جيته شر على اهله على البشر على كل شي بهالدنيا شر

عقوووبة عقوبة مسلطه ربي على البشر مو البشر لحالهم حتى الحيوانات

كان يلحق كبير الذيابه ويقعد يطعن به

ولدها هذا الله يسلمكم اسمه ثابت بن جابر ملقب بـ تابط شرا بتسالوني ليش بعلمكم ليش

سلمكم الله في يوم طلعوا يصيدون هو وباقي عيال عمومته ويوم عود ماجاب شيء من الصيد لامه

ف قامت تهاوشه ميمته قالت انت ماتوحي للي حولك وعيال عمك كل ماطلعوا للصيد جابوا من الخير لاهلهم

وانت مو فالح الا بالشر ! قال افااا يايمه الا ابشري ابشري باتسر اطلع اصيد واجيب لك

ويوم جا باتسر وطلع ثابت للبر وماخلا حيه تزحف على هالارض ولا عقربن يسم الا وحطه بالكيس اللي معه

و عود وهو كان حاط الكيسه تحت ابطه ويوم يدخل الا بالكيسه في صوت خربشه من كثر الحيايا اللي بها

وهاا يمه ابشري بالصيد ابشرريبي وتهلي وهلا ولدي ايه هذا وليدي قال اي اي ابشري وحط الكيس عندها وطلع ويوم امه فتحت الكيس الا تنقز الحيايا عليه وهي تطلع وتصارخ وتجرد حالها ياويلي ويتجمعن حريم الحاره وثابت كان شايلها وش صار وش صار قالت شايلها الا متابطها تحت ابطه وجابه لي

ولقبووه ب تابط شرا

تابط شرًا ابوه متوفي ف جا واحد مقرووود حظ اسمه ابو كبير الهذلي تزوج ام تابط شرا الوكاد ان تابط شرا مايدانيه

كان كل مايجي يقعد يوايق فيه ويبحلق ويقز ويقز

لين مازقت معه وراح لحرمته قالها يامره والله ماعاد اجيتس قالت ليش وشحصل قال ترا ولدتس ذا اتعبني وقروشني كل ماذا وجيتس قزني بعوينات الحصني! قالت شوف انت تحايل عليه وخذه عساس تغزون واذبحه

قال أنتِ صاحيه أنتِ تبيني اذبح ولدتس قالت اذذبحه يابن الحلال فكنا منه انا لو اقدر من عشر سنين ذابحته

الوكاد راح لحنشل واتفق معهم من اقوى الحناشل بذاك الوقت وعود لتابط قال ماودك نطلع نغزي قال مين تكلمني انا قال اي اي انت ياثابت ماودك تخاوي نغزي قال يلا قدام

ويمشون لمده يومين وابو كبير الهذلي ذبحه الجوع يومين يمشون ما اكلوا شيء قاله ياتابط ماودك نوقف ناكل شيء رد عليه يويطي استرجل استرجل لايكثر هالحتسي قال ياولد انا الجوع اكل بطني خلاص خل نوقف قاله تابط يابن الحلال تولجتنا شتبي الحين ؟ قال ابي اوقف انا كبير ماقدر امشي بوقف وانت روح دور لي اكل وتعمد ابوكبير يوقف بالمكان ذا عشان الحنشل قريبين وشابين نارهم ويبي تابط يشوف نارهم ويروح

وصحيح راح تابط لنارهم وهم يشوفونه ويلحقونه ويزرق تابط ومن قرادة حظه اللي يلحقونه كلن اسرع من الثاني الوكاد يوم يوقف تابط ويصد الاول ويذبحه ويلحق الثاني ويذبحه ويروح لنارهم ياخذ الاكل اللي بقى ورجع لزوج امه و زوج امه ابو كبير يقعد يوايق فيه هذا مامات؟؟؟ عوذااا قال انت وشفيك وش صار قال تابط مايعنيك هالحين كل من الانعام ماكفاك وامش نكمل طريقنا وابو كبير يقول انا ذبحني النوم ابي امرح ويلتفت على تابط ويقوله اسمع انا بمرح اول الليل وانت اخره عشان نحرس بعض فاهم وقال تابط مايخالف امرح امرح وينام اول الليل ويصحى ويقول يلا امرح انا بحرسك ويقول ابو كبير انا ناويه بردى نااويه بشر وتابط مواصل يومين ولين يمكنه النوم واذبحه ويوم شافه تعمق بالنوم يمسك رضمه ويرميها بعيد ويفز تابط وش العلم وش هالصوت قلت يمكن من البل ويروح تابط يوايق على البل ويشوف مالقى شيء ويرجع ينام و ابو كبير شافه مرح مره ثانيه وتعمق بالنومه واخذ حصى صغيييره ويرميها ويفز تابط يقول ياولد ماسمعت هالصوت قال ابوكبير يمكن البل يمكن من البل ويروح يوايق على البل مالقى شيء يقول يرجل انا شفت البل ماتحركت من مكانها انا مو مرتاح لك بس الوكاد انا معاهد الله لو طلع صوت مره ثانيه اني لا انحرك هنيا وهو يعود يرقد

