Síðsumarið er gengið í garð, bjartir dagar og rökkur á kvöldin – svolítið eins og í útlöndum. Við höldum þó enn fast í sumarið um leið og við horfum tilhlökkunaraugum til komandi vikna með spennandi viðburðum, sýningum og haustlitum. Í dag dustum við rykið af hátíðadagatalinu okkar og mælum með viðkomu á tveimur slíkum auk þess se…

Read more

Þó sumarið sem við ræddum í síðasta bréfi hafi ekki látið mikið fyrir sér fara á höfuðborgarsvæðinu síðan þá erum við enn í sumarskapi. Heldur betur. Við kíkjum á tvær sýningar í i8 Gallery þar sem nýtt sýningarrými opnaði nýlega og fáum ferðasögu úr Hrísey. Á ferð um landið höfum við notið þess að fræðast við hlustun á hlaðvarpinu…

Read more

Sumarið er allsráðandi á góðviðrishelgum líkt og þessari hér í Reykjavík. Við bjóðum uppá kvöldsól við Tjörnina og fræðandi og skemmtilega hlustun við leik og störf í sumar. Við ferðumst líka norður á bóginn, eins norðarlega og eiginlega er hægt á Íslandi, því ferðasaga dagsins kemur frá Horni.

Read more

Molarnir rata til ykkar til að njóta með kvöldkaffinu, við vorum enda upptekin við D-vítamín inntöku þegar sól var hæst á lofti og drekkutíminn tekinn utandyra. Við erum spennt fyrir nýrri tónlistarhátíð í Hveragerði, sumarrölti í miðbæ Reykjavíkur, sem hefur aldrei verið í betra formi og einu og öðru í útvarpinu. Ferðasaga dagsins…

Read more

Maí kveður með öruggum tveggja stafa hitatölum á höfuðborgarsvæðinu. Á morgun er júní og sumarið er komið – hvernig sem það svo fer. Bréfaskrifin taka nú á sig sumarham. Fyrsta ferðasagan af nokkrum sem fylgja sumarbréfunum berst ykkur í dag. Það er ferðasaga frá Feneyjum. Við mælum svo með tónleikum á fimmtudag, opnun í Ystaseli á …

Read more

Gleðilega hátíð. Það er langt liðið á maí og við lítum til snemmsumarsins í garðinum, við búum okkur líka undir yfirvofandi lægð í kortunum og rifjum upp tvær kvikmyndir fyrir videó-kvöld og grípum í gamla sögu úr bókaskápnum. En fyrst höldum við á lífsnauðsynlega sýningu í Gerðarsafni.

Til gamans má geta þess að næsta bréf sem be…

Read more

Gleðilegt sumar og takk fyrir samfylgdina í vetur. Einn fjölmargra vorboða sem nú láta á sér kræla, auk lundans sem er nýlega lentur og auðvitað lóunnar, er HönnunarMars. Hann tekur sér stöðu í fyrstu viku maímánaðar og við mælum með almennri þátttöku. En fyrst stingum við upp á tónleikaferð í Borgarholtið og leikhúsferð á Hverfis…

Read more

Við skelltum okkur til útlanda á tónleika, mælum með dönskuæfingum og hlustun á nýverðlaunaða plötu hinnar dönsku Anniku. Mælum með endurteknum heimsóknum á árslanga sýningu í Marshallhúsinu og innliti í Hvelfingu Norræna hússins. Bendum að endingu á sérlega fallega unna útvarpsþætti sem segja tilfinningaþrungna sögu íslensk-egyps…

Read more

Þessi síðasti sunnudagur góu heilsar með snjókomu í Reykjavík. Vorjafndægur liðin og því formleg niðurtalning til páska hafin, líkt og við nefndum í síðasta bréfi. Við hugum aðeins að dymbilviku og páskum í bréfi dagsins. Við mælum með tónleikum á fullu tungli á skírdag en fyrst sýningu í björtu sýningarrými Kling & Bang og sendum …

Read more

Það er vetur í Reykjavík og nóg eftir af honum. Við fögnum snjónum en líka birtunni og teljum bókstaflega dagana til páska í fréttabréfi dagsins. Við mælum með heimsókn í Eddu, í Hörpu og til Birnu í Berg Contemporary. Skyggnumst í lok bréfs inn í stóra menningarviðburði vestan hafs og á Bretlandi og hugmyndir um guðlegt inngrip og …

Read more

Þorri að baki og í dag gengur góa í garð. Það er ágætis áminning um að taka niður öll vetrar- og jólaljós en við leggjum til að fólk fylgi þeirri góðu reglu að jóla-, aðventu- og vetrarljós hitti ekki fyrir góu enda innan við mánuður í jafndægur að vori. Reglan er þó umdeild í ritstjórn.

Í dag mælum við með tvennum…

Read more

Enn einn dagurinn bjartur og fagur í höfuðborginni. Sólin bætir upp fyrir snjóleysið og gerir gæfumuninn í skammdeginu – næstum eins og það hafi ekki komið. Birtan gerir litina líka ríkari og þeir koma sannarlega við sögu í bréfi dagsins. Við skoðum stóra liti við Nýlendugötu, smaragðsgrænan og sykursæta liti í Borgarleikhúsinu, …

Read more

Með síðasta bréfi fylgdu nokkur meðmæli með áfangastöðum og menningarviðburðum á erlendri grundu fyrir þau sem hyggja á ferðlög utan landsteinanna á nýju ári. Í dag lítum við á hátíðadagatal ársins og sendum lesendum. Við látum ekki þar við sitja og mælum með tveimur ólíkum sýningum; í Kling&Bang og Hafnarhúsi.

