ممكن تلقى نفسك تنفر من شخص بدون سبب واضح او تتعلق بشخص رغم انك تعرف انه ما يناسبك او تزعل من موقف بسيط بينما السبب الحقيقي مو الموقف نفسه لكن اشياء قديمة تراكمت داخلك وكل موقف جديد يلمس نفس الجرح

وعلم النفس يقول ان الانسان غالبا ما يتصرف بناء على اللحظة فقط لكنه يتصرف بناء على تجاربه السابقة وخوفه واحتياجاته وحتى الاشياء اللي انحرم منها وهو صغير ممكن تأثر على علاقاته وهو كبير

وعشان كذا بعض الناس اذا حسوا ان احد بيتركهم يبدأون يبتعدون قبل لا ينتركون وبعضهم اذا خافوا من الخذلان يصيرون باردين وبعضهم يتعلقون زيادة لأن داخلهم خوف مستمر من فقدان الشخص

المشكلة ان الانسان احيانا يحاول يحمي نفسه بالطريقة اللي تضر نفسه اكثر فهو يهرب من العلاقات عشان ما ينجرح فيعيش وحيد او يشك في الناس عشان ما ينخدع فيخسر ناس كانوا صادقين معه او يكتم مشاعره عشان ما يظهر ضعيف فيتحول الكتمان مع الوقت الى ثقل داخلي

والوعي الحقيقي بالنفس مو انك تعرف وش تحب ووش تكره الوعي الحقيقي انك تعرف ليه تتصرف بالطريقة اللي تتصرف فيها وليه بعض الكلمات تأثر فيك اكثر من غيرها وليه بعض الاشخاص تحديدا يقدرون يحركون مشاعرك بسهولة

يمكن اكبر خطوة في فهم نفسك انك توقف عن سؤال وش فيني وتسأل نفسك وش اللي صار فيني لأنك مو بالضرورة شخص صعب او بارد او حساس زيادة يمكن انت انسان تعلم من تجاربه طريقة معينة للبقاء ويمكن هالطريقة كانت تحميك زمان لكنها اليوم صارت تمنعك من الراحة

وفي النهاية الانسان ما يحتاج يصلح كل شيء داخله بيوم واحد يكفي انه يبدأ يفهم نفسه بدون قسوة لأنك اذا فهمت سبب خوفك بتقدر تواجهه واذا فهمت سبب تعلقك بتقدر تتحكم فيه واذا فهمت جروحك بتبدأ تفرق بين الماضي وبين اللي قاعد يصير معك اليوم

يمكن النضج الحقيقي مو انك ما تتألم النضج انك تعرف وش سبب ألمك وما تخلي ألمك هو اللي يقرر حياتك

احنا غالبا ما نتصرف بناء على الحقيقة قد ما نتصرف بناء على تفسيرنا للحقيقة ممكن شخص يتجاهلك فتقول انه ما يبيك وممكن شخص ثاني يتجاهلك وتقول يمكن مشغول نفس الموقف لكن عقلك صنع قصتين مختلفتين لأن اللي يحكم شعورك مو الحدث نفسه قد ما يحكمه المعنى اللي اعطيته للحدث

وهنا تبدأ المشكلة الانسان احيانا ما يدافع عن الحقيقة هو يدافع عن الصورة اللي كونها عن نفسه لو اعترف انه غلط ممكن تنهدم صورة الشخص العاقل اللي بناها عن نفسه ولو اعترف انه متعلق ممكن تنهدم صورة الشخص القوي ولو اعترف انه خايف ممكن يضطر يواجه اشياء قضى سنوات وهو يهرب منها

والاغرب ان الانسان ممكن يتعود على ألمه لدرجة انه يعتبره جزء من هويته يصير الحزن مألوف اكثر من الراحة ويصير القلق طبيعي اكثر من الطمأنينة ويصير الشخص يبحث عن العلاقات اللي تؤذيه مو لأنه يحب الاذى لكن لأن عقله تعود على نمط معين وصار المألوف عنده اكثر امانا من المجهول

