Real as Steel 真如鐵

轉身要快

Max Wong 王慧麟 — Sun, 30 Aug 2026 23:46:33 GMT

唔好忘記，八月最後一日是Bank holiday，之後，英帝中小學大部分都開學了，即係表示間假悄悄地開完。九月開學，國會開檔，歐洲回魂，所以整個八月真係處於萬事停頓嘅狀態。

暑假完了

Max Wong 王慧麟 — Wed, 26 Aug 2026 08:29:26 GMT

趁住暑假將盡，美帝終於忍無可忍，用了經濟大絕去拆美伊戰事炸彈：即係邊個國家同伊朗再有交易，就會斷絕果個國家嘅銀行所有美元交易。聽落去好似好勁，但係最後係講緊針對六十個機構及公司實體，但細心睇下，針對某國嘅措施真係好少。講到尾，一個政權好似伊朗咁樣，如果願意捱落去嘅話，經濟制裁係冇乜意思嘅。因為無論係點樣形式嘅經濟制裁，呢果啲被制裁國家嘅官員，又或者國際上靠呢ｄ制裁搵食嘅中間人呢，總會有方法挺而走險去做生意。仲有，有啲獨裁國家，其實係唔介意人民食樹皮過活。而且外國制裁到某個地步，搞到被制裁嘅國家四分五裂，佢地啲難民通處走，仲走去其他西方國家尋求庇護，問你怕未？

問錯問題

Max Wong 王慧麟 — Tue, 18 Aug 2026 20:50:32 GMT

俄烏膠着，美伊未解，歐洲熱浪，東亞打風，國際社會就靜過烏蠅飛過都有蝴蝶效應。於是大報傳媒就奮打去追查果ｄ本來都冇乜特別價值嘅消息。早幾日畀傳媒搞到處於「身敗名裂」邊緣嘅劍橋大學前教授阿戴，懷疑頂唔順壓力，選擇輕生。家人響公開信之中提到外界針對佢嘅霸凌，希望唔會再有呢啲事發生。

我係「學棍」realist，響學界打滾咁多年，梗係會講你知，同類事情一定會再發生。因為好多人錯置咗問題。呢件事固然係外部霸凌，但係教授之所以成為教授，佢之所以被同路人不斷追撃，原因不外乎私怨同埋資源兩樣嘢。外界好多人唔係博士，又或者唔係響大學呢個場做過嘢，係睇唔穿呢個結構問題。

民生無小事／大風吹

Max Wong 王慧麟 — Tue, 11 Aug 2026 23:53:25 GMT

有朋友問關於英中關係會唔會走番去回頭路。呢個問題對於留英港人而言，其實係擔心英帝會唔會「出賣」在英港人，係咪？我暫時睇唔到有乜可賣，因為留英港人對於英帝而言真係冇乜價值（原諒我份人就真係好直），除咗因為人道理由而收留之外，佢都唔知你班港人響度有乜嘢畀到英帝。既然係咁，英帝又會出賣到乜嘢出去呢？

there is a mole, right at the top of the circus

Max Wong 王慧麟 — Sun, 02 Aug 2026 20:38:39 GMT

剛過去嘅周一，有付費訂戶朋友問及，我點樣睇胡主席可否留英呢件事。當時呢，剛剛主席受訪之新聞出緊街。我當時對訂戶朋友說，問題不大。隔了數小時後，主席可留英六個月的事情公布咗，訂戶朋友立即留言鼓勵及支持。哈哈～～不用言謝。付費訂戶有疑問，我亦不妨據手上資料作出分析，既然分析「中咗」，本應將個背後思考過程分享。不過本周事忙，寫緊篇論文，唯有等到今日才能分享。

係嘅，點解響主席未公布，英帝政府宣布給予六個月入境簽證之前，我覺得主席可以留低呢？主要基於幾個理由及想法。

北天王、食油

Max Wong 王慧麟 — Mon, 27 Jul 2026 11:19:48 GMT

你信唔信，響一個相當富庶又人均GDP冠絕全球嘅某個寶島，居然仲有「地溝油」（嚴格來講唔係嘅，因為個成份及處理唔係某國咁樣）呢樣嘢？早兩日響台北藍營就有一個反毒油嘅動員，似乎個聲勢都唔錯噃。至少個場都full晒人啦，都有一車一車嘅民眾去示威。咁綠營都有反駁嘅，因為食油抽驗呢家嘢，地方政府都要做，似乎某ｄ藍營地方政府冇做好把關云云。

