee ay wejiga ku hayso, haddii aan la la yaabayn, inta ay midh sigaara ku qabsato ayay higgaadin lahayd odaygii shiidaalka u diiday, waa dal naagta ladan loo diido shiidaalka "waad is dili" oo ta baahani gaasta iibiso!

Heesta sida lama-filaanka ah ugu soo gashay moobilka ay gacanta ku hayso, ayaa sidii dhado cadceedi qabatay u kala eriday fikirkeedii.

"nagaadiga aduunyada, waxba kuma leh naaguhu, xeerkii sidaas naqay, nimankaa samaystee.."

Naagaha nolosha waxba lagama waydiiyo, sida ay naago u ahaanayaanna waa loo yeedhiyaa, in ay gefkaas Maryan Mursal og tahay, waa waxa dhadhanka gaarka ah ugu samaynaya heestaadan. Maryan, sida ay u taqaan, waa fannaanada kaliya ee codka dheddigga ku heesta. Nolosha bayhoofka ah ee naagta Soomaaliyeed ku nooshahay, waa fannaanada ka heesta, oo taqaan waajibka fannaanka. Waa naag aan diyaano u quudhin midabkeeda dhaladka ah, oo aan u jabin harawsiga faranji is- moodka, waa naag aan bootar u marin waayaha qadhaadh, ee sida ay u foolxun yihiin uga heesta. Markii ninkii ay jeclayd wacadkooddii burburiyay, qabligeeda jabay, muu deddan xanuunka oo isma odhan waa ceeb e, waatuu ku heesay: "adaa beeray jacayka, maantana baabii'naayee, adaa been iiga dhaarshay, haddana ii beddelaaya, baxnaanadaydii, beruu ka-soo-rayntaydii, waa bar-kuma-taal!"

In aad wax jeclaato, waa in aad muuqato, in aad aqbasho in aad muuqato waa ku dhac aan la wada lahayn. Kolkii, iyada iyo ubadkeedu ay ku kaliyaysteen waayo adag, mar kale, waa tuu bogeedu weheshaday "sidii Gorayo-cawshaan, ciirsila' ka oynaa, anniyo labadayda cunug, caddowsanaa; carruurtayda aabbahood!" Waa fanaannad aan wakhtiga nacab la buufiyo u aqoon, jacaylkana cudur la qarsado.

Waa casar, eedaanka hortii, cadceeddu aad bay u kulushahay, sidii ido harraaryooday ayay derbijiifta iyo danyartu u hor wadhan tahay masaajidka. Maalinka aan laga dareerin, hadhkiisu waa u hoy ay cadceedda ka hoos galaan, maalinka se, sidii adhi dhenged iyo jaqaf la la dhexgalo, qofba halkii kortoonku u qabto ayuu lugaha u jiidaa. Masaajidku waa goob cibaaddo, looma ogala miskiin uskag weyn!

Si teel teel ah ayay dadku u marayaan, luuqan, gaadhigu kaga goostay, Indho yaaban oo anfariirsan bay ku eegayaan, gabadha madow ee gaadhiga madow ku jirta, ee daaqadda ka soo eegaysa. Timaheedda bulbusha ah ee bilaa foodadda ah, diraca fiinnada ah ee aan garbaheedda madmaddow laga garan, iyo, naasaheedda bilaa keeshaliga ah ee sidii ilmo yar caloosha korjiifa, waa waxa qof kaste oo u soo dhawaada shaki ka gelinaya bedqabka maankeedda. Taasi se, maaha waxa dhibaya, waxa dhibayaa waa; in dadka dhisay fooqa intan leeg ay garan waayeen hal qol oo dadka bilaa guriga ah seexdaan ugu dara. Muxuu tarayaa qof dabaqiisa ka samaysan kara qol uu ku tukado, haddii ka bilaa hoyga ah aanu seexan karin? Ayay iswaydiisay, waxay ka fakartay sababta masaajidka looga sheego wax aan lagu dhaqmin, iyo wax aan lagu dhaqmi karin.

Dadku wuu soo batay, midh midh, labo labo, saddex saddex iyo ka badan ba waa loo wada socdaa. Raggu, khamiisyo cadcad oo aad mooda dumar sahay qaaday bay xidhan yihiin, dumarkanna, saddexdiiba labo ka mid ah baa xidhan maro madow oo aad u dheer. In kaste oo ay midabka madow neceb yihiin, haddana, maradan madow ee ay ku deddan yihiin, waxay u aragtaa, in ay caddayn u tahay maskaxdooda bilaa fikirka; carsigii maskax maddoobaadka, ayay u taqaan.

Maanta waa jimce, sida caadiga ah, qaybta dumarku ma furna casarkii, maalmaha kale, maanta se khudbad muhim ah ayaa salaadda ka dib loo ballansanyahay, kansho ay kulaylka gaadhiga kaga nasan karto, oo ay ku sugi karto inta saaxiibkeed u keenayo shiidaalka in ay tahay ayay iskula faqday. Lix sanno ka hor baa ugu danbaysay in ay foodda dhigto, habeenkii ay ogaatay in shiikhu ninkii yahay ayaa masaajidba ugu danbaysay. Berigaa hal arrin bay hubtay; in sharka iyo wadaadka xidhiidh ka dhexeeyo!