عشان كذا مو كل شخص يهرب من الشيء اللي يكرهه احيانا الانسان يتمسك بالشيء اللي يؤذيه لأنه يعرف كيف يتعامل معه لكنه ما يعرف كيف يعيش بدونه

وهنا يجي السؤال اللي يمكن يكون اثقل من كل شيء

اذا كانت قراراتك متأثرة بطفولتك وتجاربك وخوفك واحتياجك للقبول وصورتك عن نفسك فكم قرار من قراراتك كان فعلا اختيارك

يمكن الحرية مو انك تسوي اللي تبيه الحرية الحقيقية انك تعرف ليه تبي الشيء قبل ما تسويه

لأنك اذا ما فهمت دوافعك ممكن تقضي عمرك وانت تسمي خوفك حذر وتسمي تعلقك حب وتسمي هروبك راحة وتسمي غرورك كرامة

وفي النهاية يمكن اخطر سؤال مو من انا

يمكن السؤال الحقيقي هو

كم جزء مني صنعته انا وكم جزء مني صنعته الأشياء اللي صارت لي

إذا كنت ما تقدر تفرق بين اللي تبيه فعلًا وبين اللي تعودت تبيه فأنت مو حر وإذا كنت تغضب من كل فكرة تخالفك فأنت غالبًا ما تدافع عن الحقيقة أنت تدافع عن هويتك لأن الإنسان ما يخاف من الكذب قد ما يخاف من انهيار الصورة اللي بنى عليها عمره ويمكن لهذا السبب بعض الناس يفضل يعيش مخدوع طول حياته ولا يعيش دقيقة واحدة وهو يعيد تعريف نفسه لأن الحقيقة ما تكسر أفكارك فقط أحيانًا تكسر الشخص اللي كنت تعتقد إنك تعرفه

بعلم النفس يسمون هالشي نوع من الدفاع عن النفس مو لانك شخص كذاب لكن لان عقلك يبي يخفف عنك الصدمه والمشكله انك كل ما كررت الكذبه صارت جزء من شخصيتك وصرت تتصرف على اساسها حتى لو كانت بعيده عن الواقع

والغريب ان اكثر الناس اللي يقولون انا اعرف نفسي هم احيانا اكثر ناس يهربون منها لان معرفة النفس تحتاج شجاعه مو ذكاء تحتاج انك تواجه الاشياء اللي كنت طول عمرك تدفنها مو تبررها

اول لحظة تعترف فيها بالحقيقه حتى لو كانت مؤلمه هي بداية التغيير لان الانسان ما يقدر يصلح شي وهو ينكر وجوده

الإنسان يحب يصدق إنه يعرف نفسه لكن أول ما يتغير مكانه أو الناس اللي حوله أو الظروف اللي يعيشها يكتشف إن نص شخصيته كانت مجرد رد فعل للبيئة مو حقيقته ولهذا فيه ناس إذا فقدوا وظيفة أو علاقة أو مكانة يحسون إنهم ضاعوا لأنهم كانوا متعلقين بالدور أكثر من الشخص اللي يمثل الدور

العقل مو دايم يدور على الحقيقة أحيانًا يدور على الشي اللي يحافظ على توازنه حتى لو كان كذب ولهذا بعض القناعات تعيش سنين مو لأنها قوية بل لأنها ما انختبرت وكل ما تهرب من اختبار أفكارك تزيد ثقتك فيها بدون ما تزيد صحتها وهذي من أخطر الأشياء لأن الثقة ما تعني إنك صح مثل ما الشك ما يعني إنك غلط

إذا كنت تبي تفهم إنسان لا تسمع وش يقول عن نفسه شوف وش يكرر كل يوم لأن التكرار يفضح الحقيقة أكثر من الكلام الإنسان يصير نسخة من عاداته أكثر مما يصير نسخة من نواياه وكل عادة تتكرر تحفر داخل عقله طريق يصير يمشي فيه بدون ما ينتبه