另一邊廂，北天王賓含上台之後，整咗個一日一北都嘅計劃。佢響自己臉書同IG出咗ｄ片，講到好多曼市居民支持。曼市會唔會成為另一個權力中心，係咪應該去曼市置業呢？

響樹上生出嚟？

Max Wong 王慧麟 — Wed, 22 Jul 2026 17:36:54 GMT

好多年前，響某個既不完善又唔安全嘅地方，講緊要唔要派糖（即係派福利）之時，有高官講過，大意係啲錢響邊度嚟？響樹上生出嚟？我聽完都窒一窒。因為我覺得，叫有錢佬畀多些少稅，唔係有錯咩？後來響社會遊蕩（唔係遊歷，我真係冇乜閱歷）多咗，知道呢個世界有樣嘢叫做走資。有錢佬唔係唔可以畀多啲稅，而係想畀得gur啲，覺得政府收咗佢地啲錢，需要用得其所。有錢佬唔介意畀多啲，但最介意係亂咁fing錢，如果亂咁fing，不如將啲錢搬去其他金融中心啦，例如杜拜同埋新加坡，唔好咩？

所以當賓含上台之後，要搞一個「生活成本」政府，減輕人民嘅生活負擔，先搞好民生嘅嘢，冇人反對嘅，例如一上場就話要減電費，平均每年減45鎊（少好過冇」，巴士交通費每程兩鎊（依家三鎊），都係一件惠及民生嘅事。減巴士費先至誇張，佢條片後面果架巴士，黐咗條banner大大隻字話兩鎊一程，你話唔係一早搞掂兼傾好，冇人信啦。

咁我就係同樣果句：啲錢邊度嚟？

心機嘢嚟～～跳晒掣

Max Wong 王慧麟 — Fri, 17 Jul 2026 11:02:47 GMT

原來我寫學術嘢，反而仲多人睇。數據會說話，既然係咁，就講多些少關於上次廢妾的研究。話說做香港廢妾的研究，有兩點係相當難搞。第一，有前人做過，前人唔係搞法律，所以佢地就法律改革嘅部分，就會避重就輕，而且，如果研究者同埋讀者都唔係法律人，亦唔會太理會個法律邏輯響邊度，佢地就會比較傾向用佢地熟悉嘅方法去處理文獻。咁最容易嘅操作，就會同外界講，個廢妾改革係由民間團體帶動，而唔係法律自身邏輯所帶動。

呢個係法律界研究法律改革，與及其他人文學科研究法律改革的分別。冇話邊個啱邊個錯，因為唔通你叫一個經濟學家，去讀完法律學位，先至去研究殖民政府點樣利用《地鐵條例》去壟斷交通，收回土地嘅做法咩？呢樣講唔通，係咪？畀我係經濟學家，一定係睇下殖民政府點樣利用法律去推動殖民地政府眼中嘅「自由經濟」，而唔係用land law個角度切入，係咪？

迎接新時代

Max Wong 王慧麟 — Thu, 16 Jul 2026 09:41:55 GMT

老友傳來前輩的一段評論，片段中講到前輩支持改革黨云云。睇完有點失笑。每人政見，各有不同，各有支持，有乜所謂呢？至於港人冇世界觀云云，查實地球大部分人，不分中外，不分老中青，都冇乜所謂世界觀，又或者咁講，冇需要有世界觀，係咪？有世界觀又係咪代表一個人優越啲呢？又未必嘅。我覺得最緊要有得睇世界杯啫。

響世界杯如火如荼之間，英帝嘅政治出現最大嘅變化：貪施下台。另一邊廂，內政大臣推出新嘅法例，今次係收緊難民申請：今次，工黨大部分議員，連賓含在內都投票支持。咁依家睇到，賓含係咪真係好左呢？左到中門大開？未必囉。

心機嘢嚟啫～～！

Max Wong 王慧麟 — Sun, 12 Jul 2026 00:24:52 GMT

我都係借東風啫，趁有套戲準備拍，咪講吓寫香港廢妾果本學術著作之時，點樣去處理文獻，去寫得成呢本學術著作。唔使擔心，如果想睇呢本書，只要係港大嘅圖書館成員，就基本上可以下載晒成本嚟睇。

先旨聲明，響學術圈上，第一本利用香港文獻去書寫香港廢妾嘅，係中大歷史系博士葉嘉茵(2014)寫嘅博士論文。我響呢度係要多謝呢位先行者。

睇完佢嘅博士論文，大家就會明白，當中政府文獻嘅問題。

滴漏效應？No way~!

