يلقب بـ«طرفة »

شاعر انقتل وهو صغير بالعمر

عاش بالجاهلية

ابو طرفة مات من هو صغير وعمامه اخذوا الحلال كلها

وكان لطرفة خال اسمه المتلمس

كان كبير بالدولة كان قريب من الملك

كان الملك عمرو بن هند كان ناوي إذا مات او ترك الملك يخلي اخوه قابوس هو اللي يحكم بعده

يوم من الأيام كان طرفة وخاله المتلمس رايحين للملك اللي هو عمرو

قال لهم الملك انتم من اليوم تصيرون مع قابوس اخوه تجلسون معه وترافقونه وين ماراح

وكان قابوس يحب الوناسه واللعب

وكان إذا طلع يصيد يركض ورا الصيد وطرفة والمتلمس يركضون معه

و إذا جاء آخر النهار يكونون كلهم تعبانين

واليوم اللي بعده قابوس يقعد يشرب الخمر ويستانس

أما طرفة والمتلمس يكونون عند باب ينتظرونه من الصبح إلى المغرب

ويوم من الأيام جلس يشرب قابوس اليوم كله وطبعاً طرفة والمتلمس عند الباب ينتظرونه

وهو ما سمح لهم يدخلون يعني ماعطاهم وجه

وطفح الكيل فقال قصيدة يهجو فيها قابوس

قصيده طويل يعني

وفي بيت يقول فيه

فليت لنا مكان الملك عمرو

رغوثًا حول قبتنا تدور

يقول ياليت بدل ما يكون لنا هذا الملك يكون عندنا شاة ترضع اولادها وتلف حول الخيمة

يعني اختصار القصيدة كامل

يحتقر الملك وقابوس وان الشاة انفع منه

وان قابوس ظالم

بعد ماقال القصيدة ذي صارت تتناقل بس ماوصلت للملك

وكان لطرفة أخت وكان زوجها ابن عمه اسمه عبد عمرو

طرفه كان يكره كره

وكان سمين عبد عمرو

وطرفة هجاء عبد عمرو بعد

وكان عبد عمرو قريب من الملك بعد

دخل الملك وعبد عمرو مكان الاستحمام

وبعد ما شاف الملك جسم عبد عمرو قال مازحًا

" لقد كان ابن عمك طرفة راك حين قال"

ولا خير فيه غير أن له غنى

وأن له كشحًا إذا قام أهضما

يعني

مافي ميزة إلا انه غني يعني لو راحت فلوسه مافيه شي تمدحه

والكشح اللي هو الخصر

يعني انه لو وقف يبان خصره

وفي بيت يقول

كان السلاح فوق شعبية بانه

ويشرب حتى يغمر الخصر قلبه

يعني

يشبه جسمه الطويل بساق شجرة ألبان

ويقول انه هو يشرب كثير لدرجة ان بطنه كله خمر

القصيدة كلها استهزاء في عبد عمرو زوج اخته

بعد ماسمع القصيدة عبد عمرو قال للملك:

ترى اللي قاله فيني مايجي اللي قاله فيك يعني

استغرب الملك قال : وش قال عني ؟

وسدح له القصيدة كامله اللي كان يهجي فيها الملك وأخوه

فقال عمرو : ما اصدقك

بس هو مصدق بس ما يبي يبين عشان طرفة مايهرب

وفي سبب ثاني إن بين وبين طرفة قرابة نسب

وكان الملك معصب مو عشان هجاء بس

لا طرفة متغزل بأخت الملك بعد وهذا عند العرب شيء كبير جداً

(ماراح اذكر يوم تغزل باخته)

‏مرة من المرات استدعى الملك طرفة وخاله المتلمس

‏كان الملك كاتب رسالتين مختومة أعطى كل واحد منهم رسالة وقال

‏خذها إلى عاملي في البحرين راح يكرمكم ويعطيكم جائزة

لكن داخل هاذه الرسالة

امر بقتلهم

طيب ليش الملك ماقتلهم هو

لان خايف من قبيلتهم

بنو بكر قبيلة قويه

يعني لو قتلهم هو بتقوم حرب

عشان لا صار شي يلومون العامل

طيب ليه يبي يذبح المتلمس بعد؟

لأنه يعرف ان المتلمس شاعر خطير

بيقعد يهجيه

فقال اخلص عليهم مرة وحدة

بعد ما أخذوا الرسائل من الملك مشوا في طريقهم رايحين للبحرين ولما وصلوا قريب من النهر وقفوا يرتاحون

المتلمس حس في شي مو طبيعي

قال لطرفة:

والله ما أرى هذا الرجل إلا قد كتب فينا شر

قال له طرفة : وما حملك على ذالك؟

قال المتلمس: لأنه عرف هجاءنا إياه

المتلمس ماكان يعرف يقرأ فلقى واحد من أهل الحيرة يعرف القراءة عطاه الرسالة وقال: اقرأها

الرجال فتح الرسالة

انصدم

يقول اهرب انقذ نفسك

مكتوب بالرسالة

«باسمك اللّهم من عمرو بن هند إلى المكَعْبر، إذا أتاك كتابي هذا مع المتلمّس

فاقْطَعْ يديه ورجليه، وادفنه حياً»

رمى الرسالة بالنهر وهرب

وقال ياطرفة افتح رسالتك ترى بتموت انحاش

رفض طرفة

وقال لا اخون الملك

الثقة الزايدة

ويقول أنا بأوصل مثل ما طلب مني

يقول المتلمس لطرفة : ياطرفة معك والله مثلها

قال طرفة: لا الملك مايكتب كذا انت تبي تحسدني على الجائزة

كمل طرفة الطريق ووصل إلى عامل البحرين

واعطاه الرسالة

قال العامل : تدري وش مكتوب بالرسالة

قال طرفة: اي انك تحسن لي وتكرمني

قال العامل: ياطرفة بيني وبين صداقة انحاش ترى مكتوب بالرسالة امر اني اقتلك

قال طرفة: انت بعد تبي تحسدني تبيني اهرب وأنت تأخذ الجائزة والله ما اهرب

يوم اصبح العامل إلا طرفة للحين موجود يبي جائزة

أمر العامل بحبسه

وقتل طرفة

وبس والله

مو كل حي عايش

فيه ناس من سنين وهم يصحون بنفس الوقت ويروحون لنفس المكان ويسوون نفس الاشياء ويرجعون ينامون وهم ينتظرون بكره يختلف

لكن بكره ما يختلف

لأنهم ما غيروا ولا شي

اخطر شعور مو الحزن

اخطر شعور انك تتعود

تتعود على حياة ما تحبها

تتعود على حلم كل يوم يبعد

تتعود على انك تقول بعدين لين يصير البعدين عمر كامل

الوقت ما يسرقك فجأه

ياخذ منك شوي شوي

يوم يروح وانت تقول عادي

واسبوع يروح وانت تقول لسه بدري

وسنه تروح وانت مستغرب كيف مرت بسرعه

وفجأه تلقى نفسك تسأل وين راح عمري

المشكله ان العمر ما يضيع في يوم

يضيع في الايام اللي قلت عنها عادي

كل شي كبير يبدأ بشي صغير

حتى الندم

واذا فيه شي يستحق انك تخاف منه فهو مو الفشل

هو انك توصل لنهاية عمرك وتكتشف انك عشت الحياة اللي فرضها عليك الخوف مو الحياة اللي كنت تتمناها

ابدأ بخطوة اليوم حتى لو كانت صغيره

لأن السنين بتمشي سواء تحركت او جلست مكانك

والفرق الوحيد انك يوم تلتفت ورا بتلقى يا قصه تقولها وانت فرحان

او فرص ضاعت ما يقدر يرجعها شي

بس هاذا الي بقوله لكم

وكلنا نعرف البروتوكول عند العرب أن إذا كتبت قصايد في بنتنا ما نزوجكم ونزوجها شخص ثاني عشان ننفي ذي المعلومة

وهذا الي صار فعلاً

وبعد غيبة وفراق طويل شافها جميل وقال لها

فصحى

قريبان مربعنا واحد

فكيف كبرتُ ولم تكبري

يعني

أنا وياك بيننا سنة سنتين ولكن شكلي أكبر من شكلك بكثير

من التعب والهم والفراق

بس انتي جميلة بكل حالاتك

قصيدة ثانية

كان الإمام الشافعي في مجلس وجاء واحد ينقال له يعقوب البويطي وقال للشافعي انت قلت قصايد بالزهد لك شي في الغزل؟