Habeenkaa, iyada oo shandada ku sidata lix kun oo lacag ah, ayay masaajidka soo gashay, farxadda maalgelinta ay heshay ayay duco ugu dabaaldegaysay, kalgacal badan ayay u dareemaysay gabadhii toddobo sanno ka hor dooxa Burco ka kaxaysay ee dugsiga farsamada gacanta qortay, gabadhii intaasba gurigeedda ku haysay ee qur'aanka bartay, gabadhii ay Faadumo-janno ula baxday ayay rabtay in ay alle-bari ugu abaalgudo. Inta ay gamcaha ka buuxsatay tafaha xijaabka oo ay kor u qaaday, ayay lugta middig hor marisay oo akhriday duco dheer oo inta ay bisinka ka bilawday ay aamiin ku dhammaysay, markaas bay lugta biddixna si habsami leh u soo qaaday oo soo dhexmartay bulaacadaha lagu wayso qaato, kildhi cas oo kaabad u dhow saarnaa ayay ka sii luqluqatay oo inta ay kabo baabuudh ah oo cadcad iska bixisay, mar kale, lugta middig hor marisay oo "Asallaamu calaykum" cod diirran oo farxadi ka muuqato ku tidhi, cod nin oo ayna filayn baa "wa calaykuma sallaam" albaabka hoostiisa ka yidhi, si faduul leh bay albaabka u soo qabatay iyadda oo leh "oo miyaan fasax la..." dib bay u booday, waa isaggii, tabtii buu u indhocas yahay, sidii buu u gadhcad yahay, halkii bay sujuudu kaga taal iyadda oo sii weynaatay, sidii buu kitaabka u hayaa, sidii bay dadku u rumaystaan! Afkay gacanta saartay, sidii markii ay ayeeyadeed u sheegtay waxa dhacay ee ay kabta ku dhufatay ay afka isu qabatay, sidii ay galabtaa reerkooda uga carartay ayay habeenkaa diinta uga carartay, iyada oo og in aan ciddina ka rumaysan doonnin; shiikha adeerka ii ah baa "i kufsaday" maalin jimce ah!

Jidhkeedii axgabay baa isku soo aruuray, sidii in wadaad qooqani xoogayo ayay si xoogan bawdyaha labadeedda gamcood ugu soo qabatay, illinta dhabankeeda ka da'aysa, waxay sidii tog u sii maraysaa ruugagga ay gadhka ku hayso. Waxa hor timi sidii ay dhulka u taalay subaxaas, siday cirka u eegaysay ee "ilaahayoow, iga qabo" ugu qaylinaysay, sidii aan cidna ugu juuqin ee dhiigeedu dhulka u qooyay, urtiisii qadhmuunayd baa u soo urtay, sidii qof la haystay ayay mar qudha daaqad ka booday oo caggaha maashay; big!

Farshaxanka Najax wuxu igu kalifay, markii koobaad, in aan sawir ku fakaro oo ka fakaro dulucdiisa. Waa waxa aan ku jeclahay fanaanka dhabta. Maxay tahay in uu qofka fanaanka ahi kugu biiriyo? Waxay ila tahay, midh su'aal ah haddii uu kugu biiriyo abbaal weyn buu ku gashaday.

Wax aan isku dayay in aan la sheekaysto farshaxanka Najax, in aan la fadhiisto oo warka ka guro, dabadeed, wixii ay sheegeen amma aan u maleeyay in ay ii sheegayaan dhigaal u baddelo. Waa baddweyn aan laga dhammaanaynin, halka u sukaysa ayaan ka darsaday oo saddex ka mid ah baan gaar ula sheekaystay.

Wejiga ii banee, maya, indhaha oo qudha, waxa iigu darran arraga! Damaqa feedhahayga, waxa iiga xanuun badan dahaadhka arragayga saaran, ma arko meel layga haysto, cidda i haysata iyo waxa ay igu haysato. Waan dilanay, yaa i dilay? Ma aqaan! Dibnahay daboolan, indhahay dagguugan, labo dhadhaab baan dhexdooda ku jiraa. Garashada qawsaarka, awooddaha dulmiga iyo, mugdiga indhahayga ayaan u magan ahay.

Caqliga iiga kac, inta aannan ku itaalaysan cadaadiska kursigaaga ee kugu foofarin. Aqbal xaqiiqada aad ogtahay, waa ta ah; in aynu bashar isku mid ah nahay! Laalaab khuraafaadkaaga- jeebka gasho amma iska qub, iga qarso. Isku qabo afka dhuranka badan ee cilmiga ka daya sidda xaydkayga loo maydho, ma tihid xafaayadda aan xidho. Maqal codka gabadha, dhegayso aragtideedda, ha anfariirrin, way fakartaa, sidda DADKA!

Ma ihi wax aad ii taqaano! Cadka bisil, caqliga qalooca, garashada liitada, walaxda galmada iyo shaqaalaha jajaban ee diidmada amarkaaga ku cadaab galaysa. Halkaa day, maxaa kuu muuqda? Naag daldalan! Haa, waa waxaad naagnimada u taqaanay, oo inta ay naf baxayso ee ay urta maydkeedda iska fogaynayso, gabadhii dhabta ahayd ku ag akhrinayso buug. Buuggii baray in ay qof tahay. Maxay tahay naagtan cusub ee buugga sidata? Ha baqan, waa naag dalka kula leh, talada ku leh, fursada kula leh, in ay hesho qaybteeddana aan kaa baryan! Waa naag jidhkeeda leh oo aadan u yeedhinaynin marada ay saarayso, waa naag caqligeedda leh oo aan marti kaaga ahayn sidda loo fakaro. Maaha weel, maaha cawro, maaha wixii aad taqaanay; way daddawday.

Subscribe now