Max Wong 王慧麟 — Mon, 06 Jul 2026 00:46:47 GMT

英帝真係幾奇怪：原本呢，下個月先至係換首相，依家仲應該係貪施及其團隊執政。但係就搞到好似看守政府咁樣，冇事可為。依家傳媒係追逐緊估領袖嘅遊戲：北天王賓含會揀邊個做財相，邊個會in邊個會out等等，估到不亦樂乎。但係呢，因為世界杯關係，依家仲係以波為主，政策先放兩旁。但外界點解關心財相呢？因為倫敦財金界人士好很擔心，賓含唔係「解決」問題，而係「搞大」個問題。

早前英帝果啲跑政治beat嘅資深記者就埋怨，賓含佢響一啲重要講話之後，冇留低答問題，無辦法去解讀佢嘅心裡想法云云。咁賓含亦逐步同政治記者做專訪啦。有一個回應我覺得相當重要：佢唔相信滴漏效應。

我要做精英

Max Wong 王慧麟 — Tue, 30 Jun 2026 22:40:47 GMT

上周《明報》編輯問到，炎炎夏日，處身英帝有乜嘢書可以讀。咁其實畀多咗個機會去讀完一本書。因為早前有個書介講過，點解依家西方社會嘅向上流動冇咗？係未越讀書越冇用呢？於是就買咗本書，準備坐飛機果陣睇。結果呢？

冇帶上飛機，哈哈～～於是就時不時就揭一章嚟睇：呢本書係Aaron Reeves and Sam Friedman (2024) Born to Rule: The Making and Remaking of the British Elite (Belknap/Harvard)。

迎接新左

Max Wong 王慧麟 — Sun, 21 Jun 2026 22:13:49 GMT

冇啦，今日響英帝各大傳媒，都講緊為咗避免黨內分裂，貪施應該最快響星期一，同全世界講拜拜。最大嘅可能呢，係提出一個下台嘅時間表，咁樣佢就可以令繼任人有序咁樣選出同埋接替。西方呢啲咁落後同腐敗嘅所謂民主自由體制方面，係唔同足球，你唔可以霸住個茅廁唔拉屎，該走就要走。如果貪施真係為自己派系著想，希望自己下台後，自己啲心腹派系仲可以響新政府果度擔任一官半職，最好就係華麗下台前，同繼任人傾下，安插番邊個果個做番閣員。如果唔係，一旦繼任人需要經過腥風血雨先至可以出任首相，通常就會大開殺戒，貪施派系就會全軍覆沒。

所以，我今日響明報寫嘅，就係貪施之敗。我總覺得，佢敗於路線之爭，即係果套又砌又傾不左不右，來自新工黨貝理雅嘅嘢，已經唔入流：https://news.mingpao.com/pns/%e5%89%af%e5%88%8a/article/20260621/s00005/1781973631203/%e5%91%a8%e6%97%a5%e8%a9%b1%e9%a1%8c-%e4%b8%80%e8%b7%af%e5%90%91%e5%b7%a6

禁社媒？

Max Wong 王慧麟 — Tue, 16 Jun 2026 08:08:31 GMT

好多人未必明白，明知冇可能嘅嘢，政府都要照做。呢樣嘢就係禁止16歲以下嘅學生用社媒。查實呢件事都講咗多年，工黨上台之前一直都有組織去嘈，原因係久唔久就有學生因為社媒嘅欺凌，令到青年走上自殺之路。後來工黨就take up件事，都兜兜轉轉搞咗好耐，見到澳洲都有立法，咁上月都放風話要做，今次講就講年底會搞，下年初實施。依家係講緊，係果個限制要幾大。因為澳洲嘅經驗睇到，有六成幾嘅青年都係有方法繼續用社媒，佢地會有各種各類嘅規避方法，搞到個禁令形同虛設。

繼續清洗

Max Wong 王慧麟 — Tue, 09 Jun 2026 22:08:12 GMT

唔好意思。本周較忙，因為要趕緊一本書，同埋等埋一啲消息咁啦。言歸正傳。家陣留意乜嘢？英帝曼市補選，仲有幾日就投票。如無意外，曼市市長賓含應該會成功贏得選舉。今日事忙，就用「懶人分析法」，即係賭波公司的盤口粗略地睇一次，搵埋AI幫手手去追蹤。近一個星期，賓含嘅走勢，用香港常用嘅賠率計算方法，大概係1.17。點解呢？買100蚊的話，如果你贏咗，會畀番117蚊你，即係贏咗17蚊。係未當頭大熱門？當然啦。