ويبلع العافيه ابو كبير ويروح يحرس البل عشان ماتطلع اصوات ويصحى تابط وينحر يدري به افعال مو بس كلام ويرجعون الديره و يكتب ابو كبير الهذلي ابيات بتابط شرا

فإذا نظرتَ إلى أسرّة وجهه

                     بَرَقَتْ كَبَرْقِ الْعَارِضِ المُتَهَلِّلِ

وَإذَا قَذَفْتَ لَهُ الْحَصَاة َ رَأَيْتَهُ

                     يَنْزُو لِوَقْعَتِهَا، طُمُورَ الأخْيَلِ

وإذا رميتَ به الفجاجَ رأيته

                 يهوى مخارمها، هويّ الأجدلِ

هههههههه صدق البس مايحب الا خناقه

انتهت قصتنا لليوم شاركوني رأيكم .

ض(  محاربة ) بالاسلام اللي قاتلت في معركة احد مع الرجال ورسول الله محمد ؟

سلمكم الله هذي اول شهيدة في الاسلام ( نُسيبة بنت كعب ) امراة من قبيله الخرزج

قاتلت في معركة احد عام ٣ من الهجرة دفاعًا عن رسول الله محمد

هي اول امراة بايعة النبي صلى الله عليه وسلم في بيعة العقبة الثانية

تزوجت نسيبة من ( زيد بن عاصم ) وجابت لها وغدين منه عبدالله و حبيب ابناء زيد ، حبيب بن زيد اللي استشهد على يد مسيلمه الكذاب " اذا حالفني الوقت في يوم راح اكتب قصه مسيلمه الكذاب واستشهاد حبيب على يده " الوكاد توفى زيد وتزوجت من ( غزية ابن عمرو  ) من نفس قبيلتها يقال انه كان ولد عمها

يوم شاركت بالغزوة كان هدفها فقط تداوي المصابين وتسقيهم الماء ومن هالاشياء

لكن لما شافت المسلمين يتفرقون وينذبحون والوضع في خطر جدًا .. لاحظت ان الرسول صلوا عليه ماحوله احد واغلب المجاهدين ابتعدوا ماحوله من يحميه

هنا اخذت سيف احد المصابين / الجرحى اللي كانت تداويهم وبدأت تقاتل هي بنفسها دفاعًا عن الرسول صلى الله عليه وسلم بكل شجاعه لين ما ربي كتب انها تنصاب بـ ١٣ اصابة ! و بعد وفاة النبي قاتلت بمعركة اليمامه السنه ١١ من الهجره في عهد الخليفه الجليل ابو بكر الصديق و انقصت يدها وهي تقاتل مسيلمه الكذاب وفي رواية منقولة صحيحة

قال عنها الرسول صلى الله عليه وسلم

{ ما التفت يمينًا ولا شمالًا يوم أُحد إلا و نُسيبة أراها  تقاتل دوني }

توفيت نسيبة في عام ١٣ من الهجرة في عهد الخليفة عمر بن الخطاب

انتهت القصة ، رضي الله عنهما جميعًا

صلوا على النبي واكثروا التسبيح والاستغفار

اي رأي واقتراح اكتبوه

ايوب عليه السلام اعطاه الله من البنون والبنات سبعة

واعطاه مال وخير وأصحاب وشيء يهوول

وكان من تواضعه وطيبه يعطف على الفقراء والمساكين ويرعى الارامل ويكرمهم

وكان يدعو اهله واهل بلدته اللي كان مرسل لهم لعبادة الله مالكم بالطويله

ربي شاء انه يختبر صبر عبده ايوب .. وش حصل ؟

ابتلاه ربي بـ انه يخسر : تجارته ، ماتوا ضناه ، وصابه مرض قوي لين صار مقعد ! وسبحان من نزع قبول الناس منه ! نفروا اهل بلدته وطرده خوف انه يعديهم بمرضه ! ومابقى معه الا ( زوجته) تحبه وتموت عليه وصابره على انها تخدمه لو يبي عيونها عطته