Síðasta bréf

Með sólarpönnukökunum í dag ☀️

• Hátíðadagatal Eddu og Greips,

• Hlusta: Lagalistinn,

• Ungir myndlistarmenn í Kling & Bang,

• Lavaforming í Hafnarhúsi.

Hátíðadagatal Eddu og Greips

Hátíðir, stórar og smáar, um allt land árið 2026.

Í dag sendum við ykkur lista með dagsetningum valinna viðburða innanlands. Að heimsækja staði með erindi er mun skemmtilegra en án þess – svo er bara hægt að velja hversu mikinn þátt maður tekur. Hátíðarlistinn okkar geymir viðburði sem okkur finnnast spennandi – hann er alls ekki tæmandi enda urmull hátíða, stórra og smárra, nær viðstöðulaust um land allt.

Fyrir þau allra hörðustu höfum við komið hátíðunum og viðburðunum fyrir í Google-dagatali sem hægt er að nálgast hér að neðan. Þá ætti dagatalið að færast inn í ykkar og hægt að slökkva og kveikja á því eftir þörfum.

Hátíðardagatalið

Myrkir Músíkdagar

Reykjavík, 24.–26. janúar

Þessi rótgróna tónlistarhátíð hefur alla tíð verið burðarás í íslenskri tónlist – nýrri og nýlegri. Við höfum áður mælt með tónleikum Cantoque Ensemble á hátíðinni en í þessari tónleikaröð hefur kórinn beint sjónum að einu tónskáldi í senn þar sem kórtónlist þess er í öndvegi.

Í ár er það kórtónlist tónskáldins Hildigunnar Rúnarsdóttur sem kórinn býður upp á á tónleikum í Hallgrímskirkju á sunnudag, 1. febrúar kl. 17.

• Í fyrra flutti kórinn kórtónlist tónskáldsins og kórstjórans Hjálmars Helga Ragnarssonar. Þeir tónleikar voru fluttir á Rás 1 í apríl og eru enn aðgengilegir í Spilara RÚV.

Vetrarhátíð og Safnanótt

Stórhöfuðborgarsvæðið, 5.–8. febrúar

Reykjavík Early Music Festival

Reykjavík, 31. mars–2. apríl, (dymbilvika)

Skíðavikan og Aldrei fór ég suður

Ísafjörður, 1.–6. apríl (páskar)

• Hér er uppástunga um skipulag á páskaferð til Ísafjarðar frá því fyrir nokkrum árum.

Sumardagurinn fyrsti í Garðyrkjuskólanum

Reykir, Ölfusi (við Hveragerði), 23. apríl.

Sérhvert ár á sumardaginn fyrsta er gestum boðið að koma og eiga eftirminnilegan dag í dásamlegu umhverfi Garðyrkjuskólans.

Þar gefst kostur á að skoða ævintýraveröld hins margfræga bananahúss og annarra gróðurhúsa, versla á bændamarkaðnum sem settur er upp og þar sem meðal annars er handlað með grænmeti sem nemendur hafa ræktað. Dagurinn er ávallt hátíðlegur og sveipaður mikilli gleði og bjartsýni enda næg ástæða til.

HönnunarMars

Reykjavík, 6.–10. maí

• Við skrifuðum í fyrra pistil um stemminguna á HönnunarMars. Hann á líka við í ár.

Ljósmyndadagar á Seyðisfirði

Seyðisfjörður, 1. – 17. maí

Ströndin Studio er bæði heimili og vinnustofa hinnar kanadísku Jessicu Auer og baskans Zuhaitz Akizu. Þau hafa staðið fyrir árlegum ljósmyndadögum um skeið og munu þetta árið beina sjónum að því sem þau kalla staðarvisku, sum sé staðbundna þekkingu, mátt staðar og hvernig þekkingu um staði er deilt manna á milli. Jessica og Zuhaitz eru bæði listamenn og ljósmyndarar, heilmiklir grúskarar og fyrirmyndar gestgjafar. Hægt verður að skrá sig á nokkur námskeið sem eru lykillinn að góðri upplifun Ljósmyndadaganna, dagskráin verður tilkynnt á samfélagsmiðlum Strandarinnar á komandi dögum og við mælum með að skoða úrvalið.

Skjaldborg, hátíð íslenskra heimildamynda

Patreksfjörður, 22.–25. maí (hvítasunna)

Tónlistarhátíðin Við Djúpið

Ísafjörður, 17.–21. júní

Við mælum að sjálfsögðu með sólstöðuhelgi við Ísafjarðardjúp líkt og við höfum gert áður. Tónlistarhátíðin Við Djúpið býður upp á passlegt magn af tónleikum og spennandi og skemmtilega hliðardagskrá með mat og útivist. Í sumar stefnir líka í nýja sauna-viðbót í dagskrá hátíðarinnar. Meira um það síðar.

