أنا مش عارف و له قادر أسامح نفسي و انا كل اللي ببص عليه هو الجانب الاسود ده و سايب الجانب الكويس اللي فيا يموت و ينتهي لأني شايف أنه ملوش حق يعيش ملوش حق يكمل لأن مش حقيقي و معطي الحق لي الجلاد اللي معندهوش رحمه اللي كل مهمته أنه يوريني قد إيه انا سئ قد إيه انا مؤذي و بمحاوله قتل الجانب الكويس اللي فيا أنا بقتل أي خير كان ممكن أقدمه لي المجتمع و الناس اللي حواليا

انا حتى كنت شايف أني مفيش فيا خير و له أمل أني أعمل خير انا خراب انا مؤذي

لكن هل أنت دورت عليه عشان تعرف هو موجود وله ؟

انت كل اللي بتعمله أنك باصص على الجانب السئ اللي فيك فا طبيعي كل اللي تشوفه هو حاجات مش كويسه و شخصيه زباله و حتى لو مش موجود فا أنت بكل بساطه تقدر تعمل خير و تبني الجانب ده و تكبره و تعتق نفسك من نفسك

قمه الانانيه أني أبخل على الناس بي الخير بسبب أني شايف أن الجانب ده مش موجود أصلاً و انا محاولتش أصلاً أني اشوفه

أعتقادك أنك كده بتكفر عن ذنوبك بي جلد نفسك فا أنت بترتكب ذنب في حق نفسك ، نفسك ليها حق عليك

أطلب المغفره من اللي خلقها و أرحمها و سامحها .

لفتره طويله قوي انا مش عارف أزاي اوقف الظلم اللي بظلمه لنفسي ده لأن بكل بساطه انا مفيش غير طريقه واحده في دماغي و هي أني أجلد نفسي

و كنت بستحقر حته أني اسامح نفسي و أبقا كويس مع نفسي لأني شايف أن ده شئ مش رجولي لكن ده غباء لأني كنت بغرس أكتر و أكتر في القرف ده و ده خلاني أفضل في صداقات مؤذيه

صداقات دمرتني و دمرت أخلاقي و ديني و نظرتي لي نفسي و لو وقتها كنت بقدر نفسي مكنتش هقبل أني أفضل مع الاشكال الزباله دي

يعني انا حرفياً كنت بعاقب نفسي بسبب شئ انا خلقته في الماضي عن جهل و غباء و شكل من أشكال العقاب دي هي الصداقات دي و عدم وضع حدود

أحد الافكار الغبيه اللي كانت بتجيلي و اللي عقلي كان بيدفعني نحيتها بشده و يقولي هو ده الفعل اللي هيخليني أغفر لي نفسي

روح و أتكلم مع حد و وريه الجانب الزباله ده و عرفه كل حاجه

بجد!!!!

أنت بتطلب المغفره من شخص غير الله

أنت بتعطي حريتك لي بني أدم

انت ممكن تشوف أن لا و انا كده صادق لكن صدقني هو ده معنى أنك تروح تقول لي حد على الجانب ده بي أعتقادك أنك كده هترتاح من الجلد ده

لكن ربنا هيغفرلك و أنت هتسامح نفسك لكن صعب قوي حد غير ربنا و غيرك يبقا رحيم عليك

الحل في أيدك أنت مش في أيد غيرك

ربنا غفور و رحيم عليك أكتر من نفسك و أنت برضك في أيدك تسامح نفسك

فا أنت حرفياً اللي عملته أنك أصبحت عبد لي عبد زيك و أعطيته سلطه و قوه عليك

لو عملت الغلطه دي فا مفيش داعي تجلد نفسك لكن أتعلم منها و متقلقش محدش هيذلك محدش هيضرك لأننا كلنا عندنا بلاوي و هما أكيد هيخافو حد ينبش في القبور بتاعتهم

أنا سألت سؤال : أزاي ممكن البني أدم يسامح نفسه ؟

و بجد انا مكنتش عارف ازاي و كنت نفسي أعرف رأيكم

فا في شخص كتبلي تعليق جميل

“يدرك أن شخصه بالأمس يختلف تمامًا عن الحاضر فمن الظلم أن تحاكم شخصك الأمس بعقلك اليوم بل تحمد الله على أنك تعلمت”