وصل بها الحال عشان تهتم به إنها تشتغل خادمه في بيوت اهل البلد! بس عشان تلقى لقمه عيش توكلها هي وزوجها وتدرون كم استمر هالبلاء اللي ابتلاه ربي في النبي ايوب ؟

٨٠ سنة ! ثمااانين سنة متخيلين ؟ وهو صابر ولا اشتكى الا لربه حتى حرمته ماكان يشكي لها !

ولما وصل بهم الحال اللي وصلوا له من التدهور

قالت حرمة النبي ايوب : لو دعوت ربك ليفرج عنك

رد عليها : كم لبثنا في الرخاء ؟

قالت : ثماانين سنة !

قال لها : فـ والله اني استحي من الله لأني ما مكثت  في بلائي المدة التي لبثتها في رخائي

وعصبت حرمته و ضاقت فيها وقالت: الى متى هذا البلاء!

فـ عصب عليها ايوب عليه السلام و حلف بالله انه لايجلدها بالسوط ميه جلدة اذا شافاه الله !!! فكيف تعترضين على قضاء الله ! وبعد ايام خافوا الناس اللي كانت تشتغل عندهم حرمة ايوب انها تنقل لهم مرض زوجها ف معد لقت احد تشتغل وتكسب اجر منه

فقررت انها تقص ظفيرة شعرها وتبيعها لحرمة غنيه عشان تعطيها مال يكفيها هي وزوجها

ويوم عطتها لنبي ايوب قال لها : من اين لكي هذا ؟

ماردت عليه باجابه .. وفي اليوم الثاني باعت ظفيرتها الثانيه وتعجب منها وش هالفلوس اللي تجي

و ألح عليها الا تنزل حجابها ويشوف شعرها

فنادى ربه نداء تأن له القلوب لكن استحى من الله يطلب الشفاء وانه يرفع عنه البلاء فـ قال مثل ماجاء بكتاب الله الكريم :{ وَأَيُّوبَ إِذْ نادى رَبَّهُ أَنِّي مَسَّنِيَ الضُّرُّ وأنت أَرْحَمُ الرَّاحِمِينَ }

وجاء الامر من بيده الامر

{ فَاسْتَجَبْنَا لَهُ فَكَشَفْنَا مَا بِهِ مِن ضُرٍّ }

وقال تعالى اركض برجلك هذا مغتسل بارد وشراب

وقام متعاافي و صحته رجعت افضل من ما كان عليه

والصدمه! لما رجعت حرمته ماعرفته وسألته : لو سمحت هل رايت مريض هنا ؟ فقال لها : ما عرفتيني؟

قالت له : ومن أنت؟ قال : انا ايوب .. ربي سبحانه ما اكرمه لحاله اكرم حزمته معه و رجعها لشبابها و ولدت سته وعشرين ولد ! مثل ماقال سبحانه وتعالى: { وَآتَيْنَاهُ أَهْلَهُ وَمِثْلَهُم مَّعَهُمْ رَحْمَةً مِّنْ عِندِنَا وَذِكْرَىٰ لِلْعَابِدِينَ }

وبخصوص الحلف اللي حلفه

ااخ اااخخ رفق الله ب حرمة ايوب وأمره يضربها بخفه بعصى من قش ! 🥺

وانتهت قصتنا اليوم .. اخذوها عبره الصبر على البلاء قربة لله عز وجل و في قول اخر { وَبَشِّرِ الصَّابِرِينَ ۝ الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ }

حفظكم ربي بحفظه ورعايته 💐 .