Meðal listamanna á hátíðinni í sumar eru Ísfirðingarnir Þórunn Arna Kristjánsdóttir og Pétur Ernir Svavarsson sem frumsýna einmitt Galdrakarlinn í Oz um þessa helgi í Borgarleikhúsinu. Þá sækir danski NOVO kvartettinn hátíðina heim og kemur fram á tónleikum – það gera líka ísfirk-pólsku bræðurnir Frach og taka með sér vini frá Póllandi.

Grímseyjarhátíðin

Grímsey, 19.–21. júní

Skógardagurinn mikli

Hallormsstaðaskógur, 20. júní

Hér er það ekki síst mikil matarveisla sem við erum spennt fyrir, heilgrillað naut og heilgrillað lamb, ketilkaffi, lummur og fleira góðgæti. Dagskráin byrjar á Skógarhlaupinu, þá tekur við ævintýralegt skógarhögg og því næst hátíðardagskrá í Mörkinni með fyrrnefndri veislu og gleðskap.

Hátíðni

Borðeyri, 3.–5. júlí

Sumartónleikar í Skálholti

Skálholt, Biskupstungum, 4.–12. júlí

Hornstrandir Film Festival

Hornstrandir, 15.–21. júlí

Reykholtshátíð

Reykholt í Borgarfirði, 24.–26. júlí

Norðanpaunk

Laugarbakki, 31. júl.–3. ágú. (Verslunarmannahelgi)

Hamraborg Festival

Kópavogur, 29. ágú.–5. sep.

Hamraborg Festival hefur vaxið og dafnað skemmtilega á undanförnum árum og fer öll fram við Hamraborgina bæði í þar til gerðum sýningarrýmum og á óvæntum stöðum inni og úti. Dagskráin hefur verið lífleg, mikið um gjörninga og tækifæri á að skoða daglegt umhverfi í nýju ljósi.

RIFF, Alþjóðleg kvikmyndahátíð í Reykjavík

Reykjavík, 24. sep.–4. okt.

State of the Art

Reykjavík, 6.–11. október

Óperudagar

Reykjavík, 21. okt.–1. nóv.

Reykjavík Dance Festival

Reykjavík, 11.–15. nóvember

Það er reynsla okkar að danshátíðin bjóði alltaf upp á eitthvað mjög spennandi og oftar en ekki eitthvað óvænt, enda um mjög metnaðarfulla hátíð að ræða sem hefur sannarlega fest sig í sessi sem tilraunakenndur vettvangur og ómissandi partur af menningarárinu.

Lagalisti Eddu og Greips

Sem fyrr kennir ýmissa grasa á lagalistanum okkar. Til að setja tóninn fyrir daginn trónir efst nýlegt Sólarpönnukökulag frá Ísafirði. Hér má sjá myndband frá frumflutningnum í fyrra.

Read more

Gleðilegt nýtt ár.

Í upphafi ársins lítum við okkur aðeins fjær en venjulega og leggjum drög að ferðalögum ársins. Líkt og undanfarin ár langar okkur að benda lesendum á að það getur verið gaman að skipuleggja ferðalög í tengslum við spennandi menningarviðburði. Það getur dregið okkur á skemmtilega og óvænta staði en líka op…

Read more

Gleðilega hátíð. Við sendum ykkur kæru áskrifendur nokkra vel valda mola með kvöldkaffinu. Beinum sjónum okkar að verkum Steinu sem eru nú yfir og allt um kring, hlustum á ljúfa vetrartóna og hlýðum á ljóð á nýársdag frá sólarupprás til sólseturs. Látum berast með straumnum inn í Kringlu og alla leið upp á ok…

Read more

Þá byrjaði að snjóa. Þeir eru ekki langir dagarnir í höfuðborginni núna – við höfum saknað snjósins sem gefur birtu í skammdeginu en eygjum nú von um hvít jól. Í þessu litla jólabréfi sendum við ólíka mola sem hægt er að tengja jólahaldinu og undirbúningi þeirra. Í Hafnarborg er nú hægt að ölva sig á listinni og …

Read more

Fyrsti sunnudagur í aðventu, fannhvít jörð og kertaljós. Við nýtum kyrrðina í morgunsárið meðan þessi orð eru rituð og óskum friðar yfir heimsbyggðina. Ekki vanþörf á. Jólagjafalistinn er megin uppistaða fréttabréfs dagsins. Fastur liður eins og venjulega. Við elskum góðan takt og fasta liði. Bendum ljúflega á grein sem Edda skrifaði í Bændablaðið á dögunum undir yfirskriftinni Gerum allt að garði, en hún tengist ræktun í garði Listasafns Árnesinga í Hveragerði, tedrykkju og bókinni Ef ég væri birkitré sem Hildur Hákonardóttir skrifaði og verður fagnað í safninu næstkomandi sunnudag. Kaffiferð austur fyrir fjall á öðrum sunnudegi í aðventu gæti verið upplögð.

Með sunnudagskaffinu í dag 🎁

• Jólagjafalisti VI,

• Hlusta: Hugljúf jólaplata og hresst jólaball,

• Te, myrkur og ný bók fyrir austan fjall.

