الكل يقول : اذا الحب موجود يهون كل شيء.

بس هل فعلاً الحب لحاله يكفي؟؟؟

يمكن هالجملة نسمعها كثير عن العلاقات ونحب نصدقها لان بطبيعتنا يالبشر نحب نصدق الشيء اللي يعجبنا او نحبه لأن فكره الحب يقدر يتجاوز كل شيء حلوه ونحس دام قلوبنا تحب فكل مشكلة ولها حل وكل زعل بينتهي برضاء وكل بعد بينتهي وكل اختلاف بيعدي.

بس سؤال فعلاً بتمشي بهالطريقة؟!

الحب شعور عظيم جداً مانقدر نقلل منه لكن احياناً نحمله فوق طاقته ونظن انها يصلح ويحل كل شيء بينما في بعض الاشياء ما يحلها الحب اللي يحلها الوعي والاحترام والاعتذار وتغيير.

ممكن انك تحب شخص جداً لكن يتعبك

وممكن شخص يحبك لكن مايعرف كيف يحتويك

يمكن يكون بينكم حب صادق لكن مافيه تفاهم يخليكم تكملون مع بعض.

واحنا نعرف ان الحب دايماًً هو المشكلة لكن بعض الاحيان يكون المشكلة بطريقة اللي نعيشه فيها .

الحب انك تشتاق لشخص غاب عنك او تفرح اذا ارسلك او تحس يومك ناقص بدونه هذا هو الحب الدارج في وقتنا الحالي ونشوفه حولنا لكن العكس الحب الحقيقي مو انك ما تشتاق الاشتياق شيء عاطفي موجود فطره بالانسان لكن الحب الحقيقي يظهر لنا بتفاصيل الصغيره اللي يمكن ماننتبه لها.

يمكن الحب يهون علينا اشياء كثيره يخلي الزعل ما يطول والبعد اهون وحتى الايام الصعبه تمر بوجود شخص  اللي نحبه حولنا لكن في فرق بين انه يهون علينا وانه يحل كل شيء.

لانك مهما حبيت مستحيل تعيش في علاقه مافيها احترام مهما كان قلبك متعلق ما تقدر تجلس مع شخص تعطي من نفسك له  لكن بمقابل مايقدم لك شيء.

الحب جميل جداً لكن مو كل من قال " أحبك "

يحب صدق .

الحب يحتاج اهتمام يخليك ترتاح  وصدق يخليك ماتشك وامان يخليك مرتاح وتفاهم وتقدير وتحس ان وجودك له قيمة.

لأن الحب مو انك تتحمل كل شيء عشان ما تخسر الشخص.

الحب الحقيقي ما يخليك تخسر نفسك عشان شخص .

ويا ماشفنا علاقات كثيره انتهت رغم وجود الحب لان الحب كان موجود وحده ما كان مع شيء يسند نفسه عليه.

لأن الجرح من شخص تحبه صعب تتخطاه وصعب تنساه مع الأيام لأن بطبعك تبي الشخص اللي جرحك نفسه يداويك لكن الصح انك تسحب نفسك قبل يجرحك جرح كبير ما تتخطاه او تنساه ابداً لأ جرح المحبوب دايماً صعب تنساه او تداويه لوحدك.

وبالنهاية مايكفي ان الشخص يحبك بس الافضل انه يعرف يحبك بطريقه ماتتعب قلبك وتجرحه.

فإذا لقيت شخص يحبك ويحاول

يفهمك ويحافظ عليك لاتستهين بهالشيء.

وأنتِ يا عزيزتي القارئة / او انت يا عزيزي القارئ

لو خُيّرت بين حبٍ كبير يتعبك وحياة هادئة بلا حب وش تختار وليه؟

وأبي أختم بسؤال بسيط لكم:

وش الشيء اللي تتمنون الأيام الجاية تجيبه لكم حتى لو ما قلتوه لأحد؟

وش رأيكم ابي اسمع إجابتكم بالتعليقات .

