Xeber li medyayê, li sosyal medyayê ket ku Mehdi Zana wefat kiriye. Talîya 2025an ra Perxudres Podcastê ser tarîxa Zana xelekek çêkiribû.

Dinya, mirin têda. Dinya, mirin têda. Dinya, mirin têda.

Niha tevî rengên Claude Monet, tevî hizûra ji zû da tune, tevî me çi kir me çi xwar, bi xatirê te.

Ew gotina Vladimir Nabokov min tam, tam min tarîf dike. Loma min anî xeleka sezona nû ser wî nivîskarê Rûs çêkir.

Çend guhdar bo feedbackê li min vegerîyan, gotin wanî pir xweş e, wanî dewam bike. Guhdar guhdarên Perxudres Podcastê ne, ez jî guhdarê guhdarên xwe me, bi barek hurmet û hezkirin.

Bihara 2026an ser Kurdên Anatolîya Navîn hejmareka delal û dagirtî derxistibû Kovara Nûbiharê. Edîtorên vê dosyeyê Mehtab Îdelî û Adem Özgür bûn.

Ji van edîtoran Mehab Îdelîyê ser hazirkirina vê dosyeyê, ser titîzîya rêberê Kovara Nûbiharê Süleyman Çevik mektûbek şand.

Di mektûbê da şorşîrînîya Kurdên Anatolîya Navîn heye, ew însanên me yên li hêla Enqere û Konya bi zar û zimanekî xweş xeber didin.

Tevî êşa dil û gurçikan, tevî nexweşîya ya pir li hêla çepê, tevî rengên Claude Monet bi xatirê te.

Tu dikarî bi vê butona li jêr Share vê bultenê ji nas û dostên xwe ra bişînî û bikî ku karên me kesên wek te delal bibînin. Û li jêr butonê, lînkên din ên Perxudres Podcastê hene, dikarî li wan jî binêrî, wê kêrî te werin.

Share

Malper: www.perxudres.com

Instagram: www.instagram.com/perxudres

YouTube: www.youtube.com/@perxudres

Patreon: www.patreon.com/perxudrespodcast

Spotify: Perxudres Podcast

Apple Podcasts: Perxudres Podcast

Xatirayên Jose Saramaogo dixwînim; bi şiîreka Murilo Mendes mealen dibêje, erê heye cehenem lê ka kêrî çi tê?

Dema ez Bultena Bazarê hazir dikim, ferhenga Weqfa Mezopotamya kêrî min tê: Dibêjim, min digot, cihenim, hinekan digot cehnima wî kirî, rast heqet ka çito tê nivîsîn..

Dinêrim li wî cihê sûc û ceza têda, dibînim li ser ferhenga Weqfa Mezopotomaya cehenem e ya rast, lê ka kêrî çi tê?

+90 542 542 00 00 telefon dike. Cewabê nadim. Derbazî metnên du xelekên podcastê dibim.

İsmet Ateş, awûqatê salên 1970î li Enqereya paytexta Tirkîyê serokîya DDKDyê kiriye, Agustosa 2026an wefat kir.

Serok û parlamanterên partîyan ser wefata İsmet Ateş, mesajên sersaxîyê li sosyal medyayê xistin, û Zinarê Xamo jî li ser bloga xwe ya Hindik-Rindik bi kinî şor bir ser dostanîya xwe û wî.

Zinarê Xamo, ku wextekê xortekî DDKDyê bûye, di bloga xwe da dibêje İsmet Ateşê ji Sirûcê sala 1975an hatiye mîtîngeka Wêranşarê, çend rojan li mala wî maye û dostanîya wan wisa destpê kiriye.

Di dewamê da, Zinarê Xamo dibêje, berî PKK çêbe, İsmet Ateş hevalê Abdullah Öcalan bûye û ew bi xortan didaye naskirin.

Li gor gotina Zinarê Xamo, İsmet Ateş, dûra ji Abdullah Öcalan û ji sîyasetê dûr ketiye û li Stenbolê bala xwe tenê daye ser awûqatîyê.

Piştî min bloga Zinarê Xamo xwend, ez ketim bal û bîra xwe û li pey navê İsmet Ateş ketim.

Min navê İsmet Ateş, a pir di Amara’dan İmralı’ya, di wê kitaba Müslüm Yücel da dîbû, lê malumatên di kitabê da tam nedihatin bîra min û kitaba min xwendî ne li ber destê min bû.

Mehkemeyeka Tirkîyê talîya 2015an ra ser wê kitabê qirar dabû ku were topkirin. Herhal çi dibe çi nabe min jî kitab wê çaxê ji destê xwe derxistibû.

Dîsa jî îhtîmalek, belkî dîsa jî îhtîmalek ez kitabê bibînim, ez ketim Nadirkitapê, min dî yek bi 60 dolarî yek bi 70î, du nusxeyên Amara’dan İmralı’ya hene, lê min got di vê desttengîyê da îcab nake ez ji wan yekê bikirim.

Li vir binêre, li wir binêre li Amara’dan İmralı’ya bigere bigere, min ancax PDFeka wê ya pir xerab dî li ser înternetê û min vekir ew, kitab dîsa xwend.

Di vê kitabê da tê gotin ku İsmet Ateş û Abdullah Öcalan heta sala 1978an bi hev ra bûne û paşê ji hev dûr ketine.

Berî ji hev dûr bikevin, Abdullah Öcalan rokê li Sirûcê derbazî mala bavê İsmet Ateş dibe. Gêncên sîyasî tên li wê malê kom dibin.

Dîya İsmet Ateş guh li ser gêncan ‘‘Law’’ dibê, ‘‘Law bibin komunîst, lê dehw û doza Kurmancan mekin ha, ne îşê we ye..’’

Li ser vê şora dîya Îsmet Ateş, Abdullah Öcalan dibêje ‘‘Em ê herine herbê bikin, me bîr bikin..’’ Deng ji herkesî qut dibe.

Herb, sekn û sîyaset li hêlekê, stîla heyatê jî kiriye ku İsmet Ateş ji Abdullah Öcalan û ji Apocîyan dûr bikeve.

İsmet Ateş di Amara’dan İmralı’ya da bi nimûneyeka enteresan, ser Apocîyan dibêje ‘‘A min, min bîra vedixwar, lê wan cixare jî bi devê xwe nedikir.’’

Vê sibê saet di 6an da şîyar bûm. Ji Duşemê heta Înê her roj saet di 6an da şîyar dibim. Ji bo ez ji malê derkevim 45 deqîqeyên min hene.

Zikê zarokan têr bike, binê wan pak bike, biguherîne.

Jina tê li malê û li zarokan dinêrê saet di 7:30 da tê. Saet 7:30, êdî zor e jineka wisa bibînî, ê min şansê min heye.

Ji bo ez herim cihê kar 90 deqîqe trafîk. Min makyaja xwe nekir îro. De tiştek nabe, ez ê li ofîsê bikim ku wext çêbe.

Dereng gihiştim cihê kar.

’’Li qusirê menêrin, dereng mam..’’

’’Çi bû? Xêr e?’’

Trafîk dibêjim, qeza dibêjim, filan dibêjim, bêvan dibêjim. Gerek ez nebêjim zarok. Mazereteka min a pak-mazeret tune. Van saetên serê sibê herkes dereng dimîne û ti kes nikare mazereteka tam mazeret bêje.

Li cihê kar rojeka xirab. Ser karê min, ser tecrûbeyên min gotinên giran dikin. Diqehirim, hêrsa min radibe.

Êvarê dibim qurbanîya navîgasyonê. Di 120 deqîqeyan da vedigerim mala xwe. Birçî me, westiyayî me, gerek ez herim banyoyê bi ser da.

Mêrê min îşev ne li malê ye. Çûye okeyê bilîze. Mêrê min bi lîsansa bilind e, lê ji okeyê hez dike.

Ez jî ji okeyê hez dikim. Mêrê min û hevalên xwe du sê hefteyan carê kom dibin. Hevalên min ser okeya mêrê min dibêjin tiştekî ecêb e, lê ez dibêjim ne dûrî aqilan e, bira here mêrê min, bira yekî sosyal be.

Zarokan dikim xewê, krîza girîyê bi wan ketiye.

Wexta min namîne bo banyoyê. Dawîya dawî dikevin xewê zarok.

Dilê min diqaqije lîmonatayekê. Halê min tew tune. Tenê dixwazim lîmonateyek hebe û hew.

Ji mêrê xwe ra mesajekê dişînim:

’’Li ser rêya xwe dikarî lîmonatayekê bistînî?’’

Mesajê nabîne. Piştî wextekê dibihîsim ku dikeve hindur. Eceb lîmonata kirî? Eger bistanda wê xeber bida. Ya mesaja min nedî ya jî wê wek ku mesaj nedîye hereket bike.

Derbazî banyoyê filan dibe, dengê wî tê. Ez dest bi girîyê dikim. Niha dema vê mektûbê dinivîsim jî digirîm.

Ez çawa ji lîmonatayê derbazî hêsiran, ji hêsiran jî derbazî nivîsê bûm?

Li her du hêlên min her du zarokên min raketî ne. Di destê min da telefon, li hêlekê digirîm, li hêlekê jî dinivîsim.

’’Temam, min fehm kir, herhal wê jî ez dikim herim bikirim’’ Wer dinivîsim ji mêrê xwe ra û hîn zêde digirîm.

’’Li rê bûm, min nedît’’ dibêje.

’’Erê erê’’ dibêjim.

Bêdengîyek.

’’Here, bikire, were’’ dibêjim careka din.

Em pênc sal in hevalên hevdu ne, herhal herî zêde min pênc caran bi zimanekî emir li ser xeber daye.

Derdikeve mêrê min.

Lê girîyê min dîsa jî nasekine.

Eger ew neçûya ez ê biçûma lîmonatayê bi girî û hêsir.

Vedigere mêrê min. Radibim lîmonatayê vedixwim. Radikevim.

Gerek serê sibê saet di 6an da şîyar bibim û gerek herim banyoyê.

Özgen Koral

Eger dilê te heye tu jî dikarî mektûbên xwe ji Perxudres Podcastê ra bişînî. Ez her tim jî li benda mektûbên te me. omerfarukbaran@hotmail.com

Niha tevî germa havînê, tevî plan programên heyatê, tevî hesretan û tevî rengên Claude Monet bi xatirê te.

Tu dikarî bi vê butona li jêr Share vê bultenê ji nas û dostên xwe ra bişînî û bikî ku karên me kesên wek te delal bibînin. Û li jêr butonê, lînkên din ên Perxudres Podcastê hene, dikarî li wan jî binêrî, wê kêrî te werin.

Share

Malper: www.perxudres.com

Instagram: www.instagram.com/perxudres

YouTube: www.youtube.com/@perxudres

Patreon: www.patreon.com/perxudrespodcast

Spotify: Perxudres Podcast

Apple Podcasts: Perxudres Podcast

Perxudres Podcast vê hefteyê bi du xelekan, yek, Bi Îsyan û Nisyanê Xatirayên Emre Gönensay, dudu, MemûZîn Çawa Tê Xwendin? li guhên guhdaran ket.

Miletê me bi tebîet û bi heyat û hikayetên salan rind dizane ku îsyan çi ye, lê nisyan pir ne gotineka li ser lêv û devan e. Nisyan, gotineka bi Erebî ye û mehneya xwe bîrkirin e.

Di xatirayên Emre Gönensay da îsyan û nisyan hene, loma min navê wê xelekê wer danî.

MemûZîn Çawa Tê Xwendin?, min seba dosye-kitabeka Weşanxaneya Pallê nivîsîbû. Dosye ser xwendinê bû û bi rêberîya Fexrîya Adsay dihat hazirkirin. Lê nivîsa min hat redkirin, neket dosyeyê. Seba wenda nebe di arşîva min a şexsî da, min anî ew nivîs kir xelekeka podcastê.

De em herinê, em herin wan xelekên Perxudres Podcastê, deng li dinê.

Emre Gönensay hêla mala bavê wî Selanîk, hêla mala dîya wî Cizîr, Stenbolîyekî sedsala 20an e û sal 2026 navê wê Hayata Açtığım Yelken bi Tirkî, kitaba xatirayên xwe derxistiye.

Di kokên Cizîrî da, Emre Gönensay kurê qîza Abdurrahman Samî Bedirxan e û dibêje ‘‘Dîya min li ser tebîeta min a bi hêrs û herb tim digot, tu mîna Bedirxanîyên îsyankar î..’’

Bûye medyakar Emre Gönensay, bûye akademîsyen, bûye ekonomîst, bûye dîplomat, ketiye sîyasetê, tim mîna Tirkan, pir hindik be jî car caran mîna xwarzîyê Kurdan.

Sala 1960î, berî li Tirkîyê derbeya eskerî çêbe, Emre Gönensay li Unîversîteya Columbia bûye û bi hereketa telebeyên New Yorkê ew jî rabûye çûye, hikûmet protesto kiriye.

Wan çaxan hikûmeta Tirkîyê bi fotografan bi wan telebeyên li protestoyê hisiyaye û nas û dostên di hikûmetê da gotine ‘‘Ma va ne Emreyê me ye? Ne Gönensay Emre ye? Ew tiştên wanî, tiştên bi vî rengî nakin ku..’’

Emre Gönensay di xatirayên xwe da dibêje ‘‘Gönensay Emre bi ti şeklî ti carî nediçû protestoyan, lê Bedirxanî Emre dikaribû serî rakira..’’

Karûbarên heyatê, sîyaset, ticaret, ken û kêf, feqîrî û felaket, zengînî û dewlet, sal, sal bi sal derbaz bûne û sala 2000î navê Emre Gönensay seba meqamê reîsî-cumhur hatiye gotin.

Rêberê hikûmeta wê salê Bülent Ecevit, bo wî meqamî dîplomatekî çito lazim e tarîf kiriye û bi wê tarîfê herkesî gotiye nîşan û îşaret giş li ser Emre Gönensay in, bes li şûna wî Ahmet Necdet Sezer bûye reîsî cumhur.

Li ser vê rewşê, Emre Gönensay di xatirayan xwe da dibêje ‘‘Min got herhal jiber Kurdbûna min nexwestin..’’ lê dibêje, ‘‘Ez paşê elimîm ku îstixbarata Tirkîyê tew jî Kurdbûna min nizane..’’

Belkî dibêje Emre Gönensay, ‘‘Belkî Süleyman Demirel Kurdbûna min zanibû, tiştek ji wî nedifilitî..’’

Süleyman Demirel bi hiş û hafizeya xwe ya saxlem, Kurdbûna Emre Gönensay zanibe jî nizanibe jî xatirayên wî raber dikin ku, ji dewra Osmanliyê heta vê dewra vê cumhurîyeta Tirkîyê, heta niha jî Kurdbûn ya li îsyanê ya li nisyanê.

Kurdbûna xwe hîs bikî, qebûl nakî zilm û zordarîyê û serî radikî, Kurdbûna xwe bîr bikî, bikî nisyan, nakî îsyan. Ha Emre Gönensayê Stenbolî, ha Emre Gönensayê Selanîkî, ha Emre Gönensayê Cizîrî, ferq nake.

Du-sê salan berî heyat me bajo bavêje salên 2010î ez seba bixwînim ji Sirûcê çûm Riha, çûm merkezeka cemaeta Fetullah Gülen.

Wan çaxan cemaeta Fetullah Gülen hîn di çavê dewleta Tirkîyê da nebûbû komeka terorê û nedihat bîr û aqil û fikra ti kesî ku ewê ro were û ew terorîst werin hesibandin.

Meseleya terorê pir paşê ye, wan çaxan, mal û mektebên Fetullah Gülen dar û war bûn û lîselîyên di dersan da jêhatî, belaş, bê ku qurişek pere jî ji wan bistînin distandin cem xwe û elbet, elbet û elbet, ew bi îdeolojîyên xwe xwedî dikirin.

Ez jî ji wan kesên di dersan da jêhatî bûm û belaş diçûm dersxaneyên wan û li cem wan dimam. Ser îdeolojîyê jî min zanibû Sirûcê sewt û sekneka sîyasî ya Kurdbûnê daye min û min digot ne mimkun e bayê fikrên Tirkbûnê li min keve li merkezên Fetullah Gülen, tenê min dikira heta îmtihanên unîversîteyê îdare bikira.

Lê îdare nedibû: Dersxaneya ez diçûmê, cîhê ez lê dimam bi miletên Riha, bi Ereb, Kurmanc, Tirk, Tirkmen û Zazayan dagirtî bûn û bixwazî nexwazî minaqeşeyên ser kok û tokên etnîk çêdibûn.

Ser minaqeşeyên malikwêran mala me ez şîyar kiribûm ku ez darim xwendinîyê, ne sîleh û sîyasetê. Mala me ji min xwestibû ku ez tenê li dersên xwe binêrim û bixwînim.

Min li dersên xwe dinêrî, min dixwend, lê ez diketim minaqeşeyan û min li radyoyekê guhdarî dikir: Radyo Medya.

Êvarekê berî dersan ez dîsa li Radyo Medyayê guhdarî dikime - radyoya bi Kurdî tenê li guhên min dikeve û wek ku ez bi dizî dikîm vî îşî - programa radyoyê pirsek pirsî ji guhdaran: ‘’Patates bi Kurdî çi ye?’’

Wan salan jî me dîsa nola niha kelîmeyên pir nêzîkî Tirkî nebûbûn dîrekt orîjînal Kurdî dihesibandin. Çi bû patates bi Kurdî? Kartol bû. Cewaba min bi telefoneka qaçax ji Radyo Medyayê ra şandibû du hedîyeyên surprîz kiribûn nesîbê min.

Min sebir nekir ku ro hilê, min sebir nekir ku dersxane me berde bo du sê saetan û min sebir nekir ku ez pirs bikim pirs bikim herim cîhê Radyo Medyayê bibînim li hêla Bahçelievlera Riha.

Sebir, sebir, sebir, li Radyo Medyayê, Mem ûZînekeka giran û qalind û tabloyeka Bedîuzeman Seîd Nûrsî li ser dan min, şîretaka wî jî li ser bû.

MemûZînê ne, tabloyê bala min kişand û şîreta Bedîuzeman jî, gotibû, xwendin, xwendin, xwendin, desthevgirtin, desthevgirtin, desthevgirtin.

Min tablo û kitab bi tirseka mezin birin cihê ez lê dimam û min di dolaba xwe da veşartin. Xwîna xortanîyê ye, heyecan e, qey sebra min nehat, min kitab û tablo derxistin hinek ji wan Zaza hinek ji wan Kurmanc raberî 4-5 hevalan kirin ku ew jî jê îstîfade bikin.

Û bû roya din ez hatim qewitandin. Şor û şîretên bi Kurdî, kitabên bi Kurdî serê sedsala 21ê hîn jî bela û bêtar çêdikirin, hîn jî tirs û talûke bûn. Herhal min wê çaxê fehm kir ku desthevgirtina me ne mimkun e; ji wan 4-5 hevalan yekî ez şikayet kiribûm..

Ez bê cih û war mabûm û min newêribû mesele ji mala me ji kesî ra bigota. Malê ez ji Sirûcê şandibûm merkeza Riha ku ez dersên bi Tirkî bixwînim, ne MemûZînê û ne şor û şîretên Bedîuzeman Seîd Nûrsî bi Kurdî bixwînim.

Mielimeka min a ji salên mektebên orte li Riha bi cih bûbû, roya dersên xwe diçû Sirûcê û êvarê dîsa vedigerîya Riha. Jiber meraqa min a ser edebîyatê qîmet dida min wê mielimê, kitab didan min car caran, telefona xwe jî dabû min, min jê hez dikir, dîyaloga me dewam dikir. Min rabû jê ra mesaj şand û bi tarîfên li ser mesaj û telefonê ez çûm mala wê.

Dema min ji mielima xwe ra hal mesele got, bi Tirkîya xwe ya car caran aksana Trakyayê lêdiket gotinên giran kirin ser cemaeta Fetullah Gülen û got ‘’Du sê hefteyan li cem min bimîne, ji kesî ra tiştekî mebêje, bira kes nizanibe tu li vir î, paşê dîsa here cem wan, wê te qebûl bikin, lê li ber xwe mezin meke, kitabên te ne sîyasî ne..’’

Mielima min ji çepê Tirkan bû, mibteleyeka edebîyatê bû, û zaten gava min çavek li kitabên wê xistibû, min kitabên Mehmed Uzun jî dîbûn, ewên bi Tirkî, ewên tercûme.

Ne wexta xwendina kitabên edebîyatê bû. Fîzîk, matematîk, min tenê li kitabên testan dinêrî û ji cemaeta Fetullah Gülen dûr, ji mala me ya meseleya min nizane dûr, li mala mielima xwe, nola fîrarîyan bûm û ez li tevdîreka xwe digerîyam, ji îmtihanên unîversîteyê ra, ji meha Hezîranê ra hindik mabû.

Şeva pêncan bû, dibe şevan şeşan be jî, ez hinekî aşt û adapte bûbûm li malê ku mielima min piştî me tev şîv xwar û feraq şûştin ji min xwest ez MemûZînê ji wê ra bixwînim, MemûZîn, ewa Radyo Medyayê dabû. Min dikira him bixwenda him, him jî tercûme bikira, jiber ku ew Tirk bû û jiber ku Kurdî nizanibû.

Ji destpêka şûştina feraqan, jê pê va, wê şevê bayekî multî-mê ji hêla mielima min dihat ser min, lê min xwîna xwe bi dîndarîya xwe ya hîn hebekî hebû li ser min sar dikir. Bi ser da MemûZîn pir zor bû, min zimanê Ehmedê Xanê hîn tew nizanibû wê çaxê û tercûme jî ne tiştekî wisa bû, tavilê nedibû.

Min xwîn sar dikir, lê dîsa dikelîya bi nefsa zalim û israra mielima min dewam dikir. Hema got ‘’Hema tu çiqas zanî û tu çiqas dikarî ewqas..’’

Misra ji bîra min çûne, Ehmedê Xanê, gotibû, rûyê Sitî û Zînê, ketin ateşê evînê, filan, tiştekî bi vî rengî bû. ‘’Ateş’’ rind tê bîra min, çinku bi wê peyvê ra bayê mê, bayê multî-mê hat li perdeya di mabêna min û mielima min da ket, ew rakir ji mabêna me û çû çira vemirand.

Desthevgirtin, desthevgirtin, desthevgirtin, xwendin, xwendin, xwendin.

Bo Perxudres Podcast van xelekan hazir bike guhdarên wê destekên madî didin.

Eger kêfa te ji Perxudres Podcastê ra tê û tu jê îstîfade dikî mebêje pir e mebêje hindik e tu jî ji Patreonê destekê bide.

Her destek bo me pir bi qîmet e. Weşaneka serbest, serbixwe bi destekên te mimkun e. Dilê te çi wext xwest tu dikarî destekên xwe bisekinînî.

Niha tevî xeberên xêrê, tevî xewn û xeyalan, tevî taştêya bi nan û nok, tevî rengên Claude Monet bi xatirê te.

Tu dikarî bi vê butona li jêr Share vê bultenê ji nas û dostên xwe ra bişînî û bikî ku karên me kesên wek te delal bibînin. Û li jêr butonê, lînkên din ên Perxudres Podcastê hene, dikarî li wan jî binêrî, wê kêrî te werin.

Share

Malper: www.perxudres.com

Instagram: www.instagram.com/perxudres

YouTube: www.youtube.com/@perxudres

Patreon: www.patreon.com/perxudrespodcast

Spotify: Perxudres Podcast

Apple Podcasts: Perxudres Podcast

Ne Ewrupa, ne Amerîka, bala min nakişînin. Bo Ewrupa jî bo Amerîka jî çend caran fersend çêbûn, lê ez neçûm wer.

Sankî ku ez herim wan hêlan, namîne çend mehan ez ê lêxim vegerim vê gemar û geremola me dîsa.

Min di Reutersê da bi deklanşora Fabian Bimmer kenê koçberekî Fasî dî, li sînorê Îspanya.

Niha xwe jî dibînim, li sînorê Sûrîye û Tirkîyê, li xeta Kobanî û Sirûcê derbazî bultenê dibim.

Doktor Fûad Sonbahara (2008) Özcan Alper sêr kiriye û bi mektûbekê çûye salên xwe yên sosyalîst.

Di mektûbê da Doktor Fûad dibêje teorîyên sîyasî û pratîka heyatê ne nola hevdu ne û fikra xwe dida ser lîberalîzmê.

Bo Perxudres Podcast dewam bike û jiber şertên ekonomîk nesekine, min salek da ber çavên xwe û ez hatim li Sirûcê bi cih bûm.

Piştî heyata li Stenbol û Diyarbekirê elbet Sirûc bi min çetin tê, lê erzanîya vir - xaseten jî xwarin û vexwarin - dike ku sebra min pê were û ez îdare bikim.

Temûza 2026an bi destekên 66 guhdaran 510 dolar ket hesabê Perxudres Podcastê. Bo em tenê karê podcastê bikin û vî karî pêşva bibin hedefa me 1000 dolar e.

Eger kêfa te ji karên Perxudres Podcastê ra te û tu jê îstîfade dikî, tu jî dikarî bo tek carekê yan jî mehane di otomatîkê da bi 1 dolar, bi 3, bi 5, bi 10 yan bi 20 yan jî herî zêde bi 30 dolar destekê bidî.

Mebêje pir e, mebêje hindik e tu jî ji vê lînka me ya Patreonê destekê bide. Medyayeka stîl-serbest û serbixwe bi destekên te mimkun e.

Niha tevî havîna wek ku xwe hê nû dide hîskirin, tevî barek bêrîkirin û hesret, tevî rengên Claude Monet bi xatirê te.

Tu dikarî bi vê butona li jêr Share vê bultenê ji nas û dostên xwe ra bişînî û bikî ku karên me kesên wek te delal bibînin. Û li jêr butonê, lînkên din ên Perxudres Podcastê hene, dikarî li wan jî binêrî, wê kêrî te werin.

Share

Malper: www.perxudres.com

Instagram: www.instagram.com/perxudres

YouTube: www.youtube.com/@perxudres

Patreon: www.patreon.com/perxudrespodcast

Spotify: Perxudres Podcast

Apple Podcasts: Perxudres Podcast

Facebook, Instagram û Xa berê navê wê Twitter bû bi fen û fûtên algorîtmayan herrimîn. Ne fikir, ne felsefe, ne fotograf, tew tiştek li ser wan platforman nemaye hema bêje, pûç in.

Wan platforman tesîr li malperên medyayê jî kirin, zirareka mezin danê. Ne bi Kurmancî ne jî bi Tirkî malpereka aktîf û ez bi hez û hewesekê lê dinêrim dîxwînim, êdî nabînim.

Here were her ro du ro çavekî li The Guardiana Îngilizan dixînim, tek tenê ji wê lezetekê distînim.

De eger tu jî ji Perxudres Podcastê lezetekê distînî û bi kêfekê li wê guhdarî dikî, em herine bultenê.

Gava min va xeleka navê wê B û P û Feyrûz hazir dikir ez li vê fotografa muzîsyena Libnanî rast hatim.

Ken kêm-kêm e li ser rûyê Feyrûzê; di vê fotografê da ken kêm maye ku were girtin, lê wê bi destê xwe devê xwe girtiye û kenê xwe ji fotografê veşartiye.

Hebûn însanên wer, ez jî gîhiştimê min jî dîn ew, dema kenê wan dihat, jiber fedî û fihêtê destê xwe dibirin ber devê xwe, ken li bişirînê dihiştin.

Guhdar L.Z. di mektûba xwe ya nû da bi SMS, slogan, bi govenda gavên wê polîtîk û bi şiîran me dibe salên xwe yên lîse û unîversîteyê.

Li ser eşq û evînên salên lîse û unîversîteyên du gotinên meşhûr hene: Bo lîseyê dibêjin, lîse qedîya her tişt qedîya, bo unîversîteyê dibêjin, eşq û evînên unîversîteyê heta otogarê ne.

Di mektûba xwe da Guhdar L.Z bi perspektîfne din li eşq û evînê û li heyatê dinêre.

Tu jî dikarî mektûbên xwe ji Perxudres Podcastê ra bişînî, em her tim jî li benda mektûbên te ne.

Adresa mektûban: omerfarukbaran@hotmail.com

Perxudres Podcast van karên xwe bi destekên guhdarên xwe yên delal dike. Eger kêfa te ji van îş û karên Perxudres Podcastê ra tê, mebêje hindik e mebêje pir e tu jî ji lînka me ya Patreonê bi qasî hikmê xwe destekê bide. Her destek bo me pir bi qîmet e.

https://www.patreon.com/c/perxudrespodcast/membership

Tevî rengên Claude Monet, tevî mala ez nû ketimê û pê hatim ser hemd û hişên xwe hinekî bi xatirê te.

Tu dikarî bi vê butona li jêr Share vê bultenê ji nas û dostên xwe ra bişînî û bikî ku karên me kesên wek te delal bibînin. Û li jêr butonê, lînkên din ên Perxudres Podcastê hene, dikarî li wan jî binêrî, wê kêrî te werin.

Share

Malper: www.perxudres.com

Instagram: www.instagram.com/perxudres

YouTube: www.youtube.com/@perxudres

Patreon: www.patreon.com/perxudrespodcast

Spotify: Perxudres Podcast

Apple Podcasts: Perxudres Podcast

Zaza dibêjin na dinya yew xan, can tey de reywan. Rêwî ye mehneya reywanê lê gava va gotina bi ahenga xwe here ser Kurmancî wê bibe, dinya xan e û can têda mêvan e.

Ez van deman xwe zêde zêde him reywan him mêvan hîs dikim. Ji herkesî ji her tiştî qut dibim; wek ku westa salan li ser min e, wek ku ji reywanî û ji mêvanîyê westiyame û min xwe berdaye ber bayê felekê, min bavêje kû dikim dengê xwe nekim, razî bim jê.

Vîçevîç û çûveçûva çêlik û çûçikan e, li ber rengê roya Bazarê derbazî bultenê dibim.

Guhdar ji xelekên muzîk têde hez dikin. Ez jî hez dikim xelekên bi muzîk, lê li Spotify û YouTubeê problemên telîfê çêdibin.

Mesela min di vê xelekê da anîye ji her muzîkek 10-15 sanîye şixulandiye, ne Spotifyê, bes YouTubeê kir problem.

Gerek heta 20 sanîyeyan jî problem çênebe. Çi ye yanî? Tu dikî wekî din çawa wê ambîyans û atmosfera fîlma bi muzîkan dagirtî bidî?

Ser tarîxa muzîkê gelek xelek hene di qafê min da, lê jiber van problemên telîfê nikanim çêkim.

Li ser programa Kurdîxane Akademîyê mêvanê Mizgîn Xanê bûm. Wê ser podcastê pirsî û min jî tevî ku ez pir nizanim û nikanim xeber bidim jî bêyî metneka ez ser xebitîme, cewab dan.

Tevî rengên Claude Monet, tevî êş û jana li hêla çepê û tevî remz û mecazên ne ji ti zimanî bi xatirê te.

Tu dikarî bi vê butona li jêr Share vê bultenê ji nas û dostên xwe ra bişînî û bikî ku karên me kesên wek te delal bibînin. Û li jêr butonê, lînkên din ên Perxudres Podcastê hene, dikarî li wan jî binêrî, wê kêrî te werin.

Share

Malper: www.perxudres.com

Instagram: www.instagram.com/perxudres

YouTube: www.youtube.com/@perxudres

Patreon: www.patreon.com/perxudrespodcast

Spotify: Perxudres Podcast

Apple Podcasts: Perxudres Podcast

Dûrîya ji kitab û defteran kir ku ez li fîlman binêrim hinekî. Piştî demeka dirêj min vekir fîlmek sêr kir ji MUBIyê: No Good Men - Mêrên Rind Tune Ne.

Min ji samîmîyeta fîlmê hez kir û rabû ser xelekeka podcastê hazir kir. Ez ne bi çavên sînefîlekî, lê normal, bi fikrên temaşevanekî li fîlman dinêrim û fîlm çi tîne bîra min behsa wan meseleyan dikim.

Mektûbdarekî nû hate Perxudres Podcastê: Guhdar Ro.

Di mektûba pêşî da ku mektûbdar bixwaze bi navê mistear be ez jê dixwazim ku herfekê bêje bo ez bikim navê wî navê wê.

Herfa ku vî mektûbdarê nû xwestibû berê li ser mektûbdareka din bû. Loma min got herfeka din yan jî navekî bêje. Wî jî got Guhdar Ro.

Guhdar Ro di mektûba xwe ya pêşî da bi hesret û bêrîkirinê û bi pirsan li mala xwe û li zarokîya xwe digere.

Gava zeman û fersend çêdibe ez hinek xelekên berê restore dikim. Min anî navê wê Barana Birînan Şil Dike mektûbeka Guhdar D. restore kir.

Jiber ku li ser kitaba Guhdar D. koda QR heye, û milet gava kitabê dixwîne li podcastê jî guhdarî dike, ez dixwazim temamê xelekên ketine wê kitabê rind î restorekirî bin.

Tu jî dikarî mektûbên xwe ji Perxudres Podcastê ra bişînî. Ez her tim jî li benda mektûbên te me: Fedî meke, bi Kurmancîya dîya xwe, bi zimanê mala bavê xwe binivîse û bişîne, ez destekên edîtoryal didim, em bi hev ra hazir dikin xeleka podcastê. Adresa min: omerfarukbaran@hotmail.com

Niha tevî vê meseleya malê, tevî vê meseleya min jiber koçerîyê diqehirîne, tevî rengên Claude Monet bi xatirê te.

Tu dikarî bi vê butona li jêr Share vê bultenê ji nas û dostên xwe ra bişînî û bikî ku karên me kesên wek te delal bibînin. Û li jêr butonê, lînkên din ên Perxudres Podcastê hene, dikarî li wan jî binêrî, wê kêrî te werin.

Share

Malper: www.perxudres.com

Instagram: www.instagram.com/perxudres

YouTube: www.youtube.com/@perxudres

Patreon: www.patreon.com/perxudrespodcast

Spotify: Perxudres Podcast

Apple Podcasts: Perxudres Podcast

Guhdar G. di mektûba xwe ya nû da ji tarîya şevê ser meseleya zewacê nivîsîye.

Zewac, zewicandin tim jî meseleyeka mihîm bû di heyata însanan da, lê berê belkî ti carî ewqas minaqeşe çênedibûn ser.

Wer tê xanê ku lezûbeza zemanê em têda û qalib û qaîdeyên zewaca klasîk li hev nakin, reformeka mezin lazim e.

Komedyen Deniz Göktaş bi stand-upa xwe mora xwe li havîna Tirkîyê xist û hat girtin.

Di stand-upê da Deniz Göktaş li nigê Serokê Tirkîyê Recep Tayyip Erdogan xistibû û hema bêje herkes li bendê bû ku ew bikeve hepsê.

Jiber ku herkes zane talî heps û zindan e, li Tirkîyê kes newêre ji Erdogan ra bêje sîya sola te xwar e.

Wextekê li Sûrîyê jî ti kesî newêribû ser Mala Esadan şorek bigota.

Perxudres Podcast van xelekên xwe bi destekên guhdarên xwe yên delal çêdike. Eger tu ji vê podcastê îstîfade dikî tu jî dikarî ji Patreonê destekê bidî.

Ji bultena 07an, tevî rengên Claude Monet bi xatirê te.

Tu dikarî bi vê butona li jêr Share vê bultenê ji nas û dostên xwe ra bişînî û bikî ku karên me kesên wek te delal bibînin. Û li jêr butonê, lînkên din ên Perxudres Podcastê hene, dikarî li wan jî binêrî, wê kêrî te werin.

Share

Malper: www.perxudres.com

Instagram: www.instagram.com/perxudres

YouTube: www.youtube.com/@perxudres

Patreon: www.patreon.com/perxudrespodcast

Spotify: Perxudres Podcast

Apple Podcasts: Perxudres Podcast

Mesele xwendina keçikan, min bi xelekeke podcastê ji serê sedsala 21ê berê xwe da sedsala 19an û bala xwe da ser Elizbeth Blackwell ku wê piştî redkirina gelek unîversîteyan, sala 1849an li New Yorkê, ji Fakulteya Tibê ya Geneva dîplomaya xwe sitandiye û navê xwe li tarîxê neqişandiye.

Çi keçik çi kurik, ez bi xwe bi salan e li ser fikra we don’t need no education, we don’t need no thought control im, bes heyat di vê sedsala 21ê da rê û fersendê nade ku însan li gor fikrên xwe hereket bike.

Guhdar D., bi mektûbekê ji germa havînê, ji karûbarên doktorîyê serê xwe rakiriye çûye ber Çemê Dîcleyê; dengê beqan tê ji mektûbê.

Taşra gotineka bi Tirkî ye û bo derên dûrî merkezan tê gotin. Min li ferhengan nihêrî, lê gotineka tam li taşrayê tê, tam li ser wê tarîfê nedî.

Ez çendek e bar dikim û li taşraya xwe bi cî dibim, li Sirûcê. Tekana motîvasyona min domandina Perxudres Podcastê ye. Min anî meseleya maleka 1+1 jî kir xelekeka podcastê.

Perxudres Podcast van xelekên xwe bi destekên guhdarên xwe yên delal çêdike. Eger tu ji vê podcastê îstîfade dikî tu jî dikarî ji Patreonê destekê bidî.

Ji bultena 06an, tevî taşrayê, tevî şevên bêxew, tevî jana li hêla çepê, tevî all in all you're just another brick in the wall, tevî rengên Claude Monet bi xatirê te.

Tu dikarî bi vê butona li jêr Share vê bultenê ji nas û dostên xwe ra bişînî û bikî ku karên me kesên wek te delal bibînin. Û li jêr butonê, lînkên din ên Perxudres Podcastê hene, dikarî li wan jî binêrî, wê kêrî te werin.

Share

Malper: www.perxudres.com

Instagram: www.instagram.com/perxudres

YouTube: www.youtube.com/@perxudres

Patreon: www.patreon.com/perxudrespodcast

Spotify: Perxudres Podcast

Apple Podcasts: Perxudres Podcast

Ez car caran li nivîsên xwe yên berê rast têm û wan dikim xelekên nû yên podcastê. Hele ku wexta min tune be yan ez nexweş bim filan, ew nivîsên berê pir kêrî min tên.

Wê dema hanê li BotanTimesê li nivîseka xwe ya ser mêrên kor rast hatim. Min bîr kiribû ew nivîsa payîza 2023yan, min anî ew bo podcastê hazir kir, ji wextan havîna 2026an.

Abdullah Încekan, nivîskarê bi tercûmeyên xwe yên ji Almanî tê naskirin, ser ajotina bisîklêtê mektûbeka nû şand.

Gulana 2026an, di mektûba yekê da, Abdullah Încekan qezaya xwe ya giran nivîsîbû û di mektûbê da bi şiîreka Rainer Maria Rilke li heyatê nihêrîbû.

Di mektûba duduyan da Abdullah Încekan bi bisîkletê ji nexweşxaneyeka Almanya diajo zarokîya xwe, diajo hêla Tekman û Erzirûmê bi xewn û xeyalan.

Ji bultena 05an, tevî halê koçer, tevî dilê bi keder û keser, tevî rûyê bi ken û kêf, tevî havîna dikele û disincire, tevî rengên Claude Monet bi xatirê te.

Tu dikarî bi vê butona li jêr Share vê bultenê ji nas û dostên xwe ra bişînî û bikî ku karên me kesên wek te delal bibînin. Û li jêr butonê, lînkên din ên Perxudres Podcastê hene, dikarî li wan jî binêrî, wê kêrî te werin.

Share

Malper: www.perxudres.com

Instagram: www.instagram.com/perxudres

YouTube: www.youtube.com/@perxudres

Patreon: www.patreon.com/perxudrespodcast

Spotify: Perxudres Podcast

Apple Podcasts: Perxudres Podcast

Sala 2002yan Tirkîye jî hebû îcar. Tê bîra min li qehwexaneyên Sirûcê, însanên me taximên li hember Tirkîyê digirtin, digotin ‘‘bira Tirk der din..’’

derdan, fiîleka enteresan e, min pir nedîtiye di kitaban da, ez li ser medyayê lê rast nehatime. Di Kurmancîya medyayê da bi wê mehneyê têkçûn heye.

Heta çend salên berê jî min têkçûn nizanibû, niha ez dibêjm Tirkîye têk çû, lê wextekê min digot, Tirkîyê der da.

Û fiîla li hember derdanê jî, bi mehneya serketinê vexwarin bû di zarokîya min da. Îro ez bêjim Tirkîyê vexwar bi min jî ecêb tê êdî.

Piştî vê futbolê û van fiîlan em derbazî bultenê bin, ma ne? De em derbaz bin.

Mektûbdareka nû hat Perxudres Podcastê, Guhdar G. Di mektûba xwe ya pêşî da Guhdar G. ji qereberbangekê behsa xewnekê, behsa eşq û evînekê, behsa îmtihanekê dike.

Ji mektûbê tê xanê ku li unîversîteyê hiqûqê dixwîne Guhdar G. ku ez bi vê kêfxweş bûm. Tevî mektûba Guhdar G. melankolîk bû jî bo çi kêfxweş bûm, bêjim..

Sala 2022yan dema min dest bi Perxudres Podcastê kir ez li bendê bûm ku ji unîversîteyan gêncên hiqûq, psîkolojî, sosyolojî û ziman û edebîyatê filan bala xwe bidin ser vê podcastê, lê ji mesaj û mektûban ez dibînim ku pirtir gêncên fen û fîzîk û matematîkê, gêncên tibê guhên xwe didin ser.

Bi xêra mektûba Guhdar G. belkî hinek gêncên din ên ji hêla hiqûq û sosyolojî û psîkolojîyê mektûban bişînin. Meraq dikim ew çi difikirin, ew çi dibêjin, ew çi hîs dikin vî zemanî.

Çend roj in li Diyarbekir im û bi medyakran ra danûstandinê dikim. Medyakarên bi tecrûbe ne, bi salan bo medyayên mezin şixulîne..

Gava ez ji wan ra dibêjim ez Perxudres Podcastê bi destekên guhdaran dimeşînim bi wan pir ecêb tê.

Sîstema ez behsê dikim dikeve serê wan, lê cesaret nakin ku tiştekî wisa bikin. Kurdî, Kurmancî hîn pir dûrî vê sîstemê ye.

Lê yên Perxudres Podcastê guhdarên wê elît û entelektuel in. Guhdarên wê yên budçeya wan rê dide hinek bi 1, hinek bi 3, hinek bi 5, hinek bi 10, hinek bi 20, bi 30 dolar destekê didin û dikin ku bi hezaran kes li vê podcastê guhdarî bikin.

Dibêjim, tim dibêjim bi Kurdî jî weşaneka serbixwe mimkun e, bi destekên te yên ji Patreonê mimkun e.

Heyata min hêlek Firat û hêlek Dîjle, di orta wan da derbaz dibe. Ez dîsa hatim hêla Dîjleyê ku bi karûbar dûzenekê çêkim, bes heyat pir biha ye li vir, îdare û debara min nabe.

Kar hene; hinek kar hene. Zanim, ku di wan da bişixulim wê Perxudres Podcast li ba keve û ez ê xelekên nû jiber westê bi sersarîyê çêkim. Naxwazim wisa bibe.

Loma ji hêla Dîjleyê dîsa vedigerim Ferêt û li wir bi heyateka mesrefên wê erzan, bala min li ser podcastê dewam dikim.

Vê rewşa min a di orta du çeman da xelekeka ku min Sibata 2026an hazir kiribû anî bîra min: Navê Te Dîcle û Navê Te Ferat.

Ji bultena 04an, tevî xem û elemên dinyaliga derewîn, tevî bêrîkirinê, tevî bi halên dîn û dîwane, tevî min çi kir çi xwar çi vexwar, tevî rengên Claude Monet bi xatirê te.

Tu dikarî bi vê butona li jêr Share vê bultenê ji nas û dostên xwe ra bişînî û bikî ku karên me kesên wek te delal bibînin. Û li jêr butonê, lînkên din ên Perxudres Podcastê hene, dikarî li wan jî binêrî, wê kêrî te werin.

Share

Malper: www.perxudres.com

Instagram: www.instagram.com/perxudres

YouTube: www.youtube.com/@perxudres

Patreon: www.patreon.com/perxudrespodcast

Spotify: Perxudres Podcast

Apple Podcasts: Perxudres Podcast

Ez van rojan Thomas Bernhard dixwînim; ew nivîskarê ku dîn, dewlet û sîyasetê dide ber top û tîran, gotinên giran li wan dixîne.

Belkî loma hinekî din bi çavekî din li meseleyên hikûmranîyê dinêrim ez jî, li meseleyên ewên zal û ewên zordest.

Nivîskarê sedsala 20an bû Thomas Bernhard, ez podcasterê sedsala 21ê, de em derbazî bultenê bibin.

Dr. Abdullah Încekan, nivîskarê bi kitaba xwe ya ser zimanê Kurdî û tercûmeyên ji zimanê Almanan tê naskirin, Gulana 2026an bi bisîklêta xwe qezayeka giran kir.

Jiber ku dîreksîyona bisîklêtê ketibû qirika Dr. Abdullah Încekan, nivîskarê me çûbû hedê mirinê, krîtîk bû rewşa wî.

Bi qasî barê krîtîk ji ser wî rabû ji odeya xwe ya nexweşxaneyê mektûbek şand Dr. Abdullah Încekan. Çito mektûb hat ez rûniştim hema min mektûb bo weşanê hazir kir.

Dema min mektûb bo weşanê hazir dikir, min dî Dr. Abdullah Încekan bisîklet nivîsîye. Ez dikarim zimanê xwe bo, pisqilêt, bisiqlêt, bisqilêtê serbest doş kim, lê gotina bisîkletê giran, çetin hat ji zimanê min ra.

Bi Tirkî dikarim bibêjim, bisiklet, lê qey zihar bi Kurdî wer neelimîme loma giran û çetin hat.

Min dîsa hema vekir li Ferhenga Rastnivîsê ya Weqfa Mezopotamya nihêrî, weqfê gotiye, bisiklêt, biskilêt, bisqilêt, bîsîklêt, paysikil, paysigil, piskêlêt, piskilêt, pisqilêt pîsîklet, dibêjin, lê li standardê bisîklêt nivîsîye.

A Dr. Abdullah Încekan kumek kêmtir bû ji ya Weqfa Mezopotamya, min neguherand û ez bi bisîkleta wî ketim qeydê. Mektûb bi şiîreka Rainer Maria Rilke diqediya:

Sibata 2026an min bi sê kesên di sê sedsalên cihê da bisîklêt ajotine û kitab nivîsîne xelekek hazir kiribû, bi bisîklêta Abdullah Încekan hat bîra min.

Nivîskarê Rûs Lev Tolstoy 67 salî dest bi ajotinê bisîklêtê kiriye. Li ba psîkologan metaforeka meşhûr e Bisîklêta Tolstoy ku mehnaya wê jibo ti tiştî ti carî ne dereng e.

Car caran ez vedikim ji YÖKê tezan dixwînim bi Kurdî û bi Tirkî. Hez nakim ji akademîyê, lê ji kar û xebatên akademîyê îstîfade dikim, bêlome be.

Çendekî berê di nêv behrek tez da ez li ferhengeka ser devoka Serhedê rast hatim; Hüseyin Koçuk sala 2023yan bi rêberîya Hayrullah Acar hazir kiriye.

Da ez ferhenga xwe fireh, pahn, qalind bikim ez ferhengan jî - ewên pir mezin ne têda -nola romanan bixwînim dixwînim pir caran. Min ferhenga Hüseyin Koçuk xwend û podcastand.

Di devoka Serhedê da xêncî yên bi Tirkî, kelîmeyên bi Ermenî û bi Rûsî hene. Hinekên bi Tirkî û bi Ermenî bi min nas in, ez guhnasê wan im, lê ewên bi Rûsî pir dûrî dîyalekta min in.

Bi ferhenga Hüseyin Koçuk çi hat bîra min, min rabû nivîsî û xelekeka podcastê hazir kir.

Fotografên akademîsyên û nivîskarên me pir hindik in li ser Googleê. Ecêb e, fotografên nivîskarên me yên sed salên berê jî pir hindik in û fotografên nivîskarên me yên vî zemanî jî.

Li ser Googleê çend fotografên Hayrullah Acar hebûn, lê çend fotografên Hüseyin Koçuk bi min lazim bûn. Min nedî tiştek, qehirîm, min bê fotograf, bi resimeka James Bryce îdare kir, da bi Gilîdaxê tehma hêla Serhedê bide hinekî.

Gotineka li ser TikTokê populer e, lêxê bira deng here Gilîdaxê Îsmaîl, lêxe bira deng here Gilîdaxê. Min ew gotin li dawîya xelekê danî, min xwest ez navê wî gêncî jî yazi bikim, lê min ew jî nedî.

Perxudres Podcast van xelekan bi destekên guhdarên xwe yên delal hazir dike. Eger kêfa te tê ji van xelekan ra û tu jê îstîfade dikî, mebêje pir e mebêje hindik e tu jî ji Patreonê destekê bide ku moral û motîvasyona me ya bo vê podcasta serbixwe bilind bibe.

Ji bultena 03yê tevî barek plan û proje, tevî bi dehan defter û bi hezaran fotograf, tevî rengên Claude Monet bi xatirê te.

OF.

Tu dikarî bi vê butona li jêr Share vê bultenê ji nas û dostên xwe ra bişînî û bikî ku karên me kesên wek te delal bibînin. Û li jêr butonê, lînkên din ên Perxudres Podcastê hene, dikarî li wan jî binêrî, wê kêrî te werin.

Share

Malper: www.perxudres.com

Instagram: www.instagram.com/perxudres

YouTube: www.youtube.com/@perxudres

Patreon: www.patreon.com/perxudrespodcast

Spotify: Perxudres Podcast

Apple Podcasts: Perxudres Podcast

Bi qasî ji dest min tê kelîmeyan bi halên wan ên standard - te dî min hema çito standart kir standard - dinivîsim. Lê çi bikim şaşîyên min jî pir in, û nebûna redaktorekî karê min hîn zehmet dike.

Ne ez hatim gazincan, ez hatim bultenê hazir bikim bo te. De ku tu hazir î em destpê bikin.

Min navê wê Qurban.. xelekek hazir kir. Navên xelekên Perxudres Podcastê kêm caran bi tek kelîmeyekê ne. Ez ser vê xelekê jî fikirîm, lê min dî çêtir e ez bi tek kelîmeyekê bidim vê xelekê. Qurban bi serê xwe tenê têra xwe giran bû.

Min bo vê xelekê resima bi firçeyên Caravaggio (1571-1610) kir qapax. Resim sala 1603yan hatiye çêkirin û navê wê Qurbankirina Îshak e, Sacrifice of Isaac bi Îngilizî. Navê Isaac Newton hat bîra min. Ji min ra bigotana ew jî Îshak e, Îshak, heta Îshaq, Îshaq Newton belkî min bi sempatîyeka din li wî camêrî binêrîya heta niha.

Mektûbdarek nû hat Perxudres Podcastê: Guhdar T.. Di mektûba xwe ya pêşî da Guhdar T. di derseka tibê da ji xew radibe bi gotinekê û dikeve tiştekî wekî depresyonê.

Gava guhdar dixwazin mektûban bişînin ez pêşda ji wan ra dibêjim bi qasî ji dest we tê bi devok û dîyalekta xwe binivîsin. Çinku lazim e zimanê mektûbê samîmî be, û însan bi devok û dîyalekta xwe samîmî ye. Standard halekî resmî çêdike hinekî û samîmîyetê dikuje.

Ez bi xwe jî dibêjim dixtor, lê bi standardê elimîme doktor dinivîsim tim. Weqfa Mezopotamya jî dibêje diktor, dixtor, doqtor, doxtir, doxtor, duxtor, dûxtûr, textor, tixtor tixtûr ne standard in, lê doktor standard e. Min dît, Guhdar T. dixtor tercîh kiriye, min jî wisa hişt.

Bo qapaxa mektûba Guhdar T. ez di mabêna du resiman da mam. Ji resiman yek a Rembrant (1606-1669) e, yek jî a Luke Fildes (1843-1927). Atmosfera mektûba Guhdar T. li esera Rembrant jî dihat bi xwendekarên di dersa anatomîyê da, lê min hizna doktorekî li ber serê nexweşê xwe tercîh kir.

Eger bixwazî tu jî dikarî mektûbeka xwe ya ser heyatê, ser eşq û evînekê, ser birînekê, ser xatirayekê ji Perxudres Podcastê ra bişînî. Mektûb terapî ye, û Perxudres Podcast platforma guhdarên xwe ye.

Ji bultena 02yê, li ber serê min defter û qelem û kolaj û kitab, tevî rengên Claude Monet, tevî derdên dinyaligê bi xatirê te.

OF.

Tu dikarî bi vê butona li jêr ‘‘Share’’, vê bultenê ji nas û dostên xwe ra bişînî. Û li jêr butonê, lînkên din ên Perxudres Podcastê hene.

Share

Malper: www.perxudres.com

Instagram: www.instagram.com/perxudres

YouTube: www.youtube.com/@perxudres

Patreon: www.patreon.com/perxudrespodcast

Spotify: Perxudres Podcast

Apple Podcasts: Perxudres Podcast

Eger tu jî hazir î, ku tu jî hazir î, ku tu jî hazir î eger, em destpê bikin.

Guhdar D. piştî demeka dirêj - jiber perforansa wê ya şandina mektûban, mehek, demeka dirêj e - bi mektûbeka nû hat: Hesreteka Absûrd. Di vê mektûbê da, Guhdar D. bi berbang û şevderengeka Diyarbekir behsa bêrîkirinekê dike bi dengê muzîkê; li stûyê wê şaleka şil heye.

Mektûbên Guhdar D. yên 2024 û 2025an li ser Perxudres Podcastê hatibûn weşandin bûbûn kitab û ew kitab bi etîketa Weşanxaneya Dozê derketibû 2026an.

Bi navê li ser kitabê eşkere bûbû ku Guhdar D. di heyata xwe da Delyadil e. Piştî kitabê jî wê xwest navê wê Guhdar D. bimîne li ser Perxudres Podcastê.

Nivîskarên tirşik.netê Nîsana 2026an pirsên xwe şandibûn ji min ra. Ji pirsan yek ser Guhdar D. ya eşkere bûbû, bûbû Delyadil bû. Bi qasî ji dest min hat min cewabeka zelal da wê pirsê jî.

Min navê wê Bi Minaqeşeya Mem Ararat û Kom Muzîkê Onlyfans xelekek hazir kir. Sedsala 21ê însan guherand bi dewra dîjîtal ra. Gelek tişt bi qalib û qaîdeyên berê çênabin, nameşin êdî. Gerek minaqeşeya Mem Ararat û Kom Muzîkê hinek tiştan biguherîne. Di vê xelekê da ser telîfê, ser weşanxaneyên telîfê nadin jî çend gotin hene.

Weşanxaneya Yapı Krediyê berî hewa û heyat bikeve havîna 2026an ragihand ku Orhan Pamuk navê wê Kelimeler ve Resimler bi kitabeka nû tê.

Danasîna kitabê raber dike ku kitab kitabeka xatirayên Orhan Pamuk e, û tevî metnên din tiştekî nola Öteki Renklera wî ye.

Di kitabê da ser Masumiyet Müzesiyê jî xusûsî hinek not û nivîs hene. Kitabê bi fîlma xwe ya li ser Netflixê careka din deng dabû.

Serê Adara 2026an min navê wê Kurdîya Masumîyet Muzîsesîyê Çi Ye? xelekek hazir kir. Li gor îstatîstîkên sala 2026an guhdaran vê salê tewr zêde li vê xelekê guhdar kiriye.

Gulana 2026an TÇ. RB. FG. MA. RR. MŞ. AP. YT. bûn destekçîyên nû û hejmara dostên vê podcastê rakirin 53yan.

Perxudres Podcastê Gulana 2025an dest bi weşana bi destekên guhdarên xwe kiribû.

Hîn jî gelek guhdarên halên wan rê didin ji min IBANê dipirsin, dixwazin bi derbekê ra pereyên pir bişînin, lê ez hinekî mehcûb hinekî kubar, bes bi zimanekî zelal red dikim.

Derdê min ew e ku Perxudres Podcast bi destekên gelek guhdaran, bêyî ku bikeve bin hikmê sermaye û sîyasetê, weşana xwe bidomîne, dewam bike. Bi Tirkî süreklilik, sürdürülebilirik, serbestlik e derdê min.

Guhdar hene dixwazin ji IBANê bi derbekê ra 1000 dolar, bi nivîsê hezar, bişînin bi derbekê ra, lê ez dibêjim ‘‘Na, tu li şûna wê ji Patreonê her meh 1 yan ku hikmê te heye 10 dolar bişînî hîn çêtir e’’ ku bi gelek kesan ecêb te ew fikra min.

Ew guhdarên dixwazin pereyên pir bidin, ecêb e, gava ez dibêjim ‘‘Li şûna 1000 dolar 1 dolar destek bidin’’, nadin. Çinku 1 dolar destek eyb dihesibînin, çinku li cem me kultûra destekê pir şaş e, ne li gor dewamdarîyê ye.

Werhasil, ez dixwazim li her derê bi serbilindî bêjim bi Kurdî jî weşaneka serbixwe mimkun e, dixwazim bêjim binêrin bi sedan destekçîyên Perxudres Podcastê hene û bi hezaran kes bi destekên wan guhdaran li vê podcastê guhdarî dikin.

Ji bultena 01ê, li ber min bi Kurdî kitabên edebîyata klasîk, bi Tirkî kitabên edebîyata modern, tevî rengên Claude Monet, tevî barek hizn û hezkirin, bi xatirê te.

OF.

Tu dikarî bi vê butona li jêr ‘‘Share’’, vê bultenê ji nas û dostên xwe ra bişînî. Û li jêr butonê lînkên din ên Perxudres Podcastê hene.

Share

Malper: www.perxudres.com

Instagram: www.instagram.com/perxudres

YouTube: www.youtube.com/@perxudres

Patreon: www.patreon.com/perxudrespodcast

Spotify: Perxudres Podcast

Apple Podcasts: Perxudres Podcast