Jólagjafalisti VI

Fyrir jólin 2020 sendum við fyrst hugmyndir að jólagjöfum með fréttabréfi sem áttu það sameiginlegt að tengjast skrifum okkar á líðandi ári. Við höfum endurtekið leikinn fjórum sinnum síðan og nú er hann mættur, sjötti listinn. Við vonum að hann veiti innblástur í gjafahugleiðingum en um leið rifji upp fyrir áskrifendum skrif okkar á árinu. Fyrirsagnirnar eru hlekkir á nánari upplýsingar.

Áskrift að fréttabréfinu

Við getum auðvitað ekki látið hjá líða að mæla með áskrift að Edda og Greipur mæla með í jólapakkann. Áskriftin kostar minna en einn kaffibolla á mánuði og tryggir lesendum vel valda menningarmola að jafnaði tvisvar í mánuði. Hægt er að skrifa kveðju með áskriftinni og tímasetja hana svo hún lendi í pósthólfi þiggjanda um það leyti sem pakkarnir eru opnaðir á aðfangadag.

Hugarheimar, bók um verk Guðrúnar Bergsdóttur

Einkasýning á verkum Guðrúnar Bergsdóttur í Gerðarsafni var eitt af því sem stóð upp úr á menningarárinu 2025. Við spjölluðum við Grétu systur Guðrúnar síðastliðið haust og drukkum tebolla með Hildigunni Birgisdóttur sem sýningarstýrði sýningunni í aðdraganda hennar. Í tilefni af sýningunni gaf fjölskylda Guðrúnar út bók með ljósmyndum af verkunum og textum frá ólíkum aðilum. Bókin er fáanleg í safnverslun Gerðarsafns í Kópavogi og hjá Forlaginu.

Hátíðarpassi á tónlistarhátíðina Við Djúpið

Það er fastur punktur hjá okkur að deila með lesendum dagskrá tónlistarhátíðinar sem haldin er á sumarsólstöðum á Ísafirði og þar sem hátíðin stendur okkur nærri mælum við í sífellu með heimsókn. Glæsileg dagskrá hennar næsta sumar verður kynnt í janúar en hátíðaripassinn er ódýr og góð gjöf og fáanlegur á netinu.

Read more

Nú er hafinn sjöundi árhringurinn af meðmælaskrifum okkar og við hlökkum til framhaldsins. Við notum tækifærið og bjóðum nýja áskrifendur velkomna í hópinn og bendum á að hægt er að lesa gömul bréf á síðunni.

Í dag mælum við með tveimur ólíkum áfangastöðum við hafið; myndlistarsýningu í Gróttu og sauna í Gufunesi. Við beinum líka sjónum okkar að annarri sýningu í miðborginni og bendum á meðmælasúpu okkar á Rás 2 í gær.

Með sunnudagskaffinu í dag 🇮🇸

• Sigurður Ámundason sýnir í Gróttu,

• Hlusta: Edda og Greipur í Helgarútgáfunni á Rás 2,

• Ragna Róbertsdóttir í i8 Gallerýi,

• Kría fargufa í Gufunesi.

Sportbílar og hvítfyssandi öldur

Úthverfavirki, einkasýning Sigurðar Ámundasonar í Listasafni ASÍ, Gróttuvita. Sýningin stendur til 30. nóvember.

Eftir að Listasafn ASÍ seldi húsnæði sitt á Skólavörðuholtinu þar sem nú er rekið blómlegt menningarstarf í Ásmundarsal, réðust þau í óhefðbundið sýningaform sem hugnast okkur vel og hefur tekist vel upp með. Einn listamaður er valinn á hverju ári og boðið að gera sýningu á landsbyggðinni og aðra á höfuðborgarsvæðinu.

Sigurður Ámundason er listamaður þessa árs og opnaði fyrr á árinu samhliða sýningar í Fjarðabyggð; á Eskifirði, Breiðdalsvík og í Neskaupsstað. Nú stendur yfir sýning á verkum hans úti í Gróttu. Verkin eru að miklu leyti ný og voru sum sýnd á fyrrnefndum sýningum.

Þekktastur er Sigurður fyrir teikningar sínar sem eru gjarnan stórar að flatarmáli, unnar með trélitum, blýöntum og pennum. Það sem í mínum huga er mest áberandi í þeim er hvernig karllægir og kvenlægir kraftar takast á og taka á sig hinar ýmsu myndir en bráðna í raun saman í kraftmikla heild. Mikill gróður, sportbíll, stórbrotið fjalllendi, öldugangur, blómahaf, garðyrkja, rusl og drasl, byggingasvæði og fótbolti. Þegar litið er í baksýnisspegilinn þá voru ógnvekjandi öfl áberandi í fyrri verkum Sigurðar en þau virðast nú hafa tekið fyrrnefndum mýkri straumum opnum örmum. Merki (logo) sem Sigurður hefur lengi haft áhuga á sem áberandi fyrirbæri í markaðsvæddum heimi eiga áfram sinn sess í verkunum og verða að teljast uppáhaldsmerki þeirrar er þetta ritar.