أحببتُ، لكنّ الهوى ما كان يكفيني
إن لم يكن في دروب الحبّ يحميني

فالحبُّ قلبٌ، ولكن القلبَ إن فقدتْ
منه المودّةُ، غدا وجعًا وأنيني

ما كلُّ من قال: «أهواكِ» قد صدقَتْ
أفعالُهُ، فالهوى فعلٌ وتبيينُ

الحبُّ أن تلقى من تهوى فيفهمُ ما
لم تستطع قولهُ عينٌ ولا حينُ

الحبُّ أن لا ترى في القربِ مهلكةً
وأن يكونَ الأمانُ بينَ الاثنينِ

أن لا تضحي بنفسِك كي تحافظَ في
حبٍّ يبدّدُ أيامًا وسنينِ

إن كان حبُّك لا يصونُ كرامتَكْ
فأيُّ حبٍّ هذا، وأيُّ تزيينِ

وبكذا انتهى مقالنا لليوم اتمنى انكم استمتعتم و استفدتوا واستودعتكم الله في لقاءً قريب بإذن الله.

نغم

2Sep/2026

11:37pm

احياناً احس إننا وصلنا لمرحله صار فيها شخص اذا حب يحتفظ  بشيء لنفسه يقولون عنه "وش عنده يخبيه بنعينه مثلاً عشان يخبيه عنا "واذا ما شارك تفاصيل حياته لاحد يقولون "وش وراه ليه مايقول لنا "

مع انها طبيعي يكون عنده خصوصية ومن أبسط حقوق الشخص .

مو لازم كل شيء يصير في حياتنا يكون معروف ومو كل لحظة حلوه لازم يحط لها صوره ومو لازم اي علاقه لازم الناس يعرفونها عنا ومو كل قرار نتخذه في حياتنا لازم نشرحه ونبرره.

الغريب إننا صرنا نعيش في زمن المشاركة فيها اسهل من الاحتفاظ فيها.

تصور يومك وتنزل طلعاتك الستوري وتتكلم عن مشاعرك ومشاكلك وعن خططك في مستقبل وش تبي تسوي وحتى الاشياء اللي مفروض تكون بينك وبين نفسك.

وبعدها اذا احد اختار يعيش بعيد عن هذا نستغرب منه.

طيب ليه؟

ليش صار الشخص  اللي يحط حدود لحياته كأنه يسوي غلط ؟

جواب يمكن يكون لأننا تعودنا على كل شيء متاح لنا منه تعودنا نعرف وين راح فلان، وش صار له ، وش يحس ،

ومع مين،وليه اختفى،وليه صار ماينزل.

صرنا نخلط بين القرب وتدخل وبين الاهتمام والمعرفة بكل تفصليه.

وفي الحقيقة يمكن تحب شخص وتكون قريب منه مره بس ماتعرف عنه كل شيء عنه.

وهالشيء مو برود ولا حتى غموض ولا تكبر

هذا احترام.

احترامك لنفسك وحياتك وكل شيء يخصك والاشياء اللي ما ودك تكون متاحه لأحد.

وانا عن نفسي ما اشوف ان الخصوصية تخفي حياتك عن الناس لكن الخصوصية انك تعرف وش ينقال وش ما ينقال ولمين ينقال ومتى ينقال

لان مو كل شيء اذا انقال نرتاح ومو كل شخص يسأل يستحق نجاوبه

وأفضل شيء مككن تسويه في هالزمان لنفسك انك تخلي جزء ما احد يعرفه عنك جزء لك انت وبس مو لأن عندك شي تخفيه عن احد.

وفي نهاية اعرف ان  مو كل شيء في حياتك ملك الناس

ملكك انت وبس.

وخلو لكم اشياء لكم م احد يعرفها عنكم وحياة ماتكون معروضة للجميع.