ماقد جا ببالكم مين سعدون وش قصه صبره ومين عقاب اللي جا فرج فجأة لسعدون ؟

اذا جاء اوكيه واذا ماجاء الشكوى لله

هذا سلمكم الله سعدون العواجي فارس وشيخ من مشايخ عنزة لـ قبيلة ولد سليمان من عنزه تسكن في نجد وبوسط هالقبيله كان فيها شاب صغير سن يقال له  سعدون العواجي ، سعدون كان وغد زي اي وغد يلعب ويروح ويجي لكنه يوم كبر شوي بدا يحب ويتعلق بالمبارزة والفروسيه وكان يحب مره يشوف الفريس كيف يعودون بعد الغزو ومعهم خيول كثيره  حتى لما كانوا العيال يقولونه تعال العب معنا وخل عنك كان يسكب لهم ويتملق بالفرسان وكيف يركبون الخيل وكيف يحولون منها بالمختصر تفاصيل مايدقق فيها الا فارس اصيل ولد فارس

سعدون ماكان يمنعه هالشيء الا صغر سنه ماكان قادر انه يقلط عليهم ويجرب

الييين كبر وصار يداهم مع الرجال وينطق انه بيتعلم

ولان سعدون من بيت شيوخ تفوق على اقرانه بالمختصر ولد شيخ كانوا الرجال يخلونه يدهم معهم ويقولون هذا ولد شيخ خلوه يدخل وبدا يتعلم الرمايه والفروسيه واشياء لازم يتعلمها اي فارس

مرت الايام والاشهر والسنين لييين غدا سعدون ماعاده سعدون الوغد اللي نعرفه سعدون كبر وفارس فارسسس مايشق له الغبار

وصلت به الفروسية والفطنه والحنكه اللي هو فيها لمرحلة يصير شيخ على قومه ! صار هو اللي يقود ربعه ويغزون سوا ، مايذكرون ربعه ان سعدون قد رجع بدون غنيمه .. بالمختصر ماقد انهزم بمعركه قط

كان فيه سطاااوه كبيره لدرجه لما يغزي قبيله اذا درت القبيله ان غازيها سعدون تتفقد ربعها ( سلمتوا ؟ مات منكم احد ؟ عسى الحلال لايعود اهم شيء سلمنا من سعدون ! )  ومن قوه هيبه سعدون اذا في فارس قابل سعدون في معركه وينجو " بدوون مايشوف سعدون " كان يتفاخر بهالشيء انا اينعم اناا  قابلت سعدون في معركه ماكان يبحث على انه يهزم سعدون لانها كانت مستحيله لا لا هو يقول انا قابلته بس بمعركه ولو يدققون العرب بكلامه يلقون انه ماواجه سعدون وجه لوجه بس انه كان يعرف اللي غزاهم سعدون ههههه هذا الشيء كان يرفع بالسي في حقه لدرجه لو راح يخطب وقال هذي السالفه زوجوه بنتهم لمجرد هذا السبب ، قدرتوا تستعبون قمه الدهاء والقوه اللي ب سعدون العواجي ؟

الوكاد مرت به السنين ثم كبر  شاخ على ربعه وهو بعمر صغير

كان عنده  عادة يذكرونها العربان بوقتها

كان يجمع الربع بمجلسه ويقول عدوا لي الفريس اللي موجودين حولنا ف يبدون يذكرون له كل فارس وفعله الطيب و ش سوا ، سعدون ماكان يسال عشان ينافسه او يستنقص منه  .. لا كان يعشق ويسعد مره اذا سمع عن الفرسان وقوتهم ف كان كل رجال يسولف له عن فارس يقربه من يمه ويقوله  - قرب قرب - ويقعده يمه ويجلس يسمع منه عن هالفارس كان سعدون يتخيل شكل الفارس ومواصفاته كان يتمنى بعد ! انه يقابل هالفارس

و في يوم من الايام كان في رجال جالس مع ربعه ويسولف عليهم ، وقال لهم : يربع تتحدوني هاليوم اجلس يم سعدون ؟ وضحكوا عليه ربعه وقالوا : من انت عشان تجلس يمه ياحبيبي ما انت بحووله

وطخت براسه وقال لهم عزالله لاتشوفون فعلي هاليوم  واخذ من كل واحد منكم شاه ( خروف )ان رادفت سعدون اليوم  تسمعون العلم ؟ قالوا له : تم بس ورنا جيدك وش بتسوي