尋找路線之旅

Max Wong 王慧麟 — Mon, 01 Jun 2026 12:09:45 GMT

執筆之日，媒體陸續爆料，指周一（即今日），英帝會公布有關文德森事件的大量文件，特別係內容之中，會有好多關於各部門高層之間關於佢任命前後嘅討論。睇來關於佢嘅任命問題，隨時會燒埋其他在任高層官員。係呀，點解人人會怕Q咗文德森呢？因為呢個係食四方飯嘅「刁」王，可以縱橫穿梭全球政經高層，幫老細們排難解紛，所以做事踩界，不以為然。呢個就似政治版嘅Epstein，亦係顯示出，響冇政治路線冇政治理念下，純綷政治權力交換下嘅政客，係點樣搞政治。

𢳂走舊電池

Max Wong 王慧麟 — Tue, 26 May 2026 09:17:17 GMT

唔好意思，病了幾日。早兩日右邊臉痛到飛起，幾乎做唔到事。所以，真係應該注意身體多過社會事務。痛到飛起之事，一早起身就睇住台灣果邊的事務，除咗苦笑之外，就真係帶點無奈。因為見到馬英九記者會單嘢，係好無奈嘅。

一個前領導人，為咗要清除內鬼，搵番舊部屬去調查。咁點知原來基金會裡面有內鬼二號，遲遲唔肯交出調查報告，於是唯有叫舊部屬去爆料。舊部屬爆完之後，內鬼一號同二號夾埋就猛砌呢位舊部屬有古怪，呢位領導人有失智，連呢位領導人嘅家屬都扯埋入呢件事當中。

迎賓

Max Wong 王慧麟 — Mon, 18 May 2026 22:14:52 GMT

Now, whether you like it or not，工黨黨內左翼大將，北天王實含終於落場。可能我響社媒成日㩒佢嘅消息，依家我部機全部都係佢嘅訊息。我唔係生神仙，又冇水晶球，之前有睇開我之前嘅文章都知道，早幾個月，我有同付費用戶講過北天王賓含南下救亡嘅情況。係㗎，人睇我睇同樣嘅資料，點解我會觀察到北天王會南下救亡先至係最重要嘅政治轉折呢？呢啲就係不斷學習同思考先至敢寫嘅，係咪？

英帝首相平均一年一個。如果讀者你響五年前避秦遷英呢，應該睇住波叔、列斯姐、印度辛、貪施，同埋依家準備晒要接手嘅賓含。一年一個嘅意思係，英帝就係不斷咁尋找方向。波叔係中間偏右，列斯姐走極右，印度辛回歸中道，貪施係中間偏右，全部都係短命收場。我一直響度講，問題係經濟上唔掂，冇晒方向。英帝依家係咪需要一個強而有力嘅領袖，無論係極右或者極左，就拆Q晒佢體制，搏一鋪翻身呢？

拔施、拱賓

Max Wong 王慧麟 — Tue, 12 May 2026 09:49:23 GMT

原本周一已寫好，今日要由頭寫過。尋日仲估計，貪施冇咁快會走人。佢會拖下拖下咁樣，大概我估都係會拖到暑假後咁樣。而且，周一早上啲跡象係睇到，貪施似乎可以拖下拖下拖落去。不過周一下午形勢就急轉直下，似乎佢都hold得好辛苦。我初時仲係估計，黨內極左路線係想等曼市北天王「賓sir」入去國會先，然後再挑戰相位。依家個形勢係似，點樣可以畀貪施比較有體面地下台。

「拔施」，開始

Max Wong 王慧麟 — Tue, 05 May 2026 16:02:27 GMT

網上傳來，英帝前首相馬卓安一個訪問。佢提到，英帝近年，頻頻換首相，咁搞法真係唔掂。佢擔心嘅應該係個政府冇一個長遠嘅政策去處理問題。佢又提到，佢地果堆Old Seafood，覺得做政府呢，就應該為令下一代人得益，而唔係禍延後代。佢嘅講法，聽落好似至理名言，但就冇觸碰到一個實際嘅問題：依家個社會已經唔係好似佢做首相果陣，可以推動一啲「小修小補」就可以搞得掂，似乎依家個經濟及社會形態，係等待緊，又或者咁講，需要一場大嘅變革。