شكراً يا أستاذ

الجمله دي ساعدتني في تخطي بعض الاشياء

الحل هو التعلم من الموقف ثم التخطي

تكرار الحدث مراراً و تكراراً لن يغير أي شئ

و خليك عارف أن ده ظلم لي نفسك و أنك بتعلمك من الموقف و التخطي فا أنت كده مش سئ لكن أنت كده بترحم نفسك

انا بقيت بعاند في فكره أني شخص سئ و انا هنا مش قصدي أني مش بحاسب نفسي لا انا بحاسب نفسي لكن انا قصدي

أني اي صفه سيئه بشوفها بقول ده انا و ديماً حاطط نفسي أني انا الشرير في القصه انا المؤذي لأني خراب و أي حاجه بدخل فيها و تبوظ فا انا السبب

لدرجه أني كنت ببعد ناس عني خوف من أني أضرهم و كنت ديماً بقولهم أسمعو انا حاسس أني انا بستغلكم و انا حاسس أني لما بقولكم أني بستغلكم فا انا كده بتلاعب بيكم بالله عليكم أبعدو عني أعملو ليا حظر و خليكم بعيد عني

قولت الجمله دي بي الحرف لي شخص.

لحد ما وقفت كل ده وبطلت أفكر في أي حاجه انا ندمان عليها في الماضي انا أتعلمت منها يبقا خلاص أدفنها و كمل طريقك أعمل خير لي الناس لي المجتمع لي كل اللي حواليك

غيرت تفكيري و غيرت الجانب اللي بنظر إليه ديماً و قررت أني أبص على الجانب الكويس

بقيت بفتكر كل خير أنا عملته لي حيوان لي شخص في الشارع لي أهلي انا كنت فاكر ده هيخليني اسوء و هيخليني متكبر و مغرور و مبصش على أخطائي لكن ده غلط ده هيخليك تعمل خير أكتر هتسعى لي الخير أكتر، و حقيقي انا مازال عندي تخوف من النظره دي لكن أعتقد أنك أنظر ليها على أنه ده خير لي وجه الله مش على أنه الناس هتشوفني كويس و كده أتمنى تكونو فهمتوني

بص على أخطائك و تعلم منها و بص على الخير اللي أنت بتعمله و أعرف أن ده توفيق من ربنا و أعمل من الخير ده أكتر

و لو معندكش خير كتير خليه كتير و روح قول كلمه حلوه لي أخواتك لي أبوك لي أمك روح هات أكل لي قطه او كلب في الشارع او أزرع شجره

أعمل كل ده لوجه الله

( في اللحظه دي وقفت و لقيت ابويا قدامي قولتله تعرف اننا مش بنقول كلام حلو لي بعض أنت حلو علفكره يا بابا ، فا حياتي ما قولت كده لي ابويا دي معجزه عمتاً ، اتخانقنا بعدها بي نص ساعه 🙂)

أسعى لي ده ديماً و قلبك هيبقا أنضف و عقلك هيبقا مرتاح أكتر و هتبقا اقوى في التصدي ضد الافكار اللي بتقولك أنك سئ و قذر ، لو غلطت في حد روح أعتذر متسيبش ده لكن لو الاعتذار هيزود الموضوع و هيخليه أسوء سواء ليك او ليه فا تصدق ليه و ادعي ليه

و نصيحه أخيره و بكررها تاني متعرفش حد على الجانب ده لأن بجد هتتضرر بدل ما هتستفاد خلي ده بينك و بين ربنا

متقلقش متخافش و كمل أه الخوف هيجي و القلق هيجي لكن في كل مره بتتجاهله و مش بتغذيه بيضعف و أنت بتبقى أقوى فا لما يجي بعدين أنت مش هتلاحظه لدرجه أنك هتفكر أنه خلاص هو أختفى

القلق و الخوف مش بيختفي لكن أنت بتبقى قوي لدرجه أنك مش بتلاحظه

أنت اللي أخترت الحزن و كنت تقدر تختار السعاده

أنت اللي أخترت هل الموضوع ده وحش او لا

ربنا أعطانا القدره على الاختيار

أعطى القدره لينا اننا يا أما نعصيه أو نعبده بي الحواس و العقل اللي خلقهم

فا مجرد ما تتأمل في الفكره دي هتعرف قد إيه انك مصعب الدنيا على نفسك

الساعه

12:29.AM

غارق في التفكير في حياتي و قد إيه انا بضيع وقت و قد إيه انا بعذب نفسي بي نفسي

بعدين وقفت و قولت انا عايز أفكر نفسي ديماً أحب حياتي

و قعدت و بكل بساطه انا لقيت أن عادي قادر أحبها بي الألم اللي فيها و قادر أوقف الكره اللي بوجهو لي نفسي