ويوم غابت الشمس وتتجمع الناس بمجلس سعدون

يتقدم هالرجل ويقول يالشيخ و يتملق به سعدون ويقوله وش عندك ؟ يرد عليه ويقول عندي والله العلم اللي يجوزلك ماظني انك قد سمعته ويقول سعدون ارخووو ابوي وش هالعلم ؟

ويتقدم عنده ويقول : يالشيخ سعدون يذكرون لنا رجال فعله والله انه يقارب لفعلك ماهوب بنفسه مير عنده من العلم الطيب قاله وانت تعرف من علومه شيء؟ قال له اعرف ! انا اعرفه واعرف ساسه

ويقوم على حيل سعدون ويقوله قرب قرب سولف لي عنه ، عاد ينبسط ذاك ويناظر اخوياه وقايل بيده هالشكل  👌🏼 ثلااثه ماينقص شيء

ويقوم عند سعدون ويهل السبحه عن رجال يقاله

" ولمان بن متعب الفدعاني العنزي " رجال ان كثرت وان قلت هالمراجل عزالله مايجون مثيله

كان ولمان ساكن ب سوريا ولمان كانوا العرب تهابه من كل جهه

و سعدون حبه وخصوص انهم من نفس القبيله

ويسولف عنه علومه وعن مبارازته وافعاله

لما جا ثاني يوم يقول سعدون وين صاحبي حق الامس

ويقوم هالرجل ويقول انا هنا طال عمرك ويناديه يكمل سوالف عن ولمان

مالكم بالطويله سعدون حبه وتعلق به وبسوالفه و تزوج بنته

ولمان كان عنده بنت زينها معروف بين بنات قرايبها والقريه اللي هم فيها

ربي عطاها وكملها من الحسن والجمال

تزوجوا وجاب منها ولدين احرار شهامه عيال شيخ

عـقاب - حجاب

شاء الله وصار خلاف كبير بين بنت ولمان و سعدون

وادى هالخلاف للطلاق

طلقها واخذت اغراضها وعيالها وراحت لسوريا عند اهلها

بالمناسبه عقاب وحجاب هاك الوقت كانوا وغدان صغار مايعرفون اي شيء عن اللي حاصل

الوكاد يوم راحت هي والهودج يم بيت ابوها

ويشوفها ابوها وهي ترتمي بحضنه وتصيح

وابوها اخذ عهد على نفسه انه لايصونها ويصون عيالها عيال الشيخ سعدون

ف بدا الشيخ ولمان يربي عقاب وحجاب

ويعلمهم الفروسيه والشيخه

ويقال انه شرا لكل واحدٍ منهم فرس اصيله

وكبر صيتهم بين خوالها الفدعان وكلن يدري بشيختهم وابوهم مين وجدهم مين !

خلونا نعود لسعدون

كان عند سعدون ولد عمه اللي اسمه - شامخ -

شامخ كان ينافس سعدون بمشايخه القبيله

حبه حبه بدا يشوش الناس عليه

يروح لمجالس الناس ويصير يمدح حاله ويقلل من سعدون ويطلع عنه كلام لين اللي بالمجلس ذا تاخذهم الحميه والعاطفه ويوقفون مع شامخ

حبه حبه يتعمد يفشل سعدون وحبه حبه يطلع للغزوات والمبارزات وياخذ معه القبيله بدون شيخ القبيله ! اللي هو سعدون لين شامخ شمخ وصار شيخ على القبيلة وصار يتحكم بسعدون بشكل مو طبيعي

كان يحرم حلال سعدون انه يسقيهم الا اخر الناس

واحرم سعدون يكرم ضيوفه و اخذ قصر سعدون اللي مبانيه كبيره ومميزه عن الباقي لانه بالمختصر شيخ

واعطاه بيت اقل مايقال عنه مايسكن كلب فيه !