Í vitanum sjálfum er frábært verk sem samanstendur af videóverki, tveimur blýantsteikningum af kunnuglegum andlitum sem reynast vera aukaleikarar úr þekktum bíómyndum og tveimur klukkum þar sem önnur er aðeins sein og hin aðeins fljót. Uppsetningin samhverf eins og um altari sé að ræða. Verulega forvitnilegt verk um einstaklinginn í tíma og rúmi sem Sigurður átti sjálfur eftir að setja fingurinn betur á.

Nýliðið laugardagskvöld bauð listamaðurinn rithöfundum í vitavarðarhúsið þar sem nokkrir lásu upp úr verkum sínum og til stendur að hann bjóði til tveggja slíkra kvölda næstu helgar þar sem líklegt er að gjörningar, tónlist og innlegg ungra listamanna komi eitthvað við sögu.

Við mælum með ferð í Gróttu sem er bæði ævintýraleg út af fyrir sig, enn ævintýralegri í myrkri með vasaljós og enn ný vídd opnast þegar öðrum listamönnum er boðið út í eyju. Hægt er að fylgjast með því sem er á döfinni á Instagrammi og Facebook listamannsins og Listasafns ASÍ. Við lofum því að listamaðurinn tekur vel á móti ykkur. Athugið að skoða þarf flóðatöflu.

Sýningin

Hlusta: Edda og Greipur mæltu með 🍂

Við vorum gestir Kristjáns Freys í Helgarútgáfunni á Rás 2 í gær. Auk þess að segja aðeins frá okkur og fréttabréfinu gáfum við hlustendum nokkur viðbótarmeðmæli sem okkur fundust passa vel með árstíðinni.

Hlusta

Í þættinum var meðal annars spiluð tónlist sem við vorum beðin að koma með. Mörg lög komu upp í hugann og hafa nokkur þeirra nú ratað á lagalistann okkar auk verks í miklu uppáhaldi sem er á dagskrá Sinfóníutónleika á fimmtudag.

Á göngu þegar dyr opnast

Einkasýning Rögnu Róbertsdóttur í i8 Gallerýi, Tryggvagötu 16. Sýningin stendur fram á gamlársdag.

Ragna Róbertsdóttir sýnir ný verk í i8 Gallerýi en opnun sýningarinnar markaði einnig 30 ára starfsafmæli gallerísins sem Edda Jónsdóttir opnaði í Ingólfsstræti 8 og er nú rekið af syni hennar Berki Arnarsyni og góðu starfsliði. Sýningin er fimmta einkasýning Rögnu í gallerýinu en hún var einmitt einn af fyrstu sýnendunum þegar gallerýið opnaði en það var okkar ástsæli Hreinn Friðfinnsson sem opnaði þá allrafyrstu.

Efniviður sem á gjarnan uppruna sinn í náttúrunni, tími og rými hafa alla tíð fylgt Rögnu í gerð verka sinna. Hún sankar að sér efnum á ferðum sínum og á þannig til að mynda safn af steinvölum og olnbogaskeljum, ýmsum bergtegundum og öðrum ævintýralegum efnivið sem hún geymir í stórkostlega fallegu skipulagi á vinnustofunni sinni. Vinnustofur listamanna eru nefnilega til margs gagnlegar, hver og einn listamaður nýtir vinnustofuna sína eins og hentar vinnulaginu.

Sýningin í i8 er dásamlega falleg. Heilt landslag hefur flutt inn í sýningarrýmið. Svart og hvítt fjalllendi sem er splæst á milli glerja, hálfpartinn tvívítt rými sem felur í sér óravídd og mikið andrými. Agaðir skúlptúrar lúra á sérútbúinni hillu í glugganum og auk þeirra eru nokkur veggverk, hvert með sín sérkenni, en öll með skýra tengingu við fyrri verk Rögnu.

Nú eru uppi nokkur útiverk Rögnu sem gaman er að kíkja á. Nýlega minntumst við á verk hennar á sýningu í Norræna húsinu á Sequences-myndlistarhátíðinni, þar á meðal göngustíg úr rauðamöl við brúna og bronsverk sem hvílir við tjörnina fyrir framan húsið. Annað bronsverk er einmitt beint fyrir utan i8 í Tryggvagötu, Timescape, bronshellur sem eru sniðnar ofan í gangstéttina í staðinn fyrir þrjár gangstéttarhellur.

Það eru ófá fótsporin sem stigin hafa verið yfir verk Rögnu sem veðrast með tímanum og margir taka vafalaust ekki einu sinni eftir. Ég elska þannig verk sem bráðna inn í umhverfið sitt og virkjast fyrst þegar skilningarvitin okkar eru opin og veita þeim athygli. Þá getur orðið sprenging í huganum, töfrandi augnablik, dyr opnast.

Verk Rögnu eiga það í mínum huga sammerkt að vera öguð og formföst en búa yfir mikilli mýkt, mildi og jafnvel ævintýragirni. Ég naut þess að dvelja dágóða stund í kyrrðinni í sýningarrýminu og ferðast um í huganum langt út úr galleríinu áður en ég steig aftur út í ys og þys miðbæjarins með stuttri viðkomu á bronsstéttinni.

Nánar

Gufa í Gufunesi

Kría fargufa, Gufunesi í Reykjavík. Una Sighvatsdóttir, gestapenni skrifar.