وفي النهاية أكثر شيء يخوف الإنسان مو إنه يكتشف إن العالم مختلف عن توقعاته أكثر شيء يخوفه إنه يكتشف إن الصورة اللي بناها عن نفسه طول هالسنين كانت ناقصة لأن أصعب حقيقة مو الحقيقة اللي تغيّر رأيك عن الناس أصعب حقيقة هي اللي تغيّر رأيك عن نفسك

الغريب إن الإنسان يقدر يعيش سنوات وهو يفسر كل موقف بطريقة تخدم قناع معين لابسنه يمكن يشوف نفسه ضحية بكل قصة ويمكن يشوف نفسه دايم الصح ويمكن يقنع نفسه إنه قوي وهو بالحقيقة خايف يواجه أضعف نقطة فيه العقل بارع في صناعة الأعذار أكثر من صناعة المواجهة وإذا تعود يهرب من الحقيقة يصير الكذب على النفس أسهل من الاعتراف

الناس تظن إن أكبر معركة بينها وبين العالم لكن بالحقيقة أكبر معركة داخل الرأس لأن كل قرار وكل شعور وكل رد فعل يمر أول على تفسيرك للأشياء مو على الأشياء نفسها ولهذا شخصين يعيشون نفس الموقف واحد يطلع منه أقوى والثاني ينهار لأن اللي كسرهم مو الحدث اللي كسرهم المعنى اللي أعطوه له

وأحيانًا أكثر شخص يخدعك هو نفسك لأنها تعرف وش الكلام اللي يخليك تنام مرتاح وتعرف وش الحقيقة اللي لو اعترفت فيها بتضطر تتغير والتغيير مؤلم لذلك العقل يفضل يحافظ على عاداته حتى لو كانت تأذيه على إنه يبدأ من جديد ولهذا مو كل راحة دليل إنك بالطريق الصح أحيانًا الراحة مجرد علامة إنك وقفت تواجه نفسك

إذا تبي تعرف نفسك فعلًا لا تسمع كلامك عن نفسك راقب أفعالك وقت الغضب وقت الخوف وقت الغيرة وقت الخسارة هناك الشخصية الحقيقية تطلع بدون مكياج لأن الإنسان إذا سقطت عنه الحاجة إنه يبان بصورة معينة يبدأ يبين مثل ما هو فعلًا وهناك تبدأ أول خطوة للفهم الحقيقي

إحنا نحب نقول هذي شخصيتي لكن من قال إن شخصيتك شيء ثابت يمكن هي مجرد مجموعة دفاعات بنيتها عشان تنجو من مواقف قديمة وكل ما كررتها حسبتها أنت المشكلة إنك إذا طولت تعيش داخل هالدفاعات تنسى أصلًا وش كنت قبلها وتصير تدافع عن سجنك لأنك سميته هويتك

مو كل شعور صادق ولا كل فكرة تستحق التصديق العقل يقدر يخلق خوف من شيء ما صار ويخلق ذنب على شيء مو ذنب ويخلق يقين كامل بشيء ما عنده عليه دليل لأن وظيفة العقل مو إنه يعطيك الحقيقة دائمًا وظيفته الأولى إنه يخليك تستمر حتى لو كان الثمن إنك تعيش داخل وهم مرتب

وأخطر مرحلة يوصل لها الإنسان يوم يصير يرفض أي فكرة تهدد صورته عن نفسه مو لأنها غلط لكن لأنها تكشف له إنه عاش سنين يبني حياته على تفسير واحد ولو انهدم هالتفسير بينهدم معه جزء كبير من إحساسه بنفسه لذلك كثير ناس يدافعون عن معتقداتهم بعنف مو لأن عندهم أدلة أكثر لكن لأن عندهم خوف أكبر

يمكن الحقيقة ما تؤلم لأنها قاسية يمكن تؤلم لأنها تجبرك تعترف إن الشخص اللي كنت متأكد إنك تعرفه طول عمرك ممكن يكون مجرد نسخة صنعها الخوف والعادة والظروف أكثر مما صنعتها إرادتك