وتركه على حدود المدينه

وانك تحرم بدوي و شيخ انه يكرم ضيوفه هذي مصيبه كبيره ! كبيرة حتى في كرامته

لين سعدون كره المدينه وكره انه يجلس فيها لانه شعر فيها بالذل  ف صار يطلع للصحاري ويقعد فيها ايام بعيد عن المدينه و  كتب له ابيات يقول فيها :

{ ‏ليا صار ما توفي عميلك من الصاع

‏ما ينقعد لك عند حصن النواهيم

‏شبرٍ من البيداء يعوضك بالافزاع

‏وسود الليالي يبعدنك عن الضيم  }

لين في يوم كان في صاحب ل سعدون

نسميه سعد

سعد جا يم سعدون وكان يعاتبه على وضعه كيف تحول كان شيخ واصبح لا شيء

وقاله : انا اعرف من يرد لك حقك ويطلعك من هذا الضيم ! رد عليه سعدون وقاله : منهو !

قاله صاحبه سعد : نسيت وغدانك ؟ قاله سعدون انه يوم راحوا سوريا مع امهم كانوا صغار ولا يدري عنهم

قاله صاحبه انه يدري وش صاروا عياله

حجاب وعقاب صاروا فرسان اساميهم تتردد على كل لسان من هيبه وشهامه وهذول عيال الفارس سعدون وجدهم ولماان

قاله صاحبه : انت شاعر وتكتب القصيد

اكتب من الابيات اللي اوصلها لعقاب وحجاب بسوريا وانا بنفسي بوصلها

قال سعدون :

{ ‏ياراكبٍ من عندنا فوق مهذاب

‏مامون قطاع الفيافي إلى أنويت

‏عند الفضيله عدّ يومين بحساب

‏أول قراهم قول ياضيف حّييت

-

‏وأسلم وسلم لي على عقاب وحجاب

‏سلم على مضنون عيني إلى ألفيت

‏بالحال خص عقاب فكاك الأنشاب

‏ينجيك كان أنك عن الحق عديت

‏قله ترى شامخ شمخ عقب ماشاب

‏وياعقاب والله ذلّلولي وذليت

‏وياعقاب حدّوني على غير ماطاب

‏وقالوا تودر من ورى الما وتعديت }

وثاني يوم راح سعد لسعدون وهو مصفي باااله

عشان يحفظ القصيده وماينساها

وقعد يردد القصيده وكل من كلمه قاله اسكتتت ما ابي انساها ما ابي انساها

الوكاد وصل سعد لسوريا وبالتحديد للمدينه اللي كان فيها عقاب

وعقاب كان معروووف شكله حتى اللي ماقد شافه يعرفه

شلون يانِهال معروف شكله و حتى اللي ماشافه يعرف ان ذا عقاب !؟؟

ايه كانوا يعرفونه ، عقاب كان يتميز بشواربه الطويله والعريضه وكان حمر عين

دخل سعد وقال وين عقاب ! رد عقاب عليه وقاله سم وش عندك

قاله سعد القصيده .. وفز عقاب واخوه وقرروا انه يعودون لديارهم لنجد مع مجموعه من الفرسان

بعد ماوصلوا لنجد لما طلعت الشمس

قاموا يدورون بيت ابوهم .. ومثل ماقلت لكم قبل انهم يحسبون ابوهم لازال بقصره اللي له عمدان طويله وداخل القبيله

لا هذاك تحول مثل ماقلت لكم شامخ اجبر سعدون يخلي بيته على هامش القبيله او حدود المدينه

راح عقاب ولقى بيت ابوه سعدون العواجي

ولقى ابوه نايم .. ماصحاه من النوم لكن كلم الراعي يقوم يسقي البل قبل القبيله

الراعي انصدم ! وقاله : من انت ؟ وكيف تبيني اخالف الشيخ شامخ ! هو قايل لنا مانسقي اول الناس نسقي اخر الناس