Krían kom á vordögum til Íslands og hreiðraði um sig við bryggjuna í Gufunesi, norðan við Grafarvog. Þaðan er útsýnið vítt og breitt út á sundin og aðgengið gott að sjó, fyrir okkur sem kjósum að kæla okkur í „legvatni móður jarðar” eins og einn sjósundsbróðir minn orðaði það eftirminnilega. Líkt og nafna hennar í fuglaríkinu er Kría fargufa hvítlit og léttbyggð, en það vantar ekkert upp á styrkinn - ég naut þess að sitja þar í rúmlega 100°C þurrum hita í einni lotunni um daginn.

Sprengingin í gufuböðum á Íslandi er gleðiefni fyrir allt áhugafólk um almenningsböð, en í öllu framboðinu hefur Krían nokkra sérstöðu sem ég kann að meta. Sjálf hef ég lengi heillast af baðmenningu ólíkra landa og legg mig sérstaklega eftir því að kynnast henni þegar ég ferðast. Hvort sem það eru tyrknesk, eða marokkósk hammam, japönsk onsen, rússnesk banya, finnsk sauna, ungversk termálfürdő eða íslensku sundlaugarnar, öll hafa böðin eitthvað til síns ágætis.

Innskot ritsjóra: íslensk-eistneska kvikmyndin Trúnó í saununni (Smoke Sauna Sisterhood) er aðgengileg í Spilara RÚV til 27. janúar 2026 og við mælum heilshugar með áhorfi).

Gufugusumenninguna sem hefur verið að breiða úr sér á Íslandi má, eftir því sem ég kemst næst, rekja til Þýskalands og Danmerkur, þar sem svo kallaður gusumeistari leiðir gesti gegnum skipulagt ritjúal með tónlist, ilmolíum og blævængjum. Gufugusan getur verið frábær upplifun, en það verður hinsvegar að viðurkennast að ritjúalið er ekki allra og það er vel hægt að njóta hitans án þess.

Kría fargufa í Gufunesi er gleðilegur valkostur fyrir fólk sem vill njóta þurrgufu í einfaldleika sínum. Krían er nær upprunanum, strangheiðarleg ef svo má segja. Þar er enginn gusumeistari, þótt gestgjafinn sé alltaf á staðnum til að bæta við eldiviði ef þarf. Gestir stýra hitanum sjálfir og geta gusað eins oft eða sjaldan og þeir vilja, með eða án ilmolía. (Ábending: Í almennilega heitri þurrgufu á ekki að þurfa að skvetta oft eða miklu vatni, því þá verður rakinn of mikill og þolið fyrir hitanum minna).

Krían tekur sex manns í sæti og því hefur mér þótt sérstaklega gaman að safna með mér hópi vina til að njóta gufunnar út af fyrir okkur og kjafta saman í friði - nú eða njóta þagnarinnar, á meðan við svitnum. Krían er nefnilega frábær vettvangur fyrir alvöru trúnó og þegar hitnar verulega í kolunum er hægt að trítla beint út í sjó hvenær sem vill og kæla sig niður. Eða tylla sér á stól fyrir utan, með dásamlegt útsýni til Esjunnar.

Innskot ritstjóra: Það er kjörið að kaupa klippikort í Kríu en því má deila með samferðafólki sínu og um að gera að mæta tímanlega til að nýta tímann sem allra best. Upplagt í jólapakkann!

Vonandi er útbreiðsla fargufunnar ekki enn ein bólan sem springur heldur varanleg viðbót við baðmenningu okkar Íslendinga. Í viðstöðulausu áreiti hversdagsins er Kría fargufa frábær vettvangur fyrir ró, vellíðan og smá viljastyrk í hitanum.

Nánar

Með næsta bréfi fylgir nýr jólagjafalisti þar sem við söfnum saman gjafahugmyndum sem eiga það sameiginlegt að að hafa komið við sögu í fréttabréfinu á líðandi ári. Listinn á auðvitað við allt árið og það eiga mögulega líka listar fyrri ára.

Gjafalistinn frá 2024

Með kveðjum,
Edda og Greipur

Fyrsti vetrardagur nýliðinn, hvítlaukurinn kominn niður nú þegar lítur út fyrir kaldari tíð eftir sérdeilis hlýtt vor, sumar og haust. Við njótum þess að háma í okkur lífrænar gulrætur frá Akri sem fást í matvöruverslunum á meðan birgðir endast, mælum með að skáskera þær í hæfilega munnbita og láta malla í hressilegum skammti af smjöri og fersku rósmaríni yfir lágum hita í alllanga stund á hellu eða í ofni. Úr verður dásemdarmeðlæti sem passar með nánast öllu. Við skoðum litla sýningu úti á Granda, pælum í bleikum október og látum elda fyrir okkur á hverfisbarnum.

Með sunnudagskaffinu í dag

• Til hamingju með að vera mannleg í Tjarnarbíói,

• Hlusta: Lagalisti Eddu og Greips,

• Samsýningin Tunga í Bók um bók á Hólmaslóð,

• Litli barinn á Ránargötu,

• Tilnefningar til Hönnunarverðlauna Íslands.

Bleikur október

Til hamingju með að vera mannleg í Tjarnarbíói í Bleikum október. Miðvikudagur 29. október kl. 20 (húsið opnar 19).