ومو كل شيء حلو لازم نشارك بعض الاشياء الحلوه تبقى حلوه لانه تبقى لنا مو لغيرنا.

وبكذا نكون وصلنا لنهاية مقالنا وأتمنى إن كل واحد فينا يعيد التفكير شوي بحدوده وخصوصيته ويعرف إن مو كل شيء لازم ينقال أو يتشارك مع احد  أشوفكم في مقال جديد وموضوع جديد وكلام يمكن يلامسككم اكثر .

استودعكم الله في لقاء قريب بإذن الله .

نهاية

نغم

1Sep/2026

10:43pm

وش معنى التوكل على الله ؟

توكل على مو معناته إنك تترك السعي وتنتظر الامور تجيك  لا التوكل الحقيقي انك تسعى وتبذل جهد الي تقدر عليه وبعدها تسلم النتيجة لله وانت واثق ان اختياره خير اختيارك.

قال الله تعالى:

﴿وَعَلَى اللَّهِ فَتَوَكَّلُوا إِنْ كُنتُم مُّؤْمِنِينَ﴾

[المائدة: 23]

يعني مهما كثرت الاسباب حولك يظل قلبك متعلق بالله

قبل اي شيء لانك تعرف ان الاسباب ماتنفع الا بإذن الله.

وتوكل على الله مايعني انك ما تخطط ولا ما تأخذ بالاسباب

بالعكس، النبي ﷺ قال: «اعقلها وتوكل»، والمعنى واضح  إن المسلم يأخذ بالأسباب ثم يتوكل على الله.

ومن ما يوضح معنى التوكل قول الله سبحانه:

﴿وَمَن يَتَوَكَّلْ عَلَى اللَّهِ فَهُوَ حَسْبُهُ﴾

[الطلاق: 3]

بمعنى ان اللي يعتمد ويتوكل على الله بصدق وموقن بالله حتى لو ما عرف كيف بتتيسر اموره ولا متى بيجيه الفرج.

واحياناً الواحد يحس ان التوكل يعني انه يعرف وش بيصير لكن الحقيقه ان التوكل انك ما تعرف وش الي بصير لك ومع ذلك تثق باللع ثقه كبيره وتسعى وتدعي الله وتبذل بالاسباب وتقول :ياارب اختار لي ولا تخيرني

ومن الأحاديث:

النبي ﷺ قال: «لو أنكم تتوكلون على الله حق توكله، لرزقكم كما يرزق الطير، تغدو خماصًا وتروح بطانًا»

رواه الترمذي

وهنا تعرفون ان طيور ما تجلس في اعشاشها وتنتظر رزقها لا هي تطلع وتسعى وتدور على رزقها والله وقد رزقها الله

وهما لازم تعرفون ان توكل يجمع بين الثقه بالله والاخذ بالاسباب وسعي له.

واذا عندك امر تخاف من او قرار محتار فيه او شيء تبذل وتسعى له ولا تدري وين نهايته لا تتركه كمل السعي فيه ولا تخلون خوفكم من المستقبل يوقفكم خذ بالاسباب واستعن بالله وخل نتيجة عند رب العالمين .

ورب العالمين ما يضيع تعب احد ولا جهده وبيعطك على قد تعبك وجهدك او اكثر مما تتصور واحسن الظن بالله دايماً وانت تتوكل عليه واعرف ان رب العالمين سميع عليم ويعرف كل شيء تبيه وتوده فتوكلوا على الله .

َتَوَكَّلْ عَلَى اللَّهِ ۚ وَكَفَىٰ بِاللَّهِ وَكِيلًا﴾

[الأحزاب: 3]

في ختام توكلوا على الله وخل ثقتك بتدبيره اكبر من خوفك من المستقبل واللي كاتبه لك ربي بيجيك لا محال .

ان شاءالله استمتعوا وبكذا نختم مقالنا لليوم استودعتكم الله .

النهاية

نغم

28Aug/2026

8:27pm

….

كم مرة تمنينا شيء من قلبنا وسعينا له وانتظرنها بس في نهاية ما جانا شيء؟

وكم مره زعلنا وتقفلت بيبان بوجيهنا ونحس انها نهاية الدنيا وبعد فتره نكتشف ان ربي كان يصرف عنا شيء ما كان خير لنا .

احيانا نتعلق بشيء نحسب انه سعادتنا كلها متوقفه عليه واذا ما حصلناه نحس ان كل شيء ضدنا بس في الحقيقة  اننا ما نعرف وش ينتظرنا ورى الشيء اللي نبيه ومانعرف وش بصير لنا اذا حصلناه ربي وحده يعرف يصرف عنك شيء ضرر عليك واحياناً يمكن يتأخر الشيء اللي نبيه  ويمكن يعوضك بشيء ما كان على بالك ولا تتوقعه.

والخيره مو معناته اننا ما نزعل طبيعي نزعل ونتحسف وتحس انك كنت تتمنى لو صار اللي تبيه بس بعد كل هالمشاعر  ارجع وقول : الحمدلله اللهم لا اعتراض

لأنك مؤمن إن اختيار الله ارحم من اختيار نفسك.

يمكن اليوم تشوف ف انك خسرت وبعد كم يوم تكتشف إنك نجوت ويمكن تحسب شخص راح من حياتك خساره لكن بعدين تكتشف انه بيأذيك اكثر مما تتخيل ويمكن باب كنت تدعي ينفتح بوجهك لكن ربي يقفله لان خلفه شيء ما يناسبك.

مثل قصة موسى مع الخضر عليهم السلام في سورة الكهف : وقت شاف موسى افعال الخضر اللي يحس ان فيها شر مثل خرق السفينة وقتل الغلام إقامة الجدار لكن بعدين اتضح له انه كل المواقف كان وراها حكمه وخير ما كان واضح له .

وفي نهاية لاتستعجل وتحكم على الشيء من بدايته لان مو كل تأخير شر ومو كل شيء تمنيته كان خير.

يمكن هالشيء اللي كنت تبكي عليه الحين هو نفسه الشيء  اللي بتقول عنه بعد فتره : الحمدلله انه ما صار

وفي نهاية فخل قلبك مطمّن وثق ان اختيار ربي لك دايماً في خير حتى لو مافهمته الا في نهاية .

الخيرة مو دايماً تكون بالشيء اللي تمنيناه احيانا تكون بالشيء اللي ابعده ربي عنا لان يشوف الخير اللي ما نشوفه

وفي عبارة ارددها دايماً : لعل المكتوب أجمل من

المرغوب.

وقال الله تعالى في كتابه :

وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ
[البقرة: 216]

وبكذا نكون وصلنا لنهاية مقالنا لليوم وأتمنى إن كل كلمة مرت عليكم اليوم تركت لكم أثر ولو بسيط واستودعكم الله في لقاء قريب بإذن الله.

النهاية.

كُتب بواسطة: نغم

26Aug/ 2026

3:45am

التعلق مو دايم يعني حب وأحيانًا نكتشف إننا تعلّقنا بالشعور أكثر من الشخص نفسه

التعلق يبدأ بشيء بسيط شخص تتعود على وجوده وتنتظر كلامه وتفرح إذا شفته ويصير وجوده جزء من يومك ومع الوقت وبدون ما تحس تربط أشياء كثيرة فيه لدرجة إن غيابه يصير غريب عليك

وأصعب شيء بالتعلق إنك ما تشتاق للشخص بس تشتاق للروتين اللي كان يجمعكم للرسائل للسوالف للسؤال اللي كان يجيك بوقته وحتى للتفاصيل الصغيرة اللي ما كنت تعطيها أهمية وقتها

وأحيانًا تحسب إنك ما تقدر تنسى شخص بينما الحقيقة إنك تفتقد الإحساس اللي كان يعطيك إياه

وفيه تعلق يخليك تبرر كثير إذا تغير تقول يمكن مشغول وإذا ابتعد تقول يمكن عنده ظروف وإذا قل اهتمامه تقول يمكن أنا فهمت غلط مو لأنك ما تشوف الحقيقة لكن لأنك ما تبي تصدق إن الشيء اللي تعودت عليه ممكن يتغير

ومع الوقت تبدأ تفهم إن التعلق إذا زاد عن حده يتعبك أكثر مما يريحك تصير تنتظر وتراقب وتفسر وتربط مزاجك بتصرفات شخص ثاني وكأن راحتك صارت بيده

وهنا لازم تسأل نفسك أنا أحب الشخص فعلًا ولا صرت أخاف أفقد وجوده

الحب فيه راحة ومساحة أما التعلق الزايد يخليك تخاف من كل تغيير وتفكر بكل كلمة وتحس إن أي مسافة معناها نهاية

وفك التعلق ما يعني إنك تكره الشخص أو تمسح كل شيء صار بينكم يعني بس إنك ترجع لنفسك وتتعلم إن حياتك ما توقف على وجود أحد

أحيانًا بعض الناس يكون لهم مكان بمرحلة من حياتك مو شرط يكون لهم مكان بكل حياتك

وبالنهاية مو كل شخص تعلقت فيه كان نصيبك ومو كل شخص فقدته كان خسارة أحيانًا البعد يعلمك تحب بدون ما تفقد نفسك وتقدر الناس بدون ما تخلي راحتك معلقة فيهم

وأحيانًا التعلق يخلينا نتمسك بأشخاص حتى وإحنا عارفين إن وجودهم ما عاد مثل أول يمكن لأننا نتمسك بالنسخة القديمة منهم ونحاول نرجع نفس الشعور اللي كان بيننا وننسى إن الناس تتغير والمشاعر تتغير

والتعلق يخليك تخاف من فكرة البداية من جديد تحس إن ما راح تلقى أحد يفهمك مثلهم أو إن ما راح ترتاح مع غيرهم وهذا أكثر شيء يخلي الواحد يطول وهو متعلق بشيء انتهى من زمان

لكن الحقيقة إن الإنسان يتعود ومع الوقت يتأقلم حتى مع الأشياء اللي كان يحسب إنه مستحيل يعيش بدونها

مو لازم كل شخص نحبه نبقى معه ومو لازم كل علاقة تنتهي يكون فيها أحد غلطان أحيانًا تكون مجرد مرحلة أخذت وقتها وانتهت

والأهم إنك ما تخلي خوفك من الفقد يخليك تخسر نفسك لأنك تستحق تكون مرتاح بدون ما تكون طول الوقت خايف من تغير شخص أو ابتعاده

يمكن أصعب خطوة إنك تعترف لنفسك إنك متعلق بس أول ما تعترف تبدأ تعرف وش اللي تحتاجه فعلًا وتبدأ تفصل بين احتياجك للشخص واحتياجك للشعور اللي كنت تحسه معه

ومع الأيام بتفهم إن التعلق مو دليل على قوة الحب وإن قدرتك على ترك الشيء اللي يتعبك مو ضعف بالعكس يمكن تكون أقوى لحظة تسويها لنفسك

وأحيانًا أجمل شيء تسويه لنفسك إنك تقول خلاص ما عاد أبي أركض ورا شيء ما عاد يركض لي وأختار راحتي حتى لو قلبي للحين متعلق

وبأختصار التعلق يبني علاقة خوف

وبمعنى أصح أنا مو قاعد أقول لك إذا تعلقت بشخص اتركه لأن مو كل تعلق يعني إن العلاقة غلط الفكرة إنك تخفف تعلقك وما تخلي حياتك كلها تدور حوله

خل لك حياتك واهتم بنفسك وأهلك وأصحابك وهواياتك ولا تربط مزاجك برسالة منه أو اهتمامه فيك وحاول تعطي نفسك مساحة بدون ما تقطع الشخص

لأن التعلق يخف لما تعرف إن الشخص جزء جميل من حياتك لكنه مو حياتك كلها

وبالنهاية تعلّق باللي تحبهم بس لا تتعلق لدرجة تنسى نفسك لأن أجمل علاقة هي اللي يكون فيها حب واهتمام ومعه مساحة تخليك مرتاح ومطمئن بدون خوف ولا اعتماد كامل على شخص.

النهاية

كُتب بواسطة : نغم

23Aug/2026

4:56am

(اليوم جيتكم بمقال من العيار الثقيل ممكن تشوفونه طويل أو تقولون كثّرت كلام لكن اقروه ما أنتم خسرانين شيء يمكن تلقون بين سطوره شعور مرّ عليكم أو حقيقة ما فهمتوها إلا متأخر.)

يلا نبدأ

فيه مرحلة من العمر ما تجيك على شكل فرحة ولا تحس معها إنك صرت شخصًا أفضل فجأة تجيك بهدوء بعد مواقف كثيرة وبعد ما تتعب من التبرير ومن إعطاء الفرص

ومن محاولة فهم أشياء ما كان لها تفسير.

هي المرحلة اللي تفهم فيها كل شيء لكن بعد فوات الوقت.

تفهم ليه شخص تغيّر عليك وليه علاقة انتهت وليه موقف معيّن كان لازم توقف عنده من زمان تفهم إن بعض الكلام ما كان عابر وإن بعض التصرفات كانت إجابات واضحة لكنك وقتها كنت تسمع بقلبك أكثر مما تشوف بعينك.

والأصعب من الفهم نفسه؟

إنك تعرف الحقيقة لكن ما تقدر ترجع لنفس المكان بعقلك القديم.

النضج مو بس إنك تكبر بالعمر؛ النضج الحقيقي إن تجاربك تغيّر طريقة نظرتك للحياة وتخليك أهدأ في ردودك، أوعى في اختياراتك وأقدر على تقبّل الأشياء مثل ما هي.

تكتشف إن بعض الأشياء ما كانت تستاهل كل هذا

وأنت صغير ممكن تعطي الموقف أكبر من حجمه.

كلمة تضايقك أيام شخص يتجاهلك فتقعد تسأل نفسك وش سويت علاقة تنتهي وتظل تدور لها ألف سبب.

لكن مع الوقت تبدأ تستوعب إن مو كل شيء يحتاج تفسير، ومو كل شخص يستحق منك محاولة أخيرة.

يصير عندك سؤال مختلف:

"هل هذا الشيء يستحق أن أخسر راحتي عشانه؟”

وهنا تبدأ تتغير

ما عاد كل خلاف معركة لازم تنتصر فيها ولا كل شخص يبتعد لازم تلحقه ولا كل علاقة تنكسر لازم تجمعها مهما كان الثمن.

تبدأ تعرف متى تتكلم ومتى تسكت ومتى تعطي فرصة ومتى تقول: خلاص يكفي.

وهذا مو برود

هذا وعي

أصعب شيء إنك تفهم متأخر

يمكن أقسى لحظة تمر عليك هي لما تتذكر موقف قديم وتقول:الحين فهمت.

فهمت ليه فلان كان يتصرف كذا

فهمت ليه أنت كنت متمسك

فهمت ليه النهاية كانت ضرورية

وفهمت إنك وقتها ما كنت غبي ولا ساذج كنت فقط تشوف الأشياء من زاوية مختلفة.

وهنا لازم تسامح نفسك.

لأن الإنسان ما يعرف كل شيء من البداية بعض الدروس ما تنفهم بالكلام تنفهم بالتجربة وبعض الحقائق ما تثبت داخلنا إلا بعد ما نعيشها بأنفسنا.

لكن ليه ما نقدر نرجع؟

لأن المعرفة تغيّر الإنسان.

بعد ما تعرف إن شخصًا ما كان صادقًا معك صعب ترجع تثق فيه بنفس الطريقة.

وبعد ما تعرف إن علاقة معينة كانت تستنزفك أكثر مما تسعدك، صعب تقنع نفسك إنها مثل أول.

وبعد ما تعرف قيمتك يصير صعب عليك ترجع تقبل بأشياء كنت تقبلها فقط لأنك كنت تخاف من الخسارة.

وهنا تجي المفارقة:

أحيانًا النضج ما يعطيك فرصة تصلّح الماضي يعطيك القدرة إنك ما تكرر الماضي.

أنت ما رجعت لنفس المكان لأنك ببساطة ما عدت نفس الشخص.

مو كل ابتعاد كراهية

مع النضج تتعلم إنك ممكن تحب شخص وتبتعد عنه.

ممكن تسامح وما ترجع.

ممكن تتمنى له الخير لكن ما تبي يكون جزءًا من حياتك.

وهذا من أصعب الأشياء اللي يستوعبها الإنسان؛ لأننا تربينا على فكرة إن التسامح يعني الرجوع، وإن الحب يعني التمسك، وإن الرحيل يعني الكراهية.

لكن الحقيقة أوسع من كذا.

أحيانًا تحب لكن تعرف إن وجودك في العلاقة ما عاد صحي لك.

وأحيانًا تسامح لأنك تبي ترتاح مو لأنك مستعد تعطي فرصة جديدة.

النضج يخليك تفهم إن المسامحة شيء وإعادة الثقة شيء ثاني.

تبدأ تخسر أشياء وتربح نفسك

في مرحلة معينة بتلاحظ إن دائرتك صارت أصغر.

مو لأنك صرت تكره الناس لكن لأنك صرت تعرف وش تبي من علاقاتك.

ما عاد يهمك العدد قد ما يهمك الشعور.

ما عاد تبي شخص موجود بس عشان ما تكون لحالك.

تبي شخص وجوده يضيف لك يحترمك يسمعك ويكون واضح معك.

وتتعلم تقول “لا” بدون ما تحس إنك شخص سيئ.

وتتعلم إن حماية وقتك ومشاعرك مو أنانية.

وتتعلم إنك مو مسؤول عن إرضاء الجميع.

ومن علامات النضج أصلًا إن الإنسان يصير أقدر على وضع الحدود، وتحمل مسؤولية قراراته والتعامل مع التغير بمرونة بدل ما يعيش طول عمره في محاولة إجبار الأشياء على البقاء.

وفي النهاية…

أقسى مراحل النضج مو إنك تعرف الحقيقة.

أقساها إنك تعرفها وما عاد تقدر ترجع للجهل اللي كان يخليك مرتاح.

تتمنى أحيانًا لو إنك ما فهمت.

لو إنك بقيت تشوف الشخص بنفس الصورة القديمة.

لو إنك ما انتبهت لبعض التفاصيل.

لكن بعدين تستوعب إنك لو ما فهمت كان ممكن تعيش نفس الدائرة مرة ثانية.

يمكن النضج أخذ منك عفويتك القديمة لكنه عطاك وعيًا يحميك.

أخذ منك بعض الأشخاص لكنه قرّبك من نفسك.

أخذ منك القدرة على التغاضي عن أشياء كثيرة لكنه علّمك إن راحة بالك مو شيء رخيص

وفي النهاية يمكن أجمل شيء توصل له هو إنك ما تحتاج ترجع.

لا للمكان

ولا للشخص

ولا للنسخة القديمة منك

لأنك أخيرًا فهمت

إن بعض الأبواب ما انقفلت عشان نرجع نفتحها انقفلت عشان نتعلم نمشي بطريقٍ ثاني.

والنضج الحقيقي مو إنك تصير أقسى؛ إنك تصير أوعى. تعرف وش يستحق قلبك، وش يستحق وقتك، ومتى يكون الرحيل مو خسارة… بل احترام لنفسك.

كُتب بواسطة: نغم

21g/2026

الجمعة

3:10am

…..

أحيانًا تخلي الشخص يقارن حياته بالناس لأنه يشوف أجمل لحظاتهم وينسى إن اللي يظهر بالشاشة مو كل الحقيقة وبرضو كثرة استخدامها ممكن تشتت التركيز وتضيّع الوقت خصوصًا وقت الدراسة

لكن بالنهاية السوشال ميديا مو شيء سيئ بحد ذاته المشكلة بطريقة استخدامنا لها إذا عرفنا نتحكم بوقتنا ونختار المحتوى اللي نتابعه نقدر نستفيد منها بدون ما نخليها تتحكم بحياتنا

وبرضو السوشال ميديا قرّبت لنا أشياء كثير صرنا نقدر نتواصل مع أشخاص بعيدين عننا ونتعلم أشياء جديدة ونشوف تجارب وأفكار مختلفة لكن بنفس الوقت كثرة استخدامها ممكن تخلينا نعيش طول الوقت نقارن نفسنا بغيرنا ونحس إن حياتهم أفضل وأسهل من حياتنا مع إننا ما نشوف إلا الجزء اللي هم يختارون يورّونه لنا

عشان كذا أشوف إن الموضوع يعتمد علينا نستخدمها بحدود وننتبه لوقتنا وللمحتوى اللي ندخله لعقولنا لأن بالنهاية الجوال المفروض يكون بيدنا مو حياتنا تصير بيده

كُتب بواسطة: نُون

19g/2026

1:36am

….

مو كل تعب يبين على الوجه، فيه تعب يسكن بالقلب، وكل يوم يكبر شوي بدون ما أحد ينتبه له الغريب إن أغلبنا إذا انكسر، ما يتكلم يبتسم يضحك ويسولف كأن كل أموره تمام، وهو منداخله يتمنى أحد يلاحظ إن فيه شيء تغير مو لأنه يبي الشفقة، لكن لأنه تعب وهو يحاول يقنع نفسه قبل غيره إنه بخير. يمكن لأننا تعودنا نخبي اللي فينا، أو لأننا صرنا نحس إن كل واحد عنده همومه، وما نبي نزيد على أحد. فنسكت لين يصير السكوت عادة، وننسى كيف نعبر عن اللي داخلنا وأحيانًا مو لأننا ما لقينا أحد يسمعنا، لكن لأننا تعبنا نشرح فيه مشاعر ما تنقال بكلمتين وفيه وجع لو جلست تحكي عنه ساعات،

يمكن ما يوصل لأحد بنفس الطريقة اللي عشته فيها الناس تشوف ابتسامتك وتحسب إنك بخير لأنهم يشوفون اللي تبينه لهم لكن محد يشوف اللي يصير آخر الليل، يوم تهدأ الأصوات، وتبقى أنت وأفكارك محد يدري عن الأيام اللي تعدي عليك وأنت تحاول تقوم تبتسم وتكمل مع إنك من داخلك منهك وأحيانًا الإنسان ما يحتاج أحد يحل مشكلته ولا يلقى له مخرج. كل اللي يحتاجه شخص يجلس معه يسمعه بدون أحكام، ويحس فيه بدون ما يضطر يبرر كل شعور مر فيه. لأن بعض الأوجاع إذا انقالت، تخف حتى لو ما انحلت ومع هذا كله، نستمر نقول: أنا بخير مو لأنها الحقيقة، لك لأنها أسهل من إننا نفسر كل اللي بداخلنا يمكن أقسى شعور يمر فيه الإنسان، إنه يحس إن اللي داخله أكبر من الكلام، وأثقل من إنه ينحكى. فيكتفي بالصمت ويكمل يومه كأن ما فيه شيء بينما قلبه .يستنزف نفسه بصمت

5 Aug 2026

11:44 pm

الأربعاء

………….