اجبره عقاب وقال رح انا معك

وتخفى عقاب بين البل واول ماوصلوا للبير

شاف شامخ الراعي ! وانجنن عليهم شامخ

كيف يخالف قراراتي ! و فز الا يبي يضربه

وهنا طلع له عقاب سعدون العواجي

شامخ اول ماشاف هالرجل عرف انه عقاب

كيف يا نِهال يادلخ انت وهو قايله لكم ان عقاب مشهور بشواربه الطويله والكبيره

وادرك شامخ ان عقاب وصل لما سمع قصيده ابوه اللي انتشرت بين اهل نجد

قفز شامخ من الخوف داخل البير

قاله عقاب : اطلع  يا شامخ

وعيا شامخ وقاله : ماراح اطلع هذا قبري ومكاني ماراح اطلع لين اضمن حياتي

قاله عقاب : الوحيد اللي بيضمن حياتك ويعفي عنك هو الشيخ سعدون العواجي

الوكاد سعدون عفى عنه بكل ترفع وسمو

ورجع سعدون شيخ القبيله وزعيمهم وذااع صيت عياله عقاب وحجاب بين القبايل

وبدا في معارك مختلفه ورجعت قوه القبيله

وفي يوم كانت في معركه بين هايس القعيط الشمري وعقاب وحجاب

ولكن رجعوا القوم بدون عقاب وحجاب ! سال سعدون عنهم وين عيالي ؟ وين عقاب اللي رجع صيت القبيله ومقامها وين حجاب !

قالوا والله ماندري

اليوم الثاني رجعوا لنفس ارض المعركه يدورون حجاب وعقاب

ارض المعركه كانت في ( ابرق الشيوخ ) في حدود نجد بالسعودية

الوكاد لقوا جثثهم في الارض هذي وقبروهم في نفس الارض

و ارثاهم سعدون العواجي وكتب :

{ ‏ياونـة ونيتهـا تـسـع ونــات

‏مع تسع مع تسعين مع عشر لوفي

‏مع كثرهن باقصى الحشا مستكنات

‏ عداد خلـق الله كثيـر الوصوفي

‏ونة طريح طاح والخيل عجـلات

‏ كسره حدا الساقين غاد ٍ سعوفي

‏على سيـوف بالملاقـى مهمـات

‏ سيفين أغلى ما غدا مـن سيوفي

‏وعلى محوص بالمـوارد قويـات

‏ أسقي بهن لـو ان ⁧‫القبايل‬⁩ صفوفي

‏احشم بحشمتهن ولو هن بعيـدات

‏ وأنام لـو ان الضـوارى تحوفـي

‏خليتني ياعقاب مـا بـه مـروات

‏ عيالك صغار والدهر بـه جنوفـي

‏من عقبكم ما نبكي الحي لو مـات

‏ ولاني على ⁧‫الدنيا ‬⁩ كثير الحسوفي}

الوكاد كان عند عقاب وغد

رباه جده اللي هو سعدون العواجي

وحلف لا ياخذ ثار ولده ب ولده

مالكم بالطويله سمع في يوم سعدون عن معركه بين هايس القعيط اللي هو وربعه ذبحوا عقاب وحجاب غدر  و غنيم بن بكر شيخ السويلمات من العمارات

هايس يتعزوى ب شمر وغنيم كذلك يتعزوى بربعه عنزة

استغل الموقف هذا سعدون و راح لولد عقاب

و عطاه فرسه وقاله : " ذباح ابوك قدامك  لاتعود الا براسه ! "

ويسج فرسه ولد عقاب وينطلق مباشرة لين يوصل غنيم ويدخل مع فرسانه

ويناظر بين الجيوش لين طاحت عينه على هايس

وهايس يعني شيخٍ معروف تعرفه بالنظر بين ربعه ولو ان الشيخ يكون بين الشاهد انه يوم طاحت عينه عليه

وينطلق هو وربعه يمه وهو يشد فيه ويشد ليين قفى به ويطرحه من ظهر فرسه ويقول له ولد عقاب : عرفتني !؟

ويرد هايس : والله مايطرحني الا ولد عقاب انت ولد عقاب صحيح !؟

ويرد ولد عقاب : ايبالله اني ولد عقاب واليوم اباخذ ثار ابوي

ويرد هايس ياولدي والله مو انا اللي ذبحته اللي ذبحه رجال من ربعنا !

ماهتم لكلامه ولد عقاب وقال له : الكلام هذا ماعاد ينفع

اللي ابيه منك لارحت لـ ابوي قله اني اخذت حقه وتعلمه بفعلي   

ويوم رفع سيفه ولد عقاب وهو يتلامع

ويقصصصص راااس هايس الا وراس هايس منطول بالقاع ويتدارج

وبكذا اخذ ولد عقاب بثار ابوه وعمه وعقاب اخذ حق ابوه من ولد عمه شامخ

انتهت قصتنا .. شرايكم بها ورأيكم يهمني ، واذا عندكم اقتراحات لقصص الايام الجايه يسعدني اسمعها 💐