بسبب تقصيري في حق نفسي

بسبب أني عارف أن بأختياري

بحط نفسي في الوضع ده أكتر

بأختياري بضيع حياه حلوه هعيشها

بأختياري حرمت نفسي من أحلى حاجه في حياتي

بأختياري حكمت على نفسي بي العذاب ده

12:32.AM

ليه يا يوسف ؟

أنت للدرجه مش قادر تدفع نفسك لي أخرك ؟

مش قادر تكبح نفسك ؟

مش قادر تتحمل الألم بتاع أنك تخالف هواك ؟

هل ده اللي كل اللي هتعمله عشان الحياه اللي بتحبها ؟

هل ده أخرك ؟

هل أنت هتقعد كده طول عمرك ؟

الواقع لا يرحم

الواقع مش هيستنى يوسف لحد ما يشوف هل هيقدر يكبح النفس دي وله لا

الحاجات اللي نفسك فيها مش هتفضل موجوده و دي حقيقه تقبلها

تقبلها حتى لو كانت صعبه على عقلك صعبه عليك لأنك مرتاح لأنك لسه مقربتش من القاع

فاكر نفسك في أمان من ألم أنت رايح ليه بي رجليك

و لازم تفكر نفسك في كل مره حابب ترخي فيها أنها مش قاعده ليك

مش هتستناك حتى لو حسيت بي كده فا أحساسك غلط

أحساسك خدعه بتقع فيها

12:36.AM

عشان تغير اللي أنت فيها لازم تختار تتغير لازم تختار ألم التغيير و سواء حبيته او لا فا لازم تختاره

لازم تختار تدفع نفسك لي أقصى الحدود

لازم تصبر على الألم

تصبر لأن في كل مره بيبقا أصعب

دي ضريبه كل فعل و أنت بتدفع دين قديم من الإهمال

كل فعل كل يوم بتهمل فيه و بتاخده بي أستهتار

معتقد أنك هتقدر تهرب من الضريبه

فا انت بتحلم أنت غبي بما فيه الكفايه لأنك أنت دفعت الضريبه خلاص

هروبك كان ضريبه و ضريبه عاليه قوي على حساب

ثقتك في نفسك و نظرتك لي نفسك

أنت بتقول لي نفسك أنك مش بتوفي بي وعدك لنفسك

لازم تنفذ الوعد سواء ده كان على هواك او لا

اياً كنت معتقد إيه عن نفسك حتى لو أنت شايف نفسك مش بتوفي بي وعد نفسك

فا لازم لازم تنفذ الوعد

12:44.AM

أنت عليك دين كبير قوي لي نفسك

و الفائدة عاليه قوي على الدين ده

التأخير مش في مصلحتك

سدد الدين

سدد الدين اللي هيوصلك لي اللي عايزه

و خليك فاكر ديماً أنك تحب حياتك 🤝🏻🌹

“خليك واثق انك هتعرف تتصرف وقت ما يحصل الحدث اللي انت خايف منه ، تخطيطك ليه مستقلباً ملهوش اي لازمه ، تخيل 2000 نسخه من الحدث ده او يمكن اكتر انت كده كل اللي بتعمله انك عذبت نفسك 2000 مره على حدث مش هيحصل غير مره واحد و ده لو حصل اساساً”

انا عارف أنه صغير لكن دي أحد أفضل الافكار الي كتبتها في حياتي مع أنها من ضمن أكتر الافكار البديهي لكنها حقيقيه

فا تخيل يا غالي و يا أغلى الغوالي أني جيت و عملت دايره في أيدك و قولتلك : اسمع انا هرجع بعد 6 شهور و هجيب ولاعه و هحرقك في الدايره دي و مش هعمل كده غير مره واحده ، فا انت قعدت طول فترة ال 6 شهور كل ما تبص على الدايرة تقوم جايب ولاعه و تولع في الدايره اللي على ايدك على اساس أنك كده بتدرب نفسك على اللدعه اللي بتاخدها بعد 6 شهور و أنت كل اللي عملته أن خليت المكان اضعف و خليت الالم مضاعف بل أنت لدعت نفسك 2000 مره بدل مره واحده

هل ده ذكاء ؟

أتمنى أي حد قلقان دلوقتي و خايف يهدى بعد ما يشوف فكرتي ده و انا هكون في قمه سعادتي أن زرعت الطمأنينه في قلب واحد قلقان هكون سعيد لأني كنت بدور على حد يساعدني في ده و انا عارف أن ده مؤلم قوي

انا حاسس اني ولا حاجه من غير شكرك فيا و أنك تقولي اني قد إيه شاطر و مميز

ممكن لو سمحت يعني بعد أذنك تخليني أحس ان ليا قيمه .

يا الله على المقدمه القذرة دي كانت ثقيلة على القلب بس كان لازم اكتبها

ده بي الظبط منظري لما كنت بطلب من حد الاهتمام ، الفرق اني كنت بطلبه بطريقه نظيفه شويه

( مفيش حد هيروح يقول لحد اعطيني قيمتي و قولي اني مميز الا لو مازوخي يعني ، ده كان مثال يا جماعه )

حرفياً لو شلنا التوابل اللي بحطها فوق طلبي لي الاهتمام او أني أعمل حاجات بغرض أني اجذب الاهتمام

فا ده هيبقا شكلها الشكل المقرف اللي في المقدمه ده والشكل ده حقيقي بالمناسبة

اللي نفخك قادر يفرقعك تاني يا غالي

أنت حرفياً لا قيمة لك إلا باعتراف البيئه اللي حواليك بي قيمتك

فا أنت كده بتعذب نفسك

بتعمل اهداف مش بتاعتك

بتتخلى عن شخصيتك

زي ما عملت انا من 3 سنين

انا كنت عايز اخلي البيئه اللي حواليا تعجب بيا و تضمني عليها و يعتبروني ذو قيمه

تركت عقلي و تركت اهدافي و مبادئي و بدأت بي محاكاة كل فعل لهم و كان 90% من الأفعال سئ

الفاظ بذيئه و نميمه و غيبه و اهداف غبيه و عقلية محدودة و معتقدات وضعوها لي

عملت كل ده عشان اتقبل و خمن إيه اللي حصل ، فضلت منبوذ برضك فضلت مش محبوب و مفيش أي اهتمام ليا

كام شخص لاحظ ده كام شخص عرفو اني استمد قيمتي منهم من قعدتهم و اني هتدايق قوي لو لاحظت انه الاهتمام راح لي غيري

بقو يتعمدو يظهرو ليا اني مش مهم و يتعمدو يقللو مني و يتجاهلوني و انا كنت بعمل إيه

كنت بتدايق و بضحي اكتر و اكتر و كنت هضحي كمان.

“ انا بجد بتألم قوي لما بفتكر الفترة دي من حياتي و لي الاسف تعاملت معاها بشكل غلط و كنت ببص على يوسف ده اللي كان في الفترة دي بي استحقار و دونيه بشعه و كنت بتعامل مع نفسي بشكل قذر و كنت متعمد ده لأني كنت قرفان من نفسي كنت كاره نفسي و كنت شايف أني ولا حاجه و لا ليا اي قيمه و كنت بوصف نفسي بي أبشع الالفاظ لأني كنت شايف أني استحق كده و دي كان من ضمن الفترات المظلمه اللي مرت عليا و طلعت منها بي الصدفه ، طلعت منها لأني كنت في مكالمه في سيرفر ديسكورد و كنت بكلم مجموعة شباب هناك عن المشكله دي و أن بتعمد أني اعمل كده في نفسي عشان حاسس أني استحق ده في حذروني و وضحو ليا أن ده غلط و أن انا االمفروض اكون اكتر شخص رحيم بي نفسي بعد ربنا و من يومها و انا عرفت اني لازم اوقف و وقفت لكن طبعاً ده ساب اثر كبير قوي في نفسي( ربنا يكرم الشباب و يوفقهم ) “

لحد ما جات مشكله كبيرة خلتني انعزل عنهم غصب عني و الحمدلله على المشكلة دي.

لكن ما زال الاثر بتاع الفترة دي موجود مازلت بحس بي اني عايز اهتمام و عايز الناس تنجذب ليا

لكن بقيت بقاوم الرغبه دي كأنها ادمان و الحمدلله رجعت لي نفسي تاني و بدأت اطور عقليتي تاني

و اتعرفت على أحلى و أجمل شخصين عرفتهم في حياتي ، شخصين اتعاملت معاهم بطبيعتي بدون تصنع

و جعلوني اكتشف أن أفضل علاقات هتدخلها هي اللي هتكون فيها على طبيعتك مش متعمد تجذب الانتباه بل بتتعامل عادي

تخيلو أني كان ممكن اضيع الشخصين من بين ايدي لو فضلت على حالي ، الحمدلله اني عرفتهم .

بالمنطق أنت لو تقمصت شكل غير شكلك و شخصية غير شخصيتك عشان تجذب اهتمام ناس غيرك فا انت هتخسر نفسك هنا و مش هتبقى مرتاح هيبقى الموضوع عبء عليك و حتى هما هيبقو عارفين انك مش زيهم

فا ليه تعمل كده و ليه تبذل كم المجهود الجبار ده طالما انت تقدر تجذب ناس تحبك من غير ما تفقد حاجه من نفسك ، تحبك من غير ما تضحي بي نفسك و هتحب نفسك اكتر بسببهم ( دمعت والله من حلاوة الفقرة دي )

انا في حاجات كتير قررت اعملها لنفسي و مش هشاركها مع حد خالص انا هشارك النتيجة لكن الرحلة تخصني انا و ممكن كمان لا أشارك النتيجة وله الرحلة لأن كل ما عملت حاجات كتير لنفسي كل ما قضيت على المرض ده

كنت عايز ابدأ كذا حاجه هنا لكن حسيت اني بعمل كده لهدف أنه الناس تشوف أني بعمل كده فا قررت ألغي الفكرة

قررت ابدا حاجات كتير بدون جمهور بدون معرفة أهلي و له أعز أصحابي و لو وقعت في مشكلة هحلها انا

و حبيت احذر أنه محدش يتطرف في حته انه يبقى لوحده قوي لأنه ده هيوديك لي الهلاك اه في فتره لازم تبقا لوحدك و لو انت بتعاني من اللي بعاني منه فا اه ممكن تبدأ حاجات لوحدك عشان تحل المشكله دي ( انا مش عارف هل ده افضل حل وله لا )

انا مازلت اعاني من الشئ ده و مازلت بقاومه

كنت من كام يوم عايز انزل اي حاجه عشان تجيب لايكات فا وقفت تنزيل و قعدت مع نفسي و قولت انا هنزل اللي عايزه و اللي بحبه

“ شكراً ليكم و شكراً لي الشباب اللي في ديسكورد و شكراً لي أحلى شخصين عرفتهم في حياتي “

Subscribe now

أنت هتوصل لي اللي الهدف اللي عايزه ، سواء الهدف اللي عايزه بعد سنه او 6 شهور او 3 شهور

فا طالما انت شغال عليه و طالما انت هتوصل فا متخليش الرحلة مؤلمه

استمتع بيها و العبها بي طريقتك مش لازم تجلد نفسك مش لازم تبقى قاسي

عادي ممكن تشتغل 16 ساعة بي استمتاع بدل ما تشتغل بي عذاب

لما بقول كده بتيجي في بالي فكره وهي : انا كده هماطل انا كده مش هشتغل انا كده هستنى لحد ما اللحظه المناسبه اللي هبقا فيها مستمتع و ابدأ و اللحظه المناسبه دي عمرها ما هتيجي

بسبب السوشيل ميديا أتنحت في دماغنا أنه

أستمتاع = مفيش صعوبة = مفيش شغل = شئ بلا قيمة

مع أنه بالمنطق ده غباء خام

أنت\ي لما تلعب كورة هل مش بتتعب ؟

أنت\ي لما تركب عجلة هل مش بتتعب ؟

أنت\ي لما بتلعب على البلايستشن هل مش بتتعب ؟

في حاجات كتير عايز اقولها بس مكسل

اللي عايز اقوله أنك بتتعب بس لأنه مقدار الاستمتاع أعلى من مقدار التعب فا أنت مخدتش بالك منه

دي حاجه مضحكه قوي

أنا أدركت أني قادر احقق نفس النتيجه بس انا و مستمتع انا هنام و انا متحمس اني اقوم بكره عشان اشتغل “العب”

انا هلعب بي طريقتي بي الشكل اللي عايزه انا و هعملها براحتي

ايلون ماسك عمل شكل الصاروخ زي اللي شافه في فيلم

فا هو حرفياً عمل حاجه ملهاش اي لازمه عشان بس هو شايف انها ممتعه

و برضك في أمثله تانيه كتير

مثلاً نافال اللي ثروته تقدر بي مليار

فلسفة نافال كلها في الشغل هي عبارة عن أنه يستمتع بي اللي بيعمله و يشوف إيه اللي لعب بالنسبه ليه و شغل بالنسبة لي منافسينه

هو كده حرفياً بيقتل المنافسه لأنه بيلعب لعبته بي قوانينه

اللي عايزة اقوله أنه اه هيبقا في تعب لكن في متعه برضك

فا بدل ما تخلي الرحله 100% تعب و 100% بتتحرك بدافع أو الخوف أو الغضب أو القلق او الحزن

فا ممكن عادي خالص يبقا 40% او 50% او 70% متعه و نسبه التعب 30% اه النسبه دي ممكن تزيد ، و اه ممكن تخلي الرحله كلها ممتعه

لكن دلوقتي انت بقيت بتستمتع بي الرحله دلوقتي هتوصل انت و مستمتع

أياك تقع في الفخ العقلي اللي يقولك أنه اااااااااااااااااااه انا مش مستمتع يبقا مش هبدأ

ده غباء لي سببين

السبب الاول انك كده مش هتوصل و انت كده بتودي نفسك في حته هتكره نفسك فيها

السبب التاني أنه انت اللي بتخلق المتعه فا ده يعرفك أنك بتحاول تتمرقع و بتهرب فا لا يا حبيبي أنت اللي بتخلقها مش هي اللي بتيجي لوحدها

و انا واثق ان كل حاجه بنعلمها قادرين نخليها ممتعة سواء في تنفيذها بي طريقتنا او بفكره معينه بنرددها في نفسنا او هدف بنفكر نفسنا بيها

مش لازم تكون حاجه كبيير قوي عشان خاطر تقول دي ممتعه لا عادي ممكن تفكر نفسك بأنك كده بتقرب من هدفك فا تكمل

ممكن تغير في التنفيذ بحيث يبقا ممتع زي ما ايلون ماسك عمل

في النهاية و بعد ما انا و أنت نحقق اهدافنا و نوصل للي عايزينه هنبص على الرحله و هنشوف أنها كانت متتعه

حتى الالم اللي فيها كان ممتع

انا حاسس اني قصرت قوي في المقال ده لكن انا قولت كل اللي اقدر اقوله واتمنى ليكم يوم سعيد

لو الزمن ده متوفر لينا كل حاجه و متوفر لينا حاجات اكتر من الحاجات اللي اتوفرت لي الناس قبلنا

العظماء اللي كانو قبلنا مكنش عندهم ربع اللي عندنا

كل الناس اللي ليهم تأثير في حياتنا كانو قبل زمن الرخاء ده

كل الناس الاذكياء كانو قبل كده

ازاي مش قادرين نبقا احسن منهم ازاي مش عارفين نوصل لي مستواهم حتى

نقدر ؟ اكيد نقدر

بس ليه محدش وصل ليهم

المفروض يبقا اغلبيه الناس اللي عايز علم و اغلبيه الناس اللي عايزه تتثقف في الدين و العلوم تبقا زي العلماء اللي سبقوهم

المفروض الزمن ده يقدم ناس اذكى ، ناس اعظم

ناس قادره تغير في العالم و تخلق حاجات جديده مكناش متصورينها

ناس عظماء بي مراحل

إيه السبب اللي موقفك ؟

إيه السبب اللي موقفني ؟

احنا معانا المصادر معانا المعلومات معانا كل حاجه

احنا نقدر نبقا اعظم امه تاني

نقدر يبقا عندنا ناس تغير مجرى التاريخ تاني

ليه وقفنا

اعتقد السبب انه انا بسأل مش بتحرك

اعتقد السبب ان كل واحد متكل على التاني

نسينا انه ربنا بيحاسب كل واحد على فعله هو بس

نسينا اننا هنتحاسب على عملنا مش على عمل غيرنا

مش على عمل اهلنا

وله حتى المجتمع

السؤال اللي هيتسأل ليك انت و واقف قدام ربنا هو

ليه انت معملتش اللي كنت عارف انك تقدر تعمله و كان متوفر ليك ده و ضيعت وقتك في وله حاجه ؟

ليه انت مغيرتش الشئ اللي كنت عارف انك تقدر تغيره و كان متوفر ليك كل حاجه و وقفت ؟

ليه ضيعت وقتك في تفاهات و كنت تقدر تبقا حاجه كبيره تنفع نفسك و أمتك ؟

ليه انت معملتش كل اللي كنت نفسك تعمله ؟

مش هيسألك عن المجتمع وله عن الحكومه وله عن اهلك وله اصحابك

مفيش مبرر

غير انك قصرت

هتتحاسب لوحدك و هتتحاسب !!

اه هتتحاسب على وقتك ، هتتحاسبب على القدرات اللي خدتها و ضيعتها

هتتحاسب على كسلك اللي بيه حرمت ناس كتير كان ممكن تستفاد منك و حرمت المجتمع و الامه و نفسك من الخير اللي كان هيجي من الشئ ده لو مكسلتش

اعتقد احنا لازم نوقف نسأل و نبدأ نتحرك و نبني تاني

اعتقد اننا محتاجين بعض من الوهم عشان نرجع تاني

محتاجين بعض من المسؤوليه تجاه العالم اللي حواليك

و انك شئ قادر تفيد ملايين من الناس

و انك قادر تبقا انسان “ يغير التاريخ “

Subscribe now

لو مكنتش هتهتم بي نفسك فا مين هيهتم بيك

مشكله مكنتش فاهم سببها لمده سنتين و أمبارح بي الصدفه فهمت

و المشكله اني ديماً بسعى لي الاهتمام ديماً عايز الناس تهتم حتى لو ده هيضرني

عرفت ده من سنتين بعد ما عملت اغرب حاجه و بجد لما ركزت لقيت أنه انا عملت ده كله عشان بس الناس

تهتم بيا و من ساعتها و الموضوع متعلق في دماغي بشكل غريب بقيت بلاحظ كل موقف في طفولتي

كل موقف في حياتي اليوميه بعد ما عرفت الحوار ده و ليه لاني الشئ اللي عملته كان كبير قوي و دخلني في

مشاكل كتيير و أكيد انا طالما عملت كده بهدف الاهتمام فا اكيد في حاجات صغيره كتير عملتها لي نفس الهدف

لاحظت انه اغلب مشاكلي و اغلب تصرفاتي و سلوكياتي انا و صغير كانت لي الهدف ده و الغريب انه الموضوع ده نقمه و نعمه في نفس الوقت انا عشان الناس الكبير تهتم بيا و الصغيرين ، فا كنت ببقا مختلف في حاجات كتير و جربت حاجات كتير

مره كنت الولد اللي بيشتم و بيعمل مشاكل

مره كنت اللي بيقول نكت و بيحاول يضحك الناس ( كنت كرييينج بس يله )

مره قليل ادب

مره الولد المثقف اللي بيقرأ و الولد اللي بيفكر و الولد الذكي ( دي النعمه انا فعلاً بقيت جامد )

حتى ذوقي في الاغاني كان غير اللي حواليا

ذوقي في المحتوى كان مختلف

فا لما كبرت من ٣ سنين كده قولت اني عايز ابقا top 1 في العيله ( أو قبيله على حسب انت تقول عليها إيه)

و فعلاً غيرت عقليتي بي الكامل و بقيت اجتماعي بي شكل مرعب بقيت الناس شايفني اجتماعي و كانت في ناس كتير بتحبني بسبب اني كنت بعرف اتكلم و أتعامل مع الناس بي شكل كويس ، بدأت أتعامل بشكل يناسب الهدف اللي انا عايزه .

حصلت مشكله كبيره معايا في الفترة دي و خلتني اغير وجهة نظري لي حاجات كتير قوي و بقيت براجع كل حدث حصل في السنه دي كل سلوك كان متجه نحيه شئ واحد

“الاهتمام “

قعدت و عرفت هدفي وقتها الحاجه اللي عايزها و قررت اغير عقليتي تاني و اغير شخصيتي تاني و ابطل اي سلوك هدفه اني احصل على اهتمام و فعلاً انا اتغيرت و عقليتي اتغيرت ، لكن حصلت شئ تاني و غيرت عقليتي تاني و غيرت سلوكياتي و اقدر اقول اني حالياً دي افضل عقليه وصلتلها .

لكن في خلال كل التغيير ده و في خلال ٣ سنين أو سنتين مش متذكر قوي انا كنت بسأل نفسي هو انا عايز اهتمام و إيه مصدر الشعور ده بسبب إيه لكن لقيت أنه بحثي عن مصدره مضيعه لي الوقت فا بقيت بدر على حل اني أحل مشكلتي هنا .

فا كنت امبارح بعمل قهوة و من غير اي مقدمات راجعت كل اللي كتبته فوق ده في دماغي و قولت انه مهما

حصل الشعور اللي عايز يتشبع ده و اللي هو شعور الاهتمام ، مستحيل يتشبع لو جاي من بره و لازم يبقا

الاهتمام جاي من جوه رميت المعلقه و وقفت كده و قولت الكلام بي صوت عالي عشان استوعبه

( الحمدلله مكنش حد من أهلي موجود كانو افتكروني اتجننت )

قولت يجي من جوه ازاي اهتم بي نفسي ازاي ما انا عارف انه ده الحل ، لكن انا كنت عارف انه ده الحل لكن مكنتش عارف الطريقه مكنتش عارف التطبيق الصح مكنتش عارف الاهتمام الصح كنت فاكر الاهتمام هو الاهتمام بي جسمي و بي عقلي و بيئتي و حياتي لكن مكنتش مهتم بي القدر الكافي بي نفسي ،مشاكلي ، عقلي ، أفكاري ، معتقداتي ، المواقف اللي عديت بيها ، مكنتش ببص بي عين الفضول و الاستكشاف ، و من امبارح عرفت الحل لكن لسه التطبيق مش ظابط و ده لغز بحاول احله اني اطبق بي الشكل الصح و اطبق اصلاً

و بجد كتابه المقال ده احسن قرار لاني لما كتبت الكلام ده لاحظت نقطه قوه مهمه و هي اني حرفياً كنت ببقا الشخص اللي عايزه

يعني من سرسجي لي شخص مش بيشتم خالص لي شخص بيضحك لي شخص مثقف لي شخص اجتماعي لي العقليه العظيمه اللي انا عليها النهارده دي انا عندي قدره رهيبه على التغيير رغم اني في مشاكل في حياتي بحاول اغيرها لكن

انا اكتشفت اني قادر اكون اي حد انا عايزه و ده مش ثقه من فراغ ده بعد تفكير و مراجعه لي اللي حصلي و التغيير بجد انا لحد دلوقتي انا في مرحله في حياتي انا مش فاهم ازاي طلعت منها كده و ازاي بقيت على العقليه دي النهارده بجد لو حد بص عليا كان قال مستحيل يبقا حاجه ، مستحيل يوصل لي الحته دي أبداً

لكن وصلت ده إثبات قوي ليا انا قادر اوصل لي اللي انا لي اي هدف انا عايزه

في مشاكل انا مش عارف احلها لكن بعد ده كله انا بقيت واثق من وصولي

احد المشاكل دي

و هي اني مش قادر اشتغل لي ساعات طويله عرفت انها تافه و قادر احلها ، و الغريب هنا برضك و اكتشفته انا و بكتب انه انا ازاي قدرت اني ابقا شخص اجتماعي بي الشكل المرعب ده بعد ما كنت بخاف اتكلم مع الناس ازاي اتغيرت بسرعه بجد ازاي قدرت اعملها انا حرفياً فاكر نفسي قبل النقله دي اني كنت بخاف أتعامل مع الناس و بخاف اطلع بجد

انا محتاج اهتم بي نفسي اكتر لان في حاجات كتير محتاج مثيره لي الاهتمام اكتشتفها انا و بكتب المقال ده

انا راجعت ده مرتين في حاجات مسحتها لاني كنت عارف انها هتتفهم بي شكل غلط و كنت عايز اخلي المقال ده مفيد لأنكم بتعطوني شئ مهم و هو وقتكم انا اسف لو المقال مكنش مفيد و حسيتو انو وقتكم ضاع

و لو كان مفيد فا دي حاجه تفرحني قوي لاني بحب اساهم في الحاجات الحلوه اللي زي كده

لو وصلت لي النهاية فا انت كده شخص مهتم و لك كامل الاحترام و التقدير و خد ورده🌹