Það ætti ekki að hafa farið framhjá lesendum að nú er ekki bara langt liðið á október heldur er hann í ár, líkt og í fjölmörg ár tileinkaður árvekniverkefni Krabbameinsfélagsins, Bleikur október.

En nú líður á mánuðinn, hrekkjavaka og allraheilagramessa á föstudag. Til að slá einn af lokahnykkjum bleika mánaðarins trommar danshöfundurinn, skáldið og sviðshöfundurinn Sigríður Soffía Níelsdóttir fram með föngulegum hópi í Tjarnarbíó á miðvikudag með sýninguna Til hamingju með að vera mannleg. Sýningin var frumsýnd í apríl 2023 í Þjóðleikhúsinu og var einnig sett upp á Akureyri. Verkið hlaut þrjár tilnefningar til Grímuverðlaunanna, þar á meðal sem leikrit ársins.

Viðtal við Sigríði Soffíu um ljóðabókina og sviðsverkið í Víðsjá á Rás 1 í aðdraganda frumsýningarinnar vorið 2023.

Verkið er byggt á samnefndri ljóðabók Sigríðar Soffíu en ljóðin samdi hún meðan hún gekk í gegnum krabbameinsmeðferð. Hún er ein þeirra heppnu sem sigraðist á meininu og má segja að verkið sé óður til þess, óður til lífsins sem er.

Hver og einn notar þau verkfæri sem hann hefur til að vinna sig í gegnum erfiðleika ásamt því að öðlast ný á leiðinni. Fyrir Siggu Soffíu lá beint við að nota listina og segja má að á þessari löngu vegferð hafi hún sannarlega bætt í verkfærakistuna og þanið út listsköpun sína.

Hún fékk til liðs við sig annað fólk til að ljá ljóðunum orð því hún treysti sér ekki til þess sjálf. Eins og gefur að skilja reyna ljóðin á –verkefnið sem höfundurinn stendur frammi fyrir og sinnir þegar hún skrifar er allt annað en auðvelt. Ljóð til að sefa í sortanum, verða dansar, lög og sögur til að fagna lífinu á stórasviðinu. Segja má að þetta sé höfundareinkenni Siggu Soffíu, að sjá ólíkar hliðar á mannlegri tilvist og draga fram þær jákvæðu og orkugefandi.

Viðburðurinn í Tjarnarbíói hefst kl. 19 á miðvikudag og sýningin kl. 20. Krabbameinsfélagið verður með bleikan söluvarning sinn og fyrstu 10 gestirnir fá Eldblómadrykk úr smiðju Siggu Soffíu í boði hússins. Við mælum með að aðrir gestir kaupi sér drykk, eldblómadrykkirnir eru ljúffengir! Allur ágóði af uppfærslunni rennur til Bleiku slaufunnar.

Miðar

Lagalisti Eddu og Greips

Lagalistinn okkar snýr aftur og hefur norrænt yfirbragð, danskur strengjakvartett, íslensk popplög og sænsk dægurlög – allt í bland.

Sýning í Bók um bók

Tunga, samsýning í Bók um bók, Hólmaslóð 6.

Til allrar hamingju eru nú starfandi nokkrar bókverkabúðir í Reykjavík en þær lúta að einhverju leyti sömu lögmálum og listamannarekin rými, eru öllu jafna reknar af listamönnum og beina athygli sinni að jaðarsvæðum bóka og bókum sem listrænu fyrirbæri.

Ein þessara bókverkabúða er Bók um bók sem lúrir lengst úti á granda. Þar er hægt að kaupa allskyns bókverk og prent frá fjölda listamanna, erlendra sem hérlendra og forvitnilegar bækur sem finnast alveg ábyggilega ekki í hinum almennu bókabúðum.

Listamennirnir sem standa á bakvið Bók um Bók og hafa þar einnig vinnustofur sínar standa reglulega fyrir litlum sýningum og viðburðum og nú um helgina opnaði ein slík sem hefur að geyma verk eftir nokkra listamenn sem við höfum mætur á.

Sýningin heitir Tunga og listamenn sem eiga verk á henni eru Ásta Fanney Sigurðardóttir sem verður næsti fulltrúi Íslands á Feneyjatvíæringnum sem haldinn verður í vor, Baldvin Einarsson sem við skrifuðum um í upphafi árs 2022, David Horvitz sem nýlega sendi út ákall til heimsins um að rækta garð alls staðar í tveimur sýningum undir nafninu Geislagarðurinn sem ykkar einlægur ritstjóri sýningarstýrði nýlega í Y gallery, Kristinn G. Harðarsson sem er stórkostlegur listamaður sem tekst alltaf að kitla heilann á manni með verkum sínum, Ófeigur Sigurðsson rithöfundurinn sem flestum er kunnugur og Sigurður Ámundason sem gerir magnaðar teikningar sem gjarnan fela í sér pælingar um myndmál kapitalismans, logo og markaðssetningu sem við erum bombarderuð með mörgum sinnum á dag.

Við vekjum sérstaka athygli á verkum Kristins G. Harðarsonar á sýningunni og finnst hún sannarlega verð heimsóknar þó ekki sé nema fyrir þau verk. Þau eru allmörg, smá, gjarnan litrík og fela hvert og eitt í sér einhverja hugsun eða frásögn í orðum, litum, formum og hreyfingum.

Kíkið endilega á opnunartímana áður en lagt er af stað og setjið Bók um bók á lista yfir mögulega viðkomustaði til að versla jólagjafir, þar er hægt að kaupa eitthvað fyrir marga á öllum verðum. Við lofum að vel verður tekið á móti ykkur enda gestgjafarnir sérlega vandaðir.

Bók um bók

Hverfisbar Eddu og Greips

Litli barinn, Ránargötu 4, Reykjavík.

Á vordögum í fyrra opnaði hljóðlega lítill bar og veitingastaður í hótellobbýi nýuppgerðs hótels sem nú heitir Local 101. Barinn heitir því hógværa nafni Litli barinn. Þegar við komum þangað fyrst skömmu eftir opnun sagði annar eigendanna okkur frá því að þau langaði svo að bjóða upp á vel útilátinn mat á góðu verði. Það fannst okkur strax frábær hugmynd.

Lambakjötspylsan hefur verið á matseðlinum frá opnun, alvöru kjötpylsa sem framreidd er með kartöflumús, pikkluðum rauðlauk, skyrsósu og grófu sinnepi. Fyllir sannarlega magann og nærir sálina og kostar 3.800 kr. sem verður að teljast mjög góður díll miðað við aðalrétt á allflestum öðrum matstöðum.

Á Litla barnum er alltaf vel tekið á móti gestum, þjónustan er lipur og drykkirnir góðir. Sérstakur vínráðgjafi Eddu og Greips er spenntur fyrir Riesling-flöskunni á vínseðlinum og þá ískaldri. Við þorum eiginlega að lofa góðri stemningu hvenær sem er á Litla barnum, þar er ekkert týpuálag og enginn óþarfi. Það er alltaf smá eins og að koma til útlanda þegar maður mætir en svo er maður dregin aftur heim með lagalistanum sem hljómar en hann hefur frá upphafi aðeins geymt íslenska tónlist.

Litli barinn

Vara, staður, verk

Hönnunarverðlaun Íslands í Grósku, Bjargargötu 1. Fimmtudaginn 6. nóvember – síðdegis.

Undanfarið hefur Miðstöð hönnunar og arkitektúrs kynnt tilnefningar til Hönnunarverðlauna Íslands en þau verða veitt 6. nóvember. Umgjörð verðlaunanna er hin glæsilegasta og athöfnin öllum opin. Við getum því óhikað mælt með ferð á verðlaunahátíðina 6. nóvember en beinum í dag sjónum okkar að tilnefningunum sem okkur finnast allar spennandi á sinn hátt.

Undanfarin ár hafa verðlaunin verið veitt í þremur aðalflokkum; vara, verk og staður. Í hverjum flokki eru þrjár tilnefningar og því beina verðlaunin kastljósinu að níu flottum verkefnum sem þykja skara fram úr í íslenskri hönnun.

Í ár finnst okkur dómnefndum verðlauna hafa tekist vel til. Tilnefningarnar koma úr ýmsum áttum; hús, sýningarskálar, vatnsílát, hjól, fatalína, nýr áfangastaður og heill ilmheimur.

Elja er fjallahjól hannað og framleitt af Lauf Cycles. Elja er tilnefnd til hönnunarverðlaunanna í flokknum vara.

Í vetur sem leið skrifuðum við hér á þessum vettvangi og tókum tali arkitektinn Arnhildi Pálmadóttur sem ásamt sínu teymi stóð að fyrsta skála Íslands á Feneyjatvíæringnum í arkitektúr. Hún á tvær tilnefningar:

• Hús Arnhildar fyrir Félagsbústaði bar á góma í síðasta nýársbréfi.

• Við gerðum skálanum í Feneyjum skil í pistli á sjómannadaginn.

Uppgerð og nýbyggingar við Elliðaárstöð hljóta tilnefningu sem staður.

• Við skrifuðum um Elliðarárdal, Miðgarð, í júní í fyrra.

Til viðbótar við aðalverðlaunin þrenn eru veitt sérstök verðlaun fyrir fjárfestingu í hönnun og loks heiðursverðlaun. Til gamans má geta þess að Hafnarborg stendur fyrir sýningu á höfundarverki Rúnu (Sigrúnar Guðjónsdóttur) sem hlaut heiðursverðlaunin fyrir tveimur árum.

Tilnefningarnar

Við tökum vetrinum fagnandi og þar með árstíð borðspilanna og hyggjum á hressilega snúninga á komandi tíð í Pictionary, Fimbulfambi, Scrabble, Spurt að leikslokum, Qwixx og hvað þau heita nú öll saman.

Með kveðjum,
Edda og Greipur

Við dveljum lítið eitt utan tímans eða í millitímanum í bréfi dagsins, beinum sjónum að pásum á myndlistartvíæringi sem hefst innan skamms, flækjumst í draumi um skóg á Jónsmessunótt og lítum til endurgerðar af gamalli sápuóperu sem stöðvaðist skyndilega en er nú aðgengileg á Granda.

Edda var gestur í Endastöðinni á Rás 1 fyrir r…

Read more