في هذا الوقت قريت ابيات مووووجعة جدًا وتمس الحس الابوي جدًا .. لذا قررت اشارككم الابيات وقصتها

سلمكم الله هذا جحيش السرحاني تزوج من حرمه طيبة واهلها طيبين وصيتهم بالطيب معروفين و بلاه الله بثلاث عيال بتسالوني ليش قلت بلاه؟ بتقرون ليش

رباهم خوش تربية ودلعهم وفي هاك الوقت لما نرجع قبل هالوقت بستين الى تسعين سنة

الرياجيل لاغدى وغدة ١٢ وفوق سرحهم بالحلال و تولجهم بالمعازيب وهو ماكان يسرحهم من غلاه لهم مايبي يلحقهم مشقه بهالدنيا على كود مايسطى بهم لواهيب القيظ و مايوجع القلب الا يوم انه كبر وطاح عن حيله و يامرماش عقوا به الله لايبلانا ويستر على ضنانا ولايطيح احد عن حيله

الوكاد طاح عن حيله وغدى مثل الطفل يحبي

يوم انه يحبي وراح لبيت القعدة شافته حرمته وطردته وهماه يعود للوسطي ويشوفه ويصد عنه و يوم انه جا للصغير ويطرده وغدت سالفة طويله نام بالوادي وصحى مالقى حلاله يمه ولا ربعه واثاريهم ودوه لوادي ثاني وراحوا عنه

الوكاد انه دعى عليهم دعوة بـ قصيدة تووجع القلب بشارككم القليل منها و قال فيها :

يا عيال ما سرحتكم باللواهيب

يا عيال ما عمر المعزب ولاكم

يا عيال ما ضربتكم بالمشاعيب

ولاسمعوا الجيران لجة بكاكم

ياما توليت القبايل تقل ذيب

من خوف لاينقص عليكم عشاكم

وياما شريت السمن من عرض ما جيب

يفز قلبي يوم يبكي حداكم

وش علمكم يا تاركين المواجيب

حسبي عليكم هالردى منين جاكم

يا عيال بعتوني بصفر العراقيب

ماهي حقيقة سود الله قراكم

يالله عسى عماركم شمسها تغيب

يعتم قمركم ثم يظلم سماكم

عسى نساكم ما تحمل ولا تجيب

ولاحدٍ من البزران يمشي وراكم

اخسوا خسيتوا يا كبار اللغابيب

اهبوا هبيتوا يقطع الله نماكم

اااااه البيتين الاخيرة موجعة والله

وبعد بحثي العميق بالقصة و اسأله كثيرة ل اقارب هذا الشخص تبين لي ان ربي استجاب دعائه وانقطع نسل اولاده قيل انهم تزوجوا اكثر من ثلاث مرات لكن كانوا عقماء

انتهت قصتنا المحزنة وكفانا الله الشر والله يجعلنا قد برنا ل اهلنا

طلال مدّاح والله مو مجرد فنان بالنسبة لي - رحمة الله عليه - أعتبره وكأنه شخص من عائلتي بالرغم أنه مجرد شخص غريب لا أعرفه اتم المعرفة وهو كذلك

في ناس تمرّ حياتنا مثل الغيث تحيي الحياة وتروح وأنا ؟ بالنسبة لي الغيث كان طلال مدّاح .. ماكان مجرد مغني وفنان وأغانيه ماكانت مجرد الحان وكلمات وتروح

صوت يخليك تحس بألفة غرييبة وعجيبة من أول نبراته يغني بكل أحاسيسه.. فعلًا يحسسك بشعور الأغنية بكل صدق

كل أغاني طلال أعجوبة عظيمة

من أحلى الأغاني بالنسبة لي هي

• أنا و أنتِ لنا قصة

• حبك مطاولني

• حبيبي ياحبيبي

• لامني عاذلي

• ابتدت ايامي تحلى

• الله يعلم

ولو أكمل على القائمة هذي عزالله ما أنتهيت ، حبي له عظييييم جدًا ، وكل من عرفني أستنكر محبتي العظيمة له

وفي الختام ندعوا الله أن يرحمه ويغفر له ويسكنه فسيح جناته

وهذي قائمة لتلاوة طلال مدّاح .. جعلها الله شفيعه له وسبب لدخول الجنة

https://on.soundcloud.com/dDaRsSUx6CO1SYFTXJ