وقال الإمام الشافعي

فصحى

يا كاحِلَ العَيْنِ بَعْدَ النَّوْمِ بِالسَّهَرِ

مَا كَانَ كُحْلُكُ بِالمَنْعُوتِ لِلْبَصَرِ

لَوْ أَنَّ عَيْنِي إِلَيْكَ الدَّهْرَ ناظِرَةٌ

جَاءَتْ وَفاتِي وَلَمْ أَشْبَعْ مِنَ النَّظَرِ

سُقْيا لِدَهْرٍ مَضى مَا كَانَ أطْيَبَهُ

لَوْلا التَّفَرُّقُ والتَّنْغِيصُ بِالسَّفَرِ

إِنَّ الرَّسُولَ الَّذِي يَأْتِي بِلا عِدَةٍ

مِثْلُ السَّحَابِ الَّذِي يَأْتِي بِلا مَطَرِ

دَعْنِي أَمَتِّعُ طَرْفِي مِنْكَ بِالنَّظَرِ

فَنُورُ وَجْهِكَ يَجْلُو ظُلْمَةَ البَصَرِ

من أجمل قصايد الغزل الي قرأتها

وهذا الكلام من ديوان الإمام الشافعي

والقصة والقصيدة الأعظم كثير يعرفون القصيدة ولكن ما يعرفون القصة

الي هي لشالح بن هدلان وولده الأوسط ذيب بن شالح القحطاني

وشالح يحب ولده حب مب طبيعي

ويوم من الأيام كان ذيب واخوياه يبون يساعدون ذيب عشان يصيد لأبوه وما حصلوا صيد فقالوا خلونا نروح لديار العتبان

وراحوا فعلاً

وقربوا من عند بير وشافوا ناس كثيرة عند البير جالسة ترتوي فقالوا خلاص نلف لفة على ما يخفون الناس

وشافهم قانص من فوق الضل وكان ما يعرفهم

ورماهم وما صاد إلا ذيب بن شالح

ومات ذيب

ورجعوا اخوياه وقالوا لأبوه الي هو شالح رحمه الله

ورثى ابنه في أبيات

وقال

نبطي

ياذيب أنا بوصيك لا تأكل الذيب

كم ليلة عشاك عقب المجاعة

كم ليلة عشاك حرش العراقيب

وكم شيخ قوم كزّته لك ذراعه

بيته لجيرانه يشيد على الطيب

وللضيف يبني في طويل الرفاعة

كني بعد فقده بحامي اللواهيب

وكني غريب الدار مالي جماعة

من اجمل قصائد الرثى الي قرئتها

والمصدر

مالك بالطويلة

وبس والله

وطبعًا ماتعمقت بالقصص

اختصرتها

ترى كل اللي كانوا بعلاقات محرمة بدأوا بـ بس نتكلم الشيطان ما يجيك يقول من أولها سو أكبر معصية لا يجيك حبة حبة لين تلقى نفسك متعلق وما تقدر تطلع

يمكن أنت دخلت هالعلاقة لأنك كنت تحس إن فيه شيء ناقص بداخلك وتدور أحد يعبي هالفراغ أو يطمن قلبك أو يخليك تحس إن لك قيمة

لكن اسأل نفسك بكل صراحة هل فعلًا ارتحت

ولا كل يوم زاد عندك الخوف والقلق والتعلق وصارت الذنوب تتراكم عليك

يمكن كنت تحسب إن الحب بيعوضك عن كل شيء

لكن اللي صار إنك شوي شوي قاعد تخسر راحة قلبك وأصعب شيء إن المعصية يمكن صارت بالنسبة لك شيء عادي

وأنت ناسي إن الله يشوف كل رسالة وكل اتصال وكل لحظة كانت بينكم

تخيل لو جاك الموت وأنت على هالحال وش بيكون جوابك بين يدين الله ؟

وهل هالشخص اللي تعلقت فيه بينفعك يوم القيامة أو بيشيل عنك حتى ذنب واحد

الله حرم هالعلاقات لأنه ما يبي لعباده إلا الخير وما يبي يشوفهم يتأذون ويعيشون بوهم نهايته كسر

والشيطان دايم يزين الحرام ويخليه يبين كأنه أحلى شيء لكن بالنهاية يترك الإنسان بقلب مكسور

لا تخلي لحظات مؤقتة تخسرك راحة الدنيا والآخرة

وإذا كنت صادق مع نفسك ارجع لربك اليوم قبل بكرة لأن ما أحد يضمن إنه يعيش لبكرة

والباب اللي فتحته بالحرام سكره بالتوبة

والله يفرح بتوبة عبده مهما كثرت ذنوبه وإذا تركت هالعلاقة لل لله

يمكن بالبداية تحس إنها صعبة لكن مع الوقت بتدرك إن أحلى شعور هو راحة القلب يوم تعرف إن الله راضي عنك

وإنك ما عدت تعيش بمعصية يمكن تكون سبب في تعبك

وإذا حسيت إنك محتاج أحد فضفض لربك قبل أي أحد

لأن الله ما يخذل أحد لجأ له ويمكن تترك شيء تحبه اليوم لكن بكرة بتشكر نفسك إنك اخترت رضا الله على رغبة مؤقتة

ولا تخاطر بآخرتك عشان شخص يمكن بعد فترة يطلع من حياتك وما يبقى معك إلا عملك

واللي يترك شيء لل لله الله يعوضه بأحسن منه فاصبر شوي يمكن رزقك بالطريق بس لا تستعجله من الباب الغلط

واخر شي ابي اقوله مدامك حي ترا باب التوبة مفتوح توبوا قبل يجي يومكم

وشكرا

يوم من الأيام كان الخليفة عبد الملك بن مروان جالس في مجلسه ويفكر وفجأة ارتفع صوت العلماء اللي عنده بالمجلس وكان بينهم نقاش حاد

سكتهم الحاجب بسبب ارتفاع أصواتهم

قال عبد الملك وش السالفة ليش أصواتكم عالية

قالوا كنا نتناقش عن مدينة واختلفنا هل هي موجودة فعلًا أو لا

قال وش هالمدينة ومن اللي بناها

قالوا هذي المدينة بناها الجن

انصدم عبد الملك وقال كيف ومن اللي يسكنها

قالوا الجن

قال وكيف

قالوا إن سليمان عليه السلام أمر الجن يبنون له مدينة عظيمة ما لها مثيل لكن إلى اليوم محد راح واكتشفها أو دخلها

نوقف شوي هنا

أكيد يدور في بالكم سؤال كيف العلماء عرفوا عنها

السبب إن بعض الرحالة كانوا يضيعون بالطريق ويشوفون هذي المدينة وبعدها يكتبون عنها وبعض الناس كانوا يطلعون يدورونها لكن يروحون وما يرجعون

نرجع نكمل

تحمس عبد الملك من وصف العلماء للمدينة وأمر يجهزون حملة تروح تكتشفها

وسألهم وين موقعها

قالوا في شمال أفريقيا

وكان فيه قائد تابع لعبد الملك موجود بافريقيا اسمه موسى بن نصير ومعه طالب ابن سهل والشيخ عبد الصمد

ارسلوا رساله

وصلت لموسى رسالة من عبد الملك وكان مكتوب فيها

“إنكم بتروحون تكتشفون مدينة الجن وإذا واجهكم الجن حاربوهم”

جهز موسى جيش قوامه ألف رجل وانطلقوا في رحلتهم

وفي الطريق صار لهم أشياء مريبة جدًا

كانوا أحيانًا يشوفون نار بعيدة وأحيانًا يسمعون أصوات وسط غابة فاضية ما فيها أحد غيرهم

وعلى كثرة الأحداث الا انهم استمروا

ووصلوا ووصفوها

قالوا إن أسوارها كلها من النحاس ومن شدة لمعانها يطلع منها شعاع وكانت الأسوار طويلة جدًا وما فيها أي بوابة والمدينة هادئة بشكل غريب

وفجأة سمعوا صوت ضحك

الصوت كان جاي من داخل المدينة

ترددوا قالوا خلاص نرجع لكن شجاعتهم غلبت خوفهم

قال موسى اربطوا السلالم ببعض حتى نوصل للسور

وربطوا وقال من يروح؟

وقال واحد انا

طلع أول جندي

وكل ما ارتفع صار يسمع الضحك أوضح

ولما وصل فوق السور وقف فجأة

وكان شكله مصدوم

بعدها بدا يضحك بصوت عالي

وصار موسى يصيح عليه وش تشوف تكلم

لكن الجندي ما رد

وفجأة رمى نفسه من فوق السور إلى داخل المدينة

وسمعوا صوت طيحته

وبنفس اللحظة ارتفع صوت الضحك أكثر

نادوه مرة ومرتين ولا رد

قال موسى من يطلع بعده

تقدم جندي ثاني

وقال له موسى إذا وصلت فوق قل لنا وش شفت

لكن صار له نفس اللي صار للأول

ضحك

ورمى نفسه

انتشر الخوف بين الجيش

بعدها تقدم جندي وقال أنا أطلع لكن اربطوني بحبل وإذا صار لي شيء اسحبوني

وافقوا وربطوه

ولما وصل فوق السور ضحك مثل اللي قبله

ورمى نفسه

وبدوا يسحبونه بالحبل

لكن ما رجع إلا رجوله فقط

أما باقي جسمه فكان مقطوع نصفين

انكسر الجيش وخافوا

وفجأة سمعوا صوت السلم يتحرك

وكان الشيخ عبد الصمد هو اللي طالع

قالوا له لا تطلع إذا صار لك شيء انتهينا

لكنه كمل

ولما وصل فوق السور جلس يطالع داخل المدينة

ثم ابتسم

وبدأ يضحك

الكل توقع إنه بعد لحظات بيرمي نفسه حتى انا توقعت معهم

وقعد فوق الربع ساعة وهو واقف على السور

وخلاص كانوا ينطرون صوت صدا طيحته

وبعدها قال أنا بخير كفاني الله شرهم

وقال أول ما طلعت شفت عشر جواري جميلات بشكل يعجز اللسان عن وصفه وكانوا ينادوني ويقولون تعال

وشفت كأن فيه بحيرة وقلت أقدر أنزل أسبح وأوصل لهم

لكن جلست أذكر الله وأدعي وبعدها راح السحر

واكتشفت إن اللي حسبته بحيرة ما هو إلا جثث جنودنا

بعدها نزل الشيخ عبد الصمد إلى داخل المدينة

ولقى كنوزًا ما تنوصف ذهب وألماس وجواهر وكل أنواع الغنائم

وقعد يدور ولقاء باب مخفي وفتحه ودخل الجيش ودخلوا كلهم

لكنهم كانوا يشوفون جثث في كل مكان

واستمروا يستكشفون المدينة

إلى أن وصلوا إلى باب مرصع بالزمرد والياقوت ومكتوب عليه

انظر إلى ما ترى أيها الرجل”

وكن على حذر من قبل ترتحل

وقدم الزاد من خير تفز به

“فكل ساكن دار سوف يرتحل

فتحوا الباب

ودخلوا بعدها غرفة مليئة بالدروع والسيوف والرماح وكلها مرصعة بالذهب

بعدها دخلوا غرفة ثانية مليئة بالأواني الذهبية والطعام

الا ان

وصلوا إلى غرفة فيها جارية جالسة

كانت جميلة جدًا وكأنها الشمس

ثوبها مرصع باللؤلؤ وعلى رأسها تاج وفي رقبتها عقد مليء بالجواهر

وكان جنبها غلامان

قال موسى مساء الخير

لكنها ما ردت

كرر عليها الكلام ولا ردت

تقدم أحد الجنود منها

واكتشف إنها ميتة

وقرب موسى ولقاها فعلًا ميتة والغلامان ميتين بعد

وتحتها رسالة مكتوب فيها”

من سهل الله له دخول مدينتنا

فليغنم منها ولا تلمسوا شيئًا من جسدي

فإنه جهازي بالدنيا ومن يأخذ منه شيئًا فسوف يلقى الهلكة

“ والسلام عليكم

قال موسى الكلام واضح خذوا اللي تبغونه من المدينة لكن لا تلمسون أي شيء هي لابسته

لكن طالب ابن سهل طمع

وحذره موسى

إلا إنه ما سمع الكلام

وأخذ التاج وصار يفك الجواهر اللي عليها

وبالغلط دعس على الديباج

فطاح الغلام المحنط عليه ودخل السيف في ظهره

ومات

وقف موسى يبكي عليه وقال ملاك الطمع

بعدها أخذوا الي غنموه من المدينة ورجعوا

وكانوا مصدومين من كل اللي شافوه

وأرسلوا كل اللي صار لعبد الملك

وطلبوا منه إنه ما يرسل أحد بعدهم إلى هذي المدينة

وبعدها اختفت مدينة النحاس

وإلى اليوم ما أحد يعرف لها أي أثر

وبس والله كثرت عليكم بالكلام لكن القصة تستحق

البيت او المثل الاشهر والاكثر تداول

من باعنا نرخص مكانه ودله

ومن تقاضى حي يقمح ليا مات

وهاذا لشاعر فراج بن مذكر

رحمه الله

والمقصد

إذا لك حق عند أحد طالِب فيه وهو حي ولا تؤجله

لأن اللي يسكت عن حقه حتى يفوت وقته يندم ويضيع حقه

نبطي

من شق ستر الناس ….شقو ستاره

ومن ضحك بالثرمان يضحك بلا سنون

هاذا البيت المشهور ل شالح بن هدلان

رحمه الله

والمقصد

إذا فضحت الناس، فلا تستغرب إذا فضحوك

فصحى

‏ما كل ما يتمنى المرء يدركه

‏تجري الرياح بما لا تشتهي السفن

وهاذا البيت المشهور للمتنبي

المقصد

مو كل شي تبيه يصير لأن الحياة والظروف أحيانًا تمشي عكس